(ខេត្តកំពត)៖ ពិធីបុណ្យសមុទ្រកាន់តែគៀកជិតចូលមកដល់ហើយ ដែលខេត្តកំពតត្រៀមធ្វើជាម្ចាស់ផ្ទះសម្រាប់លើកទី៨ជុំទី ២នៅចុងឆ្នាំ២០១៩នេះ។ ដូច្នេះដើម្បីធ្វើឱ្យភាពប្រសើរឡើង នូវសណ្ដាប់ធ្នាប់សាធារណៈរួមនិង សោភ័ណភាព ការធ្វើអនាម័យ សម្អាតបរិស្ថានតាមដងផ្លូវក៏ដូចសួនសាធារណៈក្នុងក្រុងកំពត សំដៅដល់ការធានាបាននូវសុខមាលភាពសាធារណៈ និងភាពទាក់ទាញភ្ញៀវទេសចរណ៍ជាតិ អន្តរជាតិ ព្រមទាំង ការរៀបចំនូវព្រឹត្តិការណ៍ទេសចរណ៍ធំៗប្រចាំឆ្នាំរបស់ខេត្ត ប្រកបដោយភាពជោគជ័យផងដែរនោះ នៅព្រឹកថ្ងៃទី១២ ខែធ្នូឆ្នាំ២០១៩ លោក ជាវ តាយ អភិបាល នៃគណៈអភិបាលខេត្តកំពត បានដឹកនាំមន្ត្រីពាក់ព័ន្ធនិងអាជ្ញាធរមូលដ្ឋានក្រុង សង្កាត់ ចុះពិនិត្យលទ្ធផលនៃការអនុវត្តការងារជាក់ស្ដែង ព្រមទាំងជំរុញដាក់វិធានការណ៍ពន្លឿនការអនុវត្តបន្តនៅតាមដងផ្លូវនិងសួនសាធារណៈសំខាន់ៗក្នុងសង្កាត់នីមួយៗនៃក្រុងកំពត។
លោកអភិបាលខេត្តក៏បានលើកឡើងថា ដោយមើលឃើញរយៈពេលកន្លងមកទាំងរដ្ឋបាលខេត្ត រដ្ឋបាលក្រុង សង្កាត់ និងមន្ទីរអង្គភាពជុំវិញខេត្តតែងតែបានចូលរួមសហការអនុវត្តយ៉ាងសស្រាក់សស្រាំនូវផែនការនៃយុទ្ធនាការរៀបចំសោភ័ណភាព សណ្ដាប់ធ្នាប់សាធារណៈ និងសម្អាតអនាម័យ បរិស្ថានក្នុងក្រុងកំពតដើម្បីត្រៀមខ្លួនធ្វើជាម្ចាស់ផ្ទះរៀបចំនូវព្រឹត្តិការណ៍ទេសចរណ៍ដ៏ធំមួយនេះដែលនឹងប្រព្រឹត្តទៅនាចុងឆ្នាំ២០១៩ នេះ។
ដូច្នេះដោយមើលឃើញនៅភាពខ្វះចន្លោះសេសសល់មួយចំនួននៅមិនទាន់មានភាពល្អប្រសើរនៅឡើយ ហើយការងារទាំងអស់នេះគឺត្រូវការទាមទារឱ្យអាជ្ញាធរក្រុងសង្កាត់និងមន្ទីរអង្គភាពជំនាញពាក់ព័ន្ធត្រូវបង្កើនល្បឿនសហការគ្នា ជម្រុញឲ្យបានលឿនដើម្បីធ្វើយ៉ាងណាឲ្យការងារដែលនៅសេសសល់ទាំងនេះ មានភាពល្អប្រសើរឡើងមួយកម្រិតទៀត ហើយចៅសង្កាត់នីមួយៗ និងអភិបាលក្រុង ព្រមទាំងមន្ទីរជំនាញពាក់ព័ន្ធត្រូវតែជំរុញអនុវត្តការងារនៅសេសសល់ទាំងនោះរួមមានដូចជា