ខេត្តកណ្តាល៖ លោកជំទាវ ហ៊ុន កុសនី អភិបាលរងខេត្ត និងលោកជំទាវ នួន នារតី ប្រធានគណៈកម្មការ ពិគ្រោះយោបល់ កិច្ចការស្ត្រី និងកុមារខេត្ត ព្រមទាំងមន្ត្រីពាក់ព័ន្ធ និងមន្ទីរជំនាញ នៅរសៀលថ្ងៃទី១៤ ខែតុលា ឆ្នាំ២០២១នេះ បានចូលរួម ក្នុងពិធីបិទវេទិកាអាស៊ី-អឺរ៉ុបស្តីពី ស្ត្រី សន្តិភាព និងសន្តិសុខ តាមប្រព័ន្ធ Online Zoom ក្រោមអធិបតីភាព លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ច និងលោកជំទាវកិត្តិបណ្ឌិត អ៉ឹង កន្ថាផាវី រដ្ឋមន្ត្រីក្រសួងកិច្ចការនារី។
ក្នុងវេទិការនេះមានគោលបំណងចែករំលែកបទពិសោធន៍ និងឧបមានុវត្តន៍រវាងប្រទេសបណ្តានៅអាស៊ី និងអឺរ៉ុបក្នុងការអនុវត្តរបៀបវារៈស្ត្រី សន្តិភាព និងសន្តិសុខ។ ដោយមានការចូលរួមពីតំណាងប្រទេស៥៣ (៣០ប្រទេសមកពីទ្វីបអឺរ៉ុប ២១ប្រទេស មកពីទ្វីបអាស៊ី សហភាពអឺរ៉ុប និងលេខាធិការដ្ឋានអាស៊ាន) ។
លោកជំទាវកិត្តិបណ្ឌិត អ៉ឹង កន្ថាផាវី រដ្ឋមន្ត្រីក្រសួងកិច្ចការនារី បានឱ្យដឹងថាកម្ពុជាត្រៀមខ្លួនរួចជាស្រេច ដើម្បីកសាងក៏ដូចជាពង្រឹងនូវកិច្ចសហប្រតិបត្តិការទ្ចេភាគី និងពហុកភាគីជាមួយបណ្ដាប្រទេសនានាក្នុងសកលលោក និងដៃគូពាក់ព័ន្ធទាំងអស់ ក្នុងការលើកកម្ពស់ការអនុវត្តរបៀបវិរៈស្ដីពី ស្ត្រី សន្តិភាព និងសន្តិសុខ ក្នុងគោលបំណងជំរុញនូវសាមគ្ដីភាពសម្រាប់សហគមន៍ពិភពលោកទាំងមូល និងស្ដារឡើងវិញនូវសហគមន៍ប្រកបដោយភាពធន និងចែករំលែកនូវវិបុលភាពសម្រាប់ទាំងអស់គ្នាផងដែរ។
លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រីរដ្ឋមន្ត្រីក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ច នៃប្រទេសកម្ពុជា ក៏បានថ្លែងនូវការអរគុណដល់វាគ្មិនទាំងអស់ ជាពិសេសស្ត្រីជាដែលជាកងកំលាំងរក្សាសាមគ្គីភាពពិភពលោកក្រោមឆ័ត្រអង្គការ សហប្រជាជាតិ ដែលបានចែករំលែកពីបទពិសោធល្អៗ បញ្ហាប្រឈមក្នុងអំឡុងពេលបំពេញបេសកម្ម ជាពិសេសការចែករំលែកវិរភាព របស់ខ្លួនដែលបានឃ្លាតឆ្ងាយពីក្រុមគ្រួសារ ដើម្បីបុព្វហេតុជាតិ ការលះបង់នេះគឺជាកំលាំងចិត្តដ៏សំខាន់ ដើម្បីរួមចំណែកជំរុញឱ្យស្ត្រី និងក្មេងស្រីផ្សេងទៀតមានភាពខ្លាំងខ្លា និងក្លាហានដើម្បីស្ម័គ្រចិត្តចួលរួម ថែរក្សាសន្តិភាពពិភពលោក។
