ភ្នំពេញ ៖ លោក ស៊ឹម ស៊ីថា អគ្គនាយករដ្ឋាករទឹកស្វយ័តក្រុងភ្នំពេញ បានបញ្ជាក់ប្រាប់អ្នកសារព័ត៌មាន នៅថ្ងៃទី១៦ ខែតុលាឆ្នាំ២០១៩ ថា រោងចក្រប្រព្រឹត្តិកម្មទឹកស្អាតចំការមន ដើរតួនាទីយ៉ាងសំខាន់ ក្នុងការរួមចំណែកបង្កើនបរិមាណផ្គត់ផ្គង់ទឹកស្អាត ជូនប្រជាពលរដ្ឋ កាត់បន្ថយការចុះខ្សោយនៃសម្ពាធទឹកសម្រាប់ប្រើប្រាស់ ត្រូវបានដាក់ដំណើរការហើយ។
លោកអគ្គនាយកបញ្ជាក់ថា គម្រោងសាងសង់រោងចក្រប្រព្រឹត្តិកម្មទឹកស្អាតចំការមន មានសមត្ថភាពផលិតទឹក៥២,០០០ម៉ែត្រគូបក្នុង១ថ្ងៃ ដែលបានការគាំទ្រហិរញ្ញប្បទាន ពីទីភ្នាក់ងារបារាំងសម្រាប់ការអភិវឌ្ឍន៍ (AFD) និងថវិកាបដិភាគរបស់រដ្ឋាករទឹកស្វយ័តក្រុងភ្នំពេញ សរុបប្រមាណ២៥លានដុល្លារអាមេរិក ហើយក្រុមហ៊ុនទទួលសិទ្ធិម៉ៅការសាងសង់ VINCI (វិនស៊ី) របស់ប្រទេសបារាំង។
បច្ចុប្បន្នរដ្ឋាករទឹកស្វយ័តក្រុងភ្នំពេញ កំពុងដំណើការរោងចក្រផលិតទឹកស្អាតចំនួន៣ទីតាំង គឺរោងចក្រផលិតទឹកស្អាតនិរោធ ដែលមានសមត្ថភាពផលិតទឹកបាន២៦ម៉ឺនម៉ែត្រគូបក្នុង១ថ្ងៃ, រោងចក្រផលិតទឹកស្អាតជ្រោយចង្វារ ផលិតទឹកស្អាតបាន១៤ម៉ឺនម៉ែត្រគូបក្នុង១ថ្ងៃ និងរោងចក្រផលិតទឹកស្អាតភូមិព្រែក ក្នុងសង្កាត់ស្រះចក ខណ្ឌដូនពេញ មានសមត្ថភាពផលិតទឹកបាន១៧ម៉ឺនម៉ែត្រគូបក្នុង១ថ្ងៃ។
ចាប់ពីទី១៦ ខែតុលា ឆ្នាំ២០១៩ នេះតទៅ រោងចក្រប្រព្រឹត្តិកម្មទឹកស្អាតចំការមន ត្រូវបានដាក់ដំណើរការទៀតនោះ រដ្ឋាករទឹកស្វយ័តក្រុងភ្នំពេញ នឹងអាចផលិតទឹកស្អាតកើនឡើងជាង៦២ម៉ឺនម៉ែត្រគូបក្នុង១ថ្ងៃ ខណៈដែលតម្រូវការប្រើប្រាស់ទឹកមានទំហំច្រើនឡើង ដែលនាំឲ្យសម្ពាធទឹកធ្លាក់ចុះពិសេសប្រជាពលរដ្ឋ ដែលរស់នៅជាយៗក្រុង៕