ការរៀបចំសណ្ដាប់ធ្នាប់នៃការចតរថយន្តធំៗលើដងផ្លូវសំខាន់ៗទៅតាមរបៀប និងការហាមឃាត់មិនឱ្យមានការសង់តូបលក់ដូរ ឬទុកដាក់ឥវ៉ាន់តាមចិញ្ចើមផ្លូវឬដងផ្លូវ ការទប់ស្កាត់និងណែនាំឱ្យម្ចាស់ការដ្ឋានសំណង់ឬអ្នកលក់សំណង់ ទុកដាក់សម្ភារៈឱ្យបានត្រឹមត្រូវក្នុងការដ្ឋានឬទីតាំងលក់ជៀសវាងដាក់លើផ្លូវឬចិញ្ចើមផ្លូវនិងការដាក់គម្របលូ ឱ្យធានាបាននូវគុណភាព សុវត្ថិភាព ស្អាតនៅតាមបណ្តោយដងផ្លូវរួមនិងបញ្ហាការសម្អាតស្មៅនិងព្រៃតាមដងផ្លូវ បញ្ហាការទុកដាក់ធុងសំរាម បញ្ហាដីឡូតិ៍ដែលមានសំរាមព្រៃនិងស្មៅ បញ្ហាលូទឹក បញ្ហាផ្លាកយីហោរួមនិងបញ្ហាមួយចំនួនទៀតដែលធ្វើឲ្យប៉ះពាល់និងខូចខាតនូវសណ្ដាប់ធ្នាប់របៀបរៀបរយនិងសុខភាពក្នុងក្រុងពិសេសតាមដងផ្លូវជាតិលេខ៣ ដែលជាបញ្ហាសំខាន់ត្រូវតែយកចិត្តទុកដាក់បំផុត។
ជាមួយេះ លោក ជាវ តាយ ក៏បានថ្លែងអំណរគុណកោតសសើរដល់អាជ្ញាធរក្រុងសង្កាត់ រួមនិងមន្ទីរជំនាញពាក់ព័ន្ធដែលតែងតែមានការយកចិត្តទុកដាក់ទទួលខុសត្រូវខ្ពស់ចំពោះការចូលរួមសហការគ្នាបានល្អក្នុងយុទ្ធនាការកែលម្អសោភណ្ឌភាពសណ្ដាប់ធ្នាប់និងអនាម័យបរិស្ថានតាមដងផ្លូវក្នុងក្រុងកំពតកន្លងមកព្រោះការងារទាំងឡាយទទួលបានជោគជ័យ លុះត្រាតែមានការចូលរួមទាំងអស់គ្នាពីសំណាក់អាជ្ញាធរមន្ទីរជំនាញនិងប្រជាពលរដ្ឋ ។
សូមបញ្ជាក់ដែរថា៖ខេត្តកំពតនឹងត្រូវរៀបចំធ្វើជាម្ចាស់ផ្ទះបុណ្យសមុទ្រជុំទី២លើកទី៨នៅថ្ងៃទី២០ដល់ថ្ងៃទី២២ ខែធ្នូ ឆ្នាំ២០១៩ ខាងមុខនេះ។ ដូច្នេះ ទាំងថ្នាក់ជាតិនិងអាជ្ញាធរគ្រប់លំដាប់ថ្នាក់មន្ទីរអង្គភាពជំនាញក្នុងខេត្ត ពិសេសរដ្ឋបាលខេត្តនិងក្រុងកំពតតែងបាននិងកំពុងគិតគូរយកចិត្តទុកដាក់ជាប្រចាំ លើបញ្ហាសណ្ដាប់ធ្នាប់ សោភ័ណភាព និងអនាម័យបរិស្ថានក្រុងដើម្បីអោយការប្រព្រឹត្តទទួលបានលទ្ធផលជោគជ័យយ៉ាងប្រសើរ៕ សេង ណារិទ្ធ
