(ខេត្តក្រចេះ)÷ នៅយប់ថ្ងៃទី៨ ខែកុម្ភៈឆ្នាំ ២០២២ វេលាម៉ោង ០១ និង ២៣នាទីយប់ មាន សកម្មភាពដឹកជញ្ជូនបទល្មើសផលអនុផលព្រៃឈើនៅតែបន្ត ដូចភ្លៀងរលឹម ជារៀងរាល់យប់នៅក្នុងភូមិសាស្ត្រស្រុកព្រែកប្រសព្វនៃទឹកដីខេត្តក្រចេះ។
ប្រភពច្បាស់ការណ៍បានបង្ហើបឲ្យ អ្នកសារព៍ត៌មានយើង ដឹងនៅយប់ថ្ងៃទី៨ ខែកុម្ភៈ ឆ្នាំ ២០២២ នេះថា សកម្មភាពដឹកជញ្ជូនបទល្មើសព្រៃឈើរបស់មេឈ្មួញ ឈ្មោះសម្បត្តិ ដែលជាអធិរាជឈ្មួញដុះស្លែ ប្រចាំស្រុកព្រែកប្រសព្វ នៅតែបន្តសកម្មភាពជារៀងរាល់ថ្ងៃរាល់យប់ ដោយពុំមានផលរំខានពីសំណាក់មន្ត្រីសមត្ថកិច្ចដែលពាក់ព័ន្ធនៅក្នុងស្រុកព្រែកប្រសព្វនោះឡើយ។
ប្រភពដដែលបានបន្តទៀតថា ឈ្មួញឈ្មោះ សម្បត្តិ ម្នាក់នេះ គាត់អាចធ្វើចរាចរណ៍ទៅបានអាស្រ័យទៅដោយការបើកភ្លើងខៀវពីសំណាក់សមត្ថកិច្ចឈរជើងនៅក្នុងទឹកដីស្រុកព្រែកប្រសព្វនេះផ្ទាល់តែម្ដង ពីព្រោះកន្លងមកសមត្ថកិច្ចធ្លាប់បានទទួលសេចក្តីរាយការណ៍ពីបងប្អូនអ្នកសារព័ត៌មានដើម្បីសុំសហការធ្វើការទប់ស្កាត់និងបង្ក្រាបបទល្មើសធនធានធម្មជាតិជាពិសេសគឺឈ្មោះសម្បត្តិនេះដែរប៉ុន្តែមកទល់នឹងសព្វថ្ងៃនេះ ឈ្មួញមួយរូបនេះនៅតែបន្តដឹកជញ្ជូនបទល្មើសដដែល នេះហើយជាមូលហេតុដែលមហាជនរិះគន់ចំៗទៅលើមន្ត្រីមានសមត្ថកិច្ចមួយចំនួនដែលអសមត្ថភាព ក្នុងការទប់ស្កាត់និងបង្ក្រាប រាល់បទល្មើសធនធានធម្មជាតិ ដែលដឹកឆ្លងកាត់ទីតាំងឈរជើងរបស់ពួកគាត់នាពេលកន្លងមក ។
ជាក់ស្តែងនៅថ្ងៃទី០៨ខែគុម្ភះ ឆ្នាំ២០២២ វេលាម៉ោង០១.២៣នាទី គឺមានឡានដឹកឈើរបស់លោកសម្បត្តិនេះធ្វើការដឹកចេញពីឃុំវឌ្ឍនះឆ្លងកាត់ ស្រុកព្រែកប្រសព្វខេត្តក្រចេះឆ្ពោះទៅខេត្តកំពង់ចាមដើម្បីចែកចែយបន្តទៅលក់នៅខេត្តនានា។
ប្រជាពលរដ្ឋកំពុងមានការងឿងឆ្ងល់ថាតើហេតុអ្វីបានជាមន្ត្រីជំនាញលោកមិនបង្ក្រាបបទល្មើសដែលដឹកជញ្ជូនរាល់ថ្ងៃនេះជាក់ស្តែងនោះគឺឡានរបស់លោកសម្បត្តិនេះតែម្តង ឬមួយក៏លោកសម្បត្តិនេះមានខ្សែជាអ្នកធំទើបដឹកឈើបានដូចរាល់ថ្ងៃនេះ មូលហេតុដែលប្រជាពលរដ្ឋ ដាក់សំណួរសួរបែបនេះនោះ ព្រោះលោកសម្បត្តិនេះ ក៏ធ្លាប់វាយអ្នកសារព័ត៌មានផងដែរ ហើយគេក៏តែងតែនិយាយតៗគ្នាថា ឡានដឹកឈើរបស់លោកសម្បត្តិគឺគ្មានអ្នកណាហ៊ានបង្ក្រាបឡើយ។
-ជាចុងក្រោយប្រជាពលរដ្ឋទទូចសំណូមពរដល់មន្ត្រីពាក់ព័ន្ធគ្រប់លំដាប់ថ្នាក់ក្នុងខេត្តក្រចេះមេត្តាត្រួតពិនិត្យទៅលើអាជ្ញាធរពាក់ព័ន្ធ ជាពិសេស សមត្ថកិច្ចដែលឈរជើងក្នុងស្រុកព្រែកប្រសព្វ ខេត្តក្រចេះ ដើម្បីធ្វើការទប់ស្កាត់និងបង្ក្រាប បទល្មើសធនធានធម្មជាតិដែលនៅសេសសល់បន្តិចបន្តួចនេះផងទាន៕
