ខេត្តព្រះវិហារ ៖ មានសេចក្តីរាយការណ៍មកថា បទល្មើសព្រៃឈើកើតឡើងពេញបន្ទុក ដោយក្រុមឈ្មួញប្រព្រឹត្តបទល្មើស និងបំផ្លិចបំផ្លាញធនធានធម្មជាតិ ផលអនុផលព្រៃឈើខ្ទិចខ្ទីគ្មានសល់ ក្នុងដែនជម្រកសត្វព្រៃព្រះរកា និងព្រៃឡង់ ស្ទើរបាត់បង់ទាំងស្រុង ក៍ព្រោះតែក្រុមឈ្មួញទុច្ចរិតឃុបឃិតត្រូវរ៉ូវត្រូវដងត្រូវផ្លែជាមួយក្រុមឈ្មួញបំផ្លិចបំផ្លិចព្រៃឈើខុសច្បាប់ ។
ពលរដ្ឋស្ទើរអស់សេចក្ដីសង្ឃឹមនិងជំនឿទុកចិត្តចំពោះមន្ត្រីអាជ្ញាធរមានសមត្ថកិច្ចនិងជំនាញពាក់ព័ន្ធក្នុងស្រុកខេត្តមួយចំនួន ដែលមិនបានគោរពនិងបំពេញតួនាទីរបស់ខ្លួន ដែលជាមន្ត្រីជំនាញបង្ក្រាបបទល្មើសព្រៃឈើបែរជាចូលដៃចូលជើងឃុបឃិតជាមួយក្រុមឈ្មួញឧក្រិដ្ឋកម្មបំផ្លិចបំផ្លាញព្រៃឈើខុសច្បាប់ទៅវិញ។
ជាក់ស្ដែងនៅថ្ងៃទី០៥ ខែកុម្ភៈ ឆ្នាំ២០២២ ឈ្មួញឈើឈ្មោះលោក សិច បានបញ្ជាកូនចៅឲ្យធ្វើសកម្មភាពលើកឈើដាក់លើរថយន្តវេអង្គខ្នាតយក្សមួយគ្រឿង ដែលស្ថិតនៅភូមិគោកតាមែន ស្រុកត្បែងមានជ័យ ខេត្តព្រះវិហារ តើមន្ត្រីជំនាញពាក់ព័ន្ធមានបានដឹងដែរឬទេ? ឬដឹងដែរ? តែគួរឱ្យសោកស្ដាយ ប្រហែលត្រូវបានលេបថ្នាំប៉ារ៉ាសេតាម៉ុលទេដឹង ? បានជាធ្វើអោយស្ពឹកដៃស្ពឹកជើងងងឹតភ្នែកងើបដើរមិនរួចធ្វើឲ្យសកម្មភាពដឹកជញ្ជូនបទល្មើសព្រៃឈើទៅដោយរលូនបែបនេះ ។
តើលោក នួន សុខុម នាយខណ្ឌរដ្ឋបាលព្រៃឈើនិងលោក ពឹង ទ្រីដា ប្រធានមន្ទីរកសិកម្មរុក្ខាប្រម៉ាញ់និងនេសាទខេត្តព្រះវិហារមានសមត្ថភាព ឬអសមត្ថភាពក្នុងការបង្ក្រាបក្រុមឈ្មួញប្រព្រឹត្តបទល្មើសឈើខុសច្បាប់ក្នុងទឹកដីរបស់ខ្លួនបានឬយ៉ាង ? ជាពិសេស មេឈ្មួញឧក្រិដ្ឋកម្មបំផ្លិចបំផ្លាញព្រៃឈើខុសច្បាប់ឈ្មោះសិចល្បីថាមានអំណាចនិងឥទ្ធិពលខ្លាំង។
សូម ឯកឧត្ដម វេង សាខុន រដ្ឋមន្ត្រីក្រសួងកសិកម្មរុក្ខាប្រម៉ាញ់ និងនេសាទ មេត្តាដាក់ការស៊ើបអង្គេត និងបង្ក្រាបក្រុមឈ្មួញប្រព្រឹត្តបទល្មើសឈើតាមគោលការច្បាប់ស្ដីអំពីការបង្ការទប់ស្កាត់បង្ក្រាបបទល្មើសធនធានធម្មជាតិផលអនុផលព្រៃឈើផងទាន ? ព្រោះមន្ត្រីថ្នាក់ក្រោមរបស់ឯកឧត្ដម ដូចជាមានភាពឆក់ល្វែងក្នុងការបង្ការទប់ស្កាត់និងបង្ក្រាបបទល្មើសដែលកើតមានឡើង។ហើយឯកឧត្ដមដាក់កូនចៅអោយមកបង្ក្រាបបទល្មើសឫដាក់មកអោយចូលដៃចូលជើងឃុបឃិតជាមួយក្រុមឈ្មួញរកស៊ីបទល្មើសឈើខុសច្បាប់.?
បើយោងតាមប្រសាសន៍កន្លងមកនាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និងជាប្រធានគណៈកម្មការជាតិ ដើម្បីទប់ស្កាត់និងបង្ក្រាបបទល្មើសធនធានធម្មជាតិបានប្រកាសដាក់ជីវិតរបស់ខ្លួនជាមួយនឹងប្រតិបត្តិការបង្ក្រាបបទល្មើសព្រៃឈើនៅក្នុងប្រទេសនាដំណាក់កាលចុងក្រោយនេះឲ្យខានតែបាន ដើម្បីទុកជូនក្មេងជំនាន់ក្រោយ និងបានដាក់បទបញ្ជាដកគ្រវាតចោល លើមន្ដ្រីអាវុធហត្ថទាំងឡាយណាទោះមានបុណ្យស័ក្ដិខ្ពស់ប៉ុណ្ណាបើសិនរកឃើញនៅជាប់ពាក់ព័ន្ធបទល្មើសជាមួយក្រុមឈ្មួញ។
ដូច្នេះលោក ប្រាក់ សុវណ្ណ អភិបាលខេត្តព្រះវិហារក៏ដូចជាថ្នាក់ដឹកនាំក្រសួងកសិកម្មនិងប្រធានរដ្ឋបាលព្រៃឈើនៃក្រសួងកសិកម្មមិនគួរមើលរំលងភាពអសកម្មរបស់ប្រធានមន្ទីរកសិកម្មខេត្តព្រះវិហារ និងខណ្ឌរដ្ឋបាលព្រៃឈើខេត្តព្រះវិហារនោះទេ ៕
