(ខេត្តកំពត)៖ នៅព្រឹកថ្ងៃសៅរិ៍ ៣រោច ខែមិគសិរ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១៤ ខែធ្នូ ឆ្នាំ២០១៩ នេះ លោក ជាវ តាយ អភិបាលនៃគណៈអភិបាលខេត្តកំពតចូលរួមក្នុងកិច្ចប្រជុំត្រួតពិនិត្យផែនការការពារ ដំណើរជាអធិបតីដ៍ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេច កិត្តិព្រឹទ្ធបណ្ឌិត ប៊ុន រ៉ានីហ៊ុនសែន នាឱកាសបុណ្យសមុទ្រ ក្រោមអធិបតីភាព នាយឧត្តមសេនីយ៍យូ ស៊ុនឡុង រដ្ឋមន្ត្រីប្រតិភូអមនាយករដ្ឋមន្ត្រី។
កិច្ចប្រជុំនេះក៏មានការចូលរួមពីមន្ត្រីពាក់ព័ន្ធ និងកងកម្លាំងប្រដាប់អាវុធទាំងបីប្រភេទ ដើម្បីត្រៀមលក្ខណៈក្នុងកិច្វការពារសុវត្ថិភាពក្នុងពិធីបុណ្យសមុទ្រឆ្នាំ២០១៩នេះ។
ក្នុងកិច្ចប្រជុំព្រឹកនេះ នាយឧត្តមសេនីយ៍ យូ ស៊ុនឡុង រដ្ឋមន្ត្រី ប្រតភូអមនាយករដ្ឋមន្ត្រី បានបញ្ជាក់ថាពិធីបុណ្យសមុទ្រលើកទី៨ជុំទី២នៅខេត្តកំពតនឹងចាប់ដំណើរការប្រព្រឹត្តទៅចាប់ពីថ្ងៃទី២០ ដល់ថ្ងៃទី២២ ខែធ្នូឆ្នាំ ២០១៩ ក្នុងរយៈពេល ៣ ថ្ងៃនេះគឺនឹងយកថ្ងៃទី២១ បើកអង្គពិធីជាផ្លូវការក្រោមអធិបតីភាពដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានិងសម្ដេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន។
នាយឧត្តមសេនីយ៍ យូ ស៊ុនឡុង ក៏បានឱ្យដឹង ដែរថា ការត្រៀមលក្ខណៈរៀបចំពិធីបើកនូវព្រឹត្តិការណ៍បុណ្យសមុទ្ររហូតមកដល់ពេលនេះសង្កេតឃើញថាទីតាំងកន្លែងនៃការរៀបចំពិធីមានលក្ខណៈប្រសើរប៉ុន្តែនៅសល់តែការជួបប្រជុំគ្នាម្តងទៀត ដើម្បីពិភាក្សាលម្អិតពីផែនការរួមឆ្ពោះទៅកាន់ព្រឹត្តិការណ៍បុណ្យសមុទ្រតែប៉ុណ្ណោះ ពិសេសការត្រៀមលក្ខណៈដើម្បីស្វាគមន៍ និងការការពារសន្តិសុខសណ្ដាប់ធ្នាប់សុវត្ថិភាពជូនប្រមុខរាជរដ្ឋាភិបាលក៏ដូចជាថ្នាក់ដឹកនាំជាតិ អន្តរជាតិមកកំសាន្តក្នុងព្រឹត្តិការណ៍នៃពិធីបុណ្យសមុទ្រលើកទី៨ ជុំទី២ នៅខេត្តកំពតឲ្យបានល្អនិងទទួលបានជោគជ័យដ៏ត្រចះត្រចង់៕ សេង ណារិទ្ធ