លោកជំទាវក៏បានថ្លែងអំណគុណយ៉ាងជ្រាជ្រៅចំពោះអ្នកតំណាងប្រទេសដែលមកពីទ្វីបបអាស៊ី និងអឺរុបទាំងអស់ដែលបានគាំទ្រលើរបៀបវិរៈវេវេទិកាអាស៊ី-អឺរ៉ុបស្តីពី ស្ត្រី សន្តិភាព និងសន្តិសុខមួយនេះ ដែលអាចជំរុញឱ្យវេទិកាស្ត្រីផ្សេងៗទៀតក្លាយទៅជាព្រឹត្តិការណ៍អមផ្លូវការក្រោមក្របខណ្ឌកិច្ចប្រជុំកំពូលអាស៊ី-អឺរ៉ុប នាពេលអនាគត់។
លោកជំទាវបានបន្ថែមថា រាជរដ្ឋាភិបាលកម្ពុជាបានចាត់ទុក “ស្ត្រីជាឆ្អឹងខ្នងនៃសេដ្ឋកិច្ច និងសង្គមជាតិ” និងបានដាក់ចេញនូវគោលនយោបាយ ផែនការសកម្មភាពជាតិ កម្មវិធីជាតិអន្តរវិស័យ សំដៅលើកកម្ពស់សមភាពយេនឌ័រ ពង្រឹងភាពអង់អាចដល់ស្ត្រី។ ស្ត្រីកម្ពុជា តែងទទួលបាន កាលានុវត្តភាពចូលរួមក្នុងគ្រប់កិច្ចការអភិវឌ្ឍសេដ្ឋកិច្ច-សង្គមជាតិ ទាំងផ្នែកវិស័យសាធារណៈ សន្តិសុខ នយោបាយ ការទូត ឯកជន អង្គការជាតិ-អន្តរជាតិ និងត្រូវបានលើកទឹកចិត្តឱ្យចាប់យកតួនាទីសំខាន់ៗ ដោយស្មើភាព និងគ្មានការរើសអើង។
ក្នុងឱកាសនោះដែរ លោកជំទាវបានស្នើសុំឱ្យប្រទេសចូលរួមទាំងអស់ សូមប្រែក្លាយ លទ្ធផលនៃវេទិការបស់យើងនាពេលនេះ ឱ្យទៅជាសកម្មភាពជាក់លាក់ និងប្រាកដនិយម ដើម្បីបុព្វហេតុសន្តិភាព សន្តិសុខ និងមនុស្សធម៌ សំដៅរួម ចំណែកធ្វើឱ្យសហគមន៍អន្តរជាតិឆាប់សម្រេចបាន នូវជ័យជំនះចំពោះវិបត្តិនៃជំងឺកូវីដ-១៩ និងការជំរុញសន្តិភាព ការអភិវឌ្ឍប្រកបដោយចីរភាព បរិយាបន្ន និងវិបុលភាពរួមសម្រាប់យើងទាំងអស់គ្នា។
គួរបញ្ជាក់ថា នៅថ្ងៃទី២៥-២៦ខែវិច្ឆិកាឆ្នាំ ២០២១ខាងមុខនេះ កម្ពុជានឹងធ្វើជាម្ចាស់ផ្ទះនៃកិច្ចប្រជុំកំពូល អាស៊ី អឺរ៉ុបលើទី១៣ (13ASEM) ដែលកិច្ចប្រជុំនេះនឹងផ្តល់កាលានុវត្តភាពមួយដ៏សំខាន់បន្ថែមទៀតសម្រាប់ ការលើកកម្ពស់វឌ្ឍនភាពនៃរបៀបវារៈស្ត្រី សន្តិភាព និសន្តិសុខ។
