(ខេត្តកំពត)៖ នៅសាលប្រជុំសាលាខេត្ត នាព្រឹកថ្ងៃចន្ទ ៥កើត ខែបុស្ស ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី៣០ ខែធ្នូ ឆ្នាំ២០១៩ រដ្ឋបាលខេត្តកំពតបានធ្វើពិធីប្រគល់Tablets ដល់រដ្ឋបាលឃុំសង្កាត់ទូទាំងខេត្តសម្រាប់អនុវត្តកម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ ព្រមទាំងកុមារអាយុក្រោម២ឆ្នាំ និងការកំណត់អត្តសញ្ញាណកម្មគ្រួសារក្រីក្រតាមការស្នើសុំ។
ពិធីនេះប្រព្រឹត្តទៅក្រោមអធិបតីភាព លោក ជាវ តាយ អភិបាលនៃគណៈអភិបាលខេត្តកំពត និងមានការអញ្ជើញចូលរួមពីសំណាក់ លោក លោកស្រី អភិបាលរងនៃគណៈអភិបាលខេត្ត ថ្នាក់ដឹកនាំមន្ទីរ អង្គភាព ព្រមទាំងមេឃុំចៅសង្កាត់ចំនួន២៥៣នាក់។
ផ្តាំផ្ញើក្នុងឱកាសនេះ លោក ជាវ តាយ អភិបាលនៃគណៈអភិបាលខេត្តកំពត បានមានប្រសាសន៍ថា គ្រប់មេឃុំចៅសង្កាត់ដែលមិនទាន់ចេះស្ទាត់ក្នុងការប្រើប្រាស់Tablets ត្រូវសិក្សាបន្ថែមព្រោះការងារកំណត់អត្តសញ្ញាណកម្មគ្រួសារក្រីក្រមិនអាចធ្វើដោយភាពមិនច្បាស់លាស់នោះឡើយ។
ជាមួយនេះ រដ្ឋបាលខេត្តនឹងជំរុញដល់មន្ត្រីនៃមន្ទីរផែនការ សហការជាមួយមន្ទីរសង្គមកិច្ច អតីតយុទ្ធជន និងយុវនីតិសម្បទា ចុះបង្រៀនតាមរយៈការប្រមូលផ្តុំនៅសាលាក្រុងស្រុកដើម្បីឱ្យកិច្ចការដ៏ចាំបាច់នេះមានភាពល្អប្រសើរ និងប្រកបដោយតម្លាភាព៕ សេង ណារិទ្ធ
