(ខេត្តកំពត)៖ នៅព្រឹកថ្ងៃព្រហស្បត្តិ៍ ០៩កើត ខែមិគសិរ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី០៥ ខែធ្នូ ឆ្នាំ២០១៩ នៅសាលប្រជុំក្រុមប្រឹក្សារដ្ឋបាលខេត្តកំពតមានបើកកិច្ចប្រជុំគណៈកម្មការជាតិរៀបចំពិធីបុណ្យសមុទ្រលើកទី៨ ជុំទី២នៅខេត្តកំពត។
កិច្ចប្រជុំនេះ ស្ថិតក្រោមអធិបតីភាពឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មការអន្តរក្រសួង និងមានការអញ្ជើញចូលរួមពីសំណាក់លោក ជាវ តាយ អភិបាលនៃគណៈអភិបាលខេត្តកំពត លោក លោកស្រីប្រធាន អនុប្រធាន និងតំណាងរបស់អនុគណៈកម្មការអន្តរក្រសួង ព្រមទាំងលោក លោកស្រីប្រតិភូអន្តរក្រសួង និងមន្ត្រីពាក់ព័ន្ធទាំងអស់ផងដែរ។
ក្នុងពិធីបុណ្យសមុទ្រនៅខេត្តកំពត នឹងប្រព្រឹត្តិទៅនៅទី២០ ដល់ថ្ងៃទី២៣ ខែធ្នូ ឆ្នាំ២០១៩ មានការចូលរួមពីភ្ញៀវជាតិ និងអន្តរជាតិ ដោយក្នុងពិធីនេះមានរៀបចំជាលក្ខណៈខ្នាតអន្តរជាតិ មានការសំដែងសិល្បៈពីសិល្បៈករប្រាំប្រទេស ចិន ឥណ្ឌា ថៃ ឡាវ និងវៀតណាម និងមានរៀបចំស្តង់ពិពរណ៍ចំនួន៣៧០ស្តង់ សម្រាប់ផលិតជាតិ និងអន្តរជាតិ។
ក្រោយពីស្តាប់របាយការណ៍លទ្ធផលការងារដែលបានអនុវត្ត និងត្រៀមធ្វើសកម្មភាពរបស់អនុគណៈកម្មការអន្តរក្រសួង នីមួយៗ លោកប្រធានគណៈកម្មការ បានកោតសរសើរចំពោះអនុគណៈកម្មការទាំងអស់ដែលបានខិតខំបំពេញតាមគម្រោងផែនការរៀងៗខ្លួន ហើយសូមបន្តអនុវត្តការងារដែលនៅសេសសល់ទាំងអស់ឱ្យស្របតាមផែនការរួមដែលបានគ្រោងទុក។
នាឱកាសបន្ទាប់ពីបញ្ចប់កិច្ចប្រជុំនោះដែរ លោក ជាវ តាយ អភិបាលនៃគណៈអភិបាលខេត្តកំពត បានបន្តទទួលអញ្ជើញឯកឧត្តមបណ្ឌិត ថោង ខុន ប្រធានគណៈកម្មការអន្តរក្រសួង និងគណៈប្រតិភូចុះពិនិត្យផ្ទាល់នៅទីតាំងសំខាន់ៗសម្រាប់រៀបចំពិធីស្វាគមន៍បុណ្យសមុទ្រលើកទី៨ជុំទី២របស់ខេត្តកំពតផងដែរ៕
