កណ្តាល៖ នាព្រឹកថ្ងៃសុក្រ ៥កើត ខែស្រាពណ៍ ឆ្នាំឆ្លូវ ត្រីសក័ ពុទ្ធសករាជ ២៥៦៥ ត្រូវនឹងថ្ងៃ ទី១៣ ខែសីហា ឆ្នាំ២០២១។
លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល រួមជាមួយលោក អេង មោក្ខ ប្រធានក្រុមប្រឹក្សាស្រុក និងលោក អេង សុវិចិត្រ អភិបាល នៃគណៈអភិបាលស្រុកកោះធំ តំណាងឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងឯកឧត្តម គង់ សោភ័ណ្ឌ អភិបាល នៃគណៈអភិបាលខេត្តកណ្តាល បានអញ្ជើញជាអធិបតីភាព ក្នុងពិធីបញ្ចុះបឋមសិលាសាងសង់អគារប៉ុស្តិ៍គោលដៅការពារព្រំដែនព្រែកឡថ្នាំ ចំណុះឲ្យប៉ុស្តិ៍នគរបាលការពារព្រំដែនព្រែកជ្រៃ ស្ថិតក្នុងភូមិព្រែកជ្រៃក្រៅ ឃុំព្រែកជ្រៃ ស្រុកកោះធំ ខេត្តកណ្តាល ។
នាឱកាសនោះក៏មានការចូលរួមពីលោកស្នងការរង លោកនាយការិយាល័យ លោកអធិការនគរបាលស្រុកកោះធំ លោកមេបញ្ជាការវរ:សេនាតូចនគរបាលការពារព្រំដែនគោកលេខ៦០៥ លោកប្រធានប៉ិស្តិ៍នគរបាលការពារព្រំដែនព្រែកជ្រៃ និងមន្ត្រីពាក់ព័ន្ធ។ លោក លោកស្រីក្រុមប្រឹក្សាស្រុក លោក លោកស្រី អភិបាលរងស្រុក លោក លោកស្រីក្រុមប្រឹក្សាឃុំ លោកមេឃុំ និងអាជ្ញាធរមូលដ្ឋាន ។
នៅព្រឹកថ្ងៃសុក្រទី១៣ ខែសីហានោះដដែល ក្រោយពីបញ្ចប់ពិធីបញ្ចុះបឋមសិលាសាងសង់អគារប៉ុស្តិ៍គោលដៅការពារព្រំដែនព្រែកឡថ្នាំ ចំណុះឲ្យប៉ុស្តិ៍នគរបាលការពារព្រំដែនព្រែកជ្រៃ ស្ថិតក្នុងភូមិព្រែកជ្រៃក្រៅ ឃុំព្រែកជ្រៃ ស្រុកកោះធំ លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្ដាល ដឹកនាំលោកស្នងការរង និងមន្ត្រីក្រោមឱវាទ ចុះត្រួតពិនិត្យការងារនៅតាមតំបន់ព្រំដែន និងប៉ុស្តិ៍ការពារព្រំដែនក្អមសំណ ស្ថិតនៅស្រុកលើកដែក ខេត្តកណ្តាល ។
គួរជម្រាបថាក្រោយពីធ្វើដំណើរត្រួតពិនិត្យការងារមួយចំនួននៅតំបន់ព្រំដែន និងប៉ុស្តិ៍ការពារព្រំដែនក្អមសំណលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល ដឹកនាំលោកស្នងការរង និងមន្ត្រីក្រោមឱវាទ ដោយសហការជាមួយមជ្ឍមណ្ឌលសកម្មភាពកំចាត់មីនកម្ពុជា ( CMAC)ចុះត្រួតពិនិត្យទីតាំងរករ៉ាវគ្រាប់យុទ្ធភ័ណ្ឌមិនទាន់ផ្ទុះដោយរកឃើញសរុបមានចំនួន២៦០គ្រាប់ ក្រោយពីប្រជាពលរដ្ឋជាម្ចាស់ទីតាំងនោះ ប្រទះឃើញគ្រាប់មិនទាន់ផ្ទុះមួយចំនួន ខណៈកំពុងសាងសង់សរសរជើងតាងលំនៅឋាន ស្ថិតក្នុងភូមិព្រែកដាច់ ឃុំព្រែកដាច់ ស្រុកលើកដែក ខេត្តកណ្តាលបន្ទាប់ពីទទួលបានព័ត៌មានពីប្រជាពលរដ្ឋប្រទះឃើញគ្រាប់យុទ្ធភ័ណ្ឌមិនទាន់ផ្ទុះនៅចំណុចភូមិឃុំខាងលើ កាលពីថ្ងៃទី១២ ខែសីហា ឆ្នាំ២០២១ម្សិលមិញនេះ ។
គួរបញ្ជាក់ថាកម្លាំងនគរបាលស្រុកលើកដែក និងកម្លាំងការិយាល័យគ្រប់គ្រងអាវុធជាតិផ្ទុះនៃស្នងការដ្ឋាននគរបាលខេត្តកណ្ដាល សហការជាមួយមជ្ឍមណ្ឌលសកម្មភាពកំចាត់មីនកម្ពុជា ( CMAC)ក៏បានចុះមកពិនិត្យស្រាវជ្រាវរាវរកប្រទះឃើញគ្រាប់ចំនួន១៣៥គ្រាប់ រហូតមកដល់ព្រឹកថ្ងៃទី១៣ ខែសីហានេះ ក្រុមការងារជំនាញបានបន្តរ៉ាវរកទៀតរហូតរកឃើញសរុបបានចំនួន២៦០គ្រាប់តែម្ដង ។
នាឱកាសនោះលោកឧត្តមសេនីយ៍ទោ ឈឿន សុចិត្ត ស្នងការខេត្តកណ្ដាលបានឲ្យដឹងថា
គ្រាប់យុទ្ធភ័ណ្ឌមិនទាន់ផ្ទុះចំនួន២៦០គ្រាប់នេះ គឺជាគ្រាប់ដែលសេសសល់ពីសម័យសង្គ្រាមមកម្លេះ គឺជាប្រភេទគ្រាប់ Mortar 60 mm , 82mm , 120mm និង ប្រភេទគ្រាប់ មិនធាក់ថយ Recoilless 75mm ។
លោកស្នងការបន្តថា យោងតាមការឲ្យដឹងពីលោកស្រី ចឺយ រចនា អាយុ៤៧ឆ្នាំ ជនជាតិខ្មែរ ជាម្ចាស់ទីតាំងដែលគាត់បានទិញដីនេះនៅក្នុងឆ្នាំ២០០៥ គាត់ក៏បានដឹង នៅម្តុំនេះមានគ្រាប់ជាច្រើន ដែលបានបន្សល់ទុកហើយនៅឆ្នាំ១៩៩៣ជំនាន់UNTACខាងមជ្ឍមណ្ឌលសកម្មភាពកំចាត់មីនកម្ពុជា ( CMAC)ក៏បានចុះមកប្រមូលម្តងដែលក្នុងរណ្តៅខាងក្រោយ ជម្រៅជាង២ម៉ែត្របានជាច្រើនគ្រាប់ ។
បើយោងតាមការឲ្យដឹងតាមការឲ្យដឹងពីលោក ចាន់ សុន អាយុ៧៩ឆ្នាំ មន្ត្រីយោធាស្រុកលើកដែក ចូលនិវត្តន៍ និងជាអ្នករស់នៅទីនោះតាំងពីជំនាន់ លន់ ណុល មកនិងបានចុះមកបង្ហាញទីតាំងផ្ទាល់បានបញ្ជាក់ថា ទីតាំងនេះជាកន្លែងឃ្លាំងគ្រាប់ របស់ទាហានខ្មែរក្រហម ដែលដឹកមកទុកនៅទីនេះជាច្រើន សម្រាប់វាយជាមួយកងទ័ពវៀតណាម៕
