(ខេត្តកំពត)៖ បន្ទាប់ពីមានភ្លៀងធ្លាក់បន្តបន្ទាប់រយៈពេលជាច្រើនថ្ងៃនៅដើមខែសីហានេះបណ្ដាលធ្វើឲ្យមានជំនន់ទឹកភ្លៀងលិចលង់ប៉ះពាល់ផលដំណាំលំនៅដ្ឋានផ្ទះសំបែងនិងជីវភាពរស់នៅរបស់ប្រជាពលរដ្ឋក្នុងតំបន់ខ្លះៗនៃឃុំ និងសង្កាត់មួយចំនួនក្នុងស្រុកទឹកឈូនិងក្រុងកំពតខេត្តកំពត។
ផ្ដើមចេញនូវក្ដីកង្វល់និងការយកចិត្តទុកដាក់ខ្ពស់ចំពោះសុខទុក្ខលំបាករបស់បងប្អូនប្រជាពលរដ្ឋ រយៈពេលពេញមួយថ្ងៃគឺនៅថ្ងៃទី១០ ខែសីហាឆ្នាំ២០១៩ លោក ជាវ តាយ អភិបាលនៃគណៈអភិបាលខេត្តកំពត លោក ជឹង ផល្លាប្រធានក្រុមប្រឹក្សាខេត្ត រួមជាមួយនិងមន្ត្រីមូលដ្ឋាននិងថ្នាក់ដឹកនាំមន្ទីរ អង្គភាពមួយចំនួនក្នុងខេត្ត បាន ចុះជួបផ្ទាល់ជាមួយប្រជាពលរដ្ឋ និងពិនិត្យស្ថានភាពទឹក ក្នុងនោះនៅភូមិអណ្ដូងជីមឺុន ភូមិកំពង់គ្រែង ក្នុងឃុំកំពងគ្រែងព្រមទាំងតាមភូមិសាស្ត្រដងព្រែកកំចាយនៃស្រុកទឹកឈូ និងភូមិស្វាយធំ ភូមិក្រាំងនៃសង្កាត់ក្រាំងអំពិលក្រុងកំពត។
ក្នុងដំណើរចុះពិនិត្យស្ថានភាពទឹកព្រឹកនេះ លោក ជាវ តាយ អភិបាលខេត្ត បានបញ្ជាក់ថា៖ ដោយផ្ដើមចេញនូវក្ដីកង្វល់និងមានការជំរុញយកចិត្តទុកដាក់ខ្ពស់ពីថ្នាក់ដឹកនាំពិសេសសម្ដេចតេជោ ហ៊ុន សែន ប្រមុខរាជរដ្ឋភិបាល និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជាប្រធានកាកបាទក្រហមកម្ពុជាចំពោះសុខទុក្ខលំបាកនិងជីវភាពរស់នៅរបស់បងប្អូនប្រជាពលរដ្ឋនៅពេលវេលាដែលជួបគ្រោះមហន្តរាយក៏ដូចបញ្ហាផ្សេងៗ។
លោក ជាវ តាយ បានបញ្ជាក់ទៀតថា៖បញ្ហាគ្រោះមហន្តរាយគឺយើងមិនអាចកំណត់បានឡើយ ប៉ុន្តែបញ្ហាសំខាន់គឺរាជរដ្ឋាភិបាល ក៏ដូចអាជ្ញាធរសមត្ថកិច្ចគ្រប់លំដាប់ថ្នាក់និងប្រជាពលរដ្ឋទាំងអស់ត្រូវតែចូលរួមតាមរយៈយន្តការឬវិធានការណ៍នានាដើម្បីបង្កាទប់ស្កាត់និងដោះស្រាយសង្គ្រោះអាយុជីវិតមនុស្សឲ្យបានទាន់ពេលវេលានិងមានប្រសិទ្ធភាពជាការចាំបាច់។
ជាមួយឱកាសនោះ លោកអភិបាលខេត្ត ក៏បានស្វែងយល់និងអរគុណចំពោះការស្ដាប់នូវមតិសំណូមពរលើកឡើងពីប្រជាពលរដ្ឋ ពាក់ព័ន្ធបញ្ហាហេដ្ឋារចនាសម្ព័ន្ធក្នុងមូលដ្ឋានដើម្បីជាទុនធ្វើផែនការអភិវឌ្ឍ ពិសេសការទប់ស្កាត់ឬបញ្ចៀសនូវផលប់ះពាល់ពីជំនន់ទឹកភ្លៀងក្នុងមូលដ្ឋាននីមួយៗពេលខាងមុខ។
លោកអភិបាលខេត្ត ក៏បានថ្លែងអំណរគុណកោតសរសើរចំពោះកងកម្លាំងប្រដាប់អាវុធនិងអាជ្ញាធរមានសមត្ថកិច្ចពាក់ព័ន្ធទាំងអស់ដែលបានរួមសហការគ្នាត្រៀមបង្កាជួយសង្គ្រោះប្រជាពលរដ្ឋ និងបានផ្ដាំផ្ញើ ឲ្យយកចិត្តទុកដាក់ខ្ពស់តាមដានក្នុងគោលដៅប្រឈមនានាបើមានបញ្ហាសូមប្រញាប់ជួយសង្គ្រោះប្រជាពលរដ្ឋមកកាន់ទីទួលសុវត្ថិភាពនិងរាយការណ៍ជូនដល់ថ្នាក់ដឹកនាំឬអាជ្ញាធរមានសមត្ថកិច្ចដែលនៅជិតដើម្បីជួយអន្តរាគមន៍សង្គ្រោះមិនត្រូវទុកឲ្យប្រជាជនណាម្នាក់ស្លាប់ដោយគ្រោះទឹកជំនន់ឡើយ។
ទន្ទឹមនោះប្រជាពលរដ្ឋទាំងអស់ក៏ត្រូវប្រកាន់យកចិត្តទុកដាក់នូវបញ្ហអនាម័យល្អ រស់នៅស្អាត ហូបស្អាត ផឹកស្អាត ជាពិសេសក៏ត្រូវយកចិត្តទុកដាក់ប្រុងប្រយ័ត្នចំពោះ កូនចៅដើម្បីបង្កាគ្រោះថ្នាក់លង់ទឹកដោយយថាហេតុដែលបណ្ដាលមកពីការធ្វេសប្រហែសរបស់យើង។
ក្នុងឱកាសនោះ លអភិបាលខេត្ត ក៏បាននាំយកនូវអំណោមានមី និងអង្ករព្រមទាំងថវិកាមួយចំនួន ដើម្បីឧបត្ថម្ភដល់ប្រជាពលរដ្ឋក្នុងដំណាក់កាលជាបន្ទាន់ផងដែរ។
សូមបញ្ជាក់ថា៖តាមការឲ្យដឹងពីអាជ្ញាធរ គិតត្រឹមថ្ងៃទី១០ខែសីហានេះនៅស្រុកទឹកឈូមានឃុំដែលកំពុងប្រឈមនិងផលប៉ះពាល់ដោយជំនន់ទឹកភ្លៀងនេះគឺមានឃុំកំពង់គ្រែងឃុំ ស្ទឹងកែវនិងឃុំព្រៃឃ្មុំ ឯក្រុងកំពតក៏មានផលប៉ះពាល់តិចឬច្រើននៅសង្កាត់ទាំង៥នៃក្រុងផងដែរ៕
