ប្រភពពីអ្នកភូមិកំពែងនិងភូមិរជ្រៃ បានឲ្យដឹងថា បុគ្គលឈ្មោះ តា កុក ជាមេអាប៉ោងដ៍ល្បី និងឈ្មោះ ផល្លី ជាដង្ខៅល្បែងស៊ីសងដ៍ធំ អាចបើក លេងអាប៉ោងបានរៀងរាល់ថ្ងៃខែឆ្នាំបាន និងបើកសង្វៀនបញ្ជល់មាន់និងវង់អាប៉ោង បានដំណើរការយ៉ាងរលូនទំនងមានការបើកដៃពីនាយប៉ុស្តិ៍នគរបាលរដ្ឋបាលឃុំព្រែកប្រសព្វ និងលោក កាក់ មាស មន្ត្រីប៉ូលិសប្រចាំការនៅស្នាក់ការបណ្ដោះអាសន្នផ្សារកំពែង និងលោក ចាន់ សុផល្លា អធិការនគរបាលស្រុកព្រែកប្រសព្វ ផងដែរហើយមើលទៅបានជាមិនដែលឃើញបង្ក្រាប។
ប្រជាពលរដ្ឋរស់នៅក្នុងភូមិឃុំខាងលើលោកមានការព្រួយបារម្ភអំពីសុវត្ថិភាពប្រចាំថ្ងៃ ព្រោះថានៅក្នុងទឹកដីនៃឃុំព្រែកប្រសព្វស្រុកព្រែកប្រសព្វពោពេញទៅដោយបនល្បែងសុីសងដ៏ធំទាំងពីរនេះ គឺកន្លែងបនល្បែងទី 1 នៅនឹងផ្ទះប្រជាពលរដ្ឋឈ្មោះ ធី ក្នុងភូមិអូរជ្រៃ ដែលមានមេអាប៉ោងឈ្មោះតា កុក ជាប្រធាន ។ បទល្បែងដ៏ធំទី 2 គឺធ្វើការលេងចល័ត កន្លែងទី 1 នៅផ្លូវថ្នល់ទទឹង កន្លែងទី 2 នៅជិតទូលចាមភូមិកំពែងខាងក្រោយប៉ុស្តិ៍នគរបាលរបស់លោក កាក់ មាស កន្លែងទី 3 នៅក្នុងភូមិអូរជ្រៃ ទីតាំងទាំងអស់ខាងលើនេះគឺបានក្តីសុខសប្បាយណាស់ព្រោះតែមានលោកនាយស្នាក់ការរងរបស់នគរបាលឃុំព្រែកប្រសព្វ លោកកាក់ មាស ជាអ្នកមើលថែ ។ ប្រភពបានបង្ហើបប្រាប់ឲ្យដឹងថា កាលពីពេលកន្លងមកមានហេតុការណ៍ចោរចូលគាស់ផ្ទះអាជីវករដែលលក់ដូរនៅទល់មុខនឹងប៉ុស្តិ៍ប៉ូលីសនេះតែម្ដង ហើយក៏មានឧស្សាហ៍បាត់ម៉ូតូស៊េរីថ្មីៗជាច្រើនគ្រឿង ហើយពុំដែលបានឃើញសមត្ថកិច្ចនគរបាលប្រចាំការនៅផ្សារកំពែងនេះធ្វើការបង្ក្រាបបានម្ដងណាឡើយ។
ប្រជាពលរដ្ឋលោកសំណូមពរដល់ ឯកឧត្តម វ៉ា ថន អភិបាលនៃគណៈអភិបាលខេត្តក្រចេះនិង លន់ សុផាត ស្នងការនគរបាលខេត្តក្រចេះ មេត្តាគិតគូរនិងទប់ស្កាត់បង្ក្រាបរាល់បទល្មើសល្បែងស៊ីសងខុសច្បាប់ទាំងនេះដែលកំពុងតែកើតឡើងពេញបន្ទុក នៅក្នុងទឹកដីភូមិកំពែង ភូមិអូរជ្រៃ ឃុំព្រែកប្រសព្វ ស្រុកព្រែកប្រសព្វខេត្តក្រចេះនេះផង ដើម្បីជាប្រយោជន៍ដល់ប្រជាពលរដ្ឋទាំងអស់និងចូលរួមអនុវត្តន៍នូវបទបញ្ជាភូមិឃុំមានសុវត្ថិភាពទាំង 9 ចំណុចរបស់រាជរដ្ឋាភិបាលកម្ពុជា ។ ពីព្រោះថាល្បែងស៊ីសងនាំមកនៅសេចក្តីវិនាស អសន្តិសុខ អស្ថិរភាពសង្គម អំពើរហិង្សាគ្រួសារ ចោរកម្ម និងអំពើអបាយមុខផ្សេងៗដែលអាចធ្វើឲ្យប៉ះពាល់ដល់ប្រជាពលរដ្ឋនិងសង្គមទាំងមូលទៀតផង។ (ដូចសភាសិតមួយពោលថា ពេលឈ្នះមុខខ្លាញ់ពេលចាញ់មុខសេះ អស់តំរិះបើមិនរួចក៏ប្លន់ ) ។
ប្រភពបានបញ្ជាក់ថា កន្លែងវង់អាប៉ោងរបស់តា កុក មួយថ្ងៃឈ្នះពី 1លានទៅ 2 លានរៀល កន្លែងមាន់ជល់របស់ឈ្មោះ ផល្លី មួយអាទិត្យលេង4 ថ្ងៃ គឺថ្ងៃអង្គារថ្ងៃព្រហស្បតិ៍ ដើមផាន់ ពី 57 ម៉ឺនទៅ 2 លានរៀល ថ្ងៃសៅរ៍និងអាទិត្យ ជាថ្ងៃធំដើមផាន់ ពី4 លានរៀលទៅ ១០លានរៀល បើ វង់អាប៉ោងក្នុងកន្លែងបញ្ជល់មាន់នោះវិញ គឺលេងឈ្នះ ចាញ់ក្នុង១ថ្ងៃៗ រាប់ពាន់ឬម៉ឺនដុល្លារ ហើយមានអ្នកចូលរួមលេងល្បែងយ៉ាងពពាក់ពពូនរាប់រយនាក់ដោយពុំខ្លាចឆ្លងនូវជំងឺកូវីដ19 ឬជំងឺដែលតាថ្មី។
ពាក់ព័ន្ធនឹងករណីនេះ យើងខ្ញុំមិនអាចទាក់ទងមន្ត្រីពាក់ព័ន្ធបាននៅឡើយ ៕ ៕
