(ខេត្តកំពត)៖ គ្រោះថ្នាក់ចរាចរណ៍រវាងម៉ូតូនិងម៉ូតូ បណ្តាលឱ្យមនុស្ស៤នាក់រងរបួសធ្ងន់ ស្រាល ដោយករណីគ្រោះថ្នាក់ចរាចរណ៍នេះ ផ្តើមឡើងដោយសារម៉ូតូមួយគ្រឿងបត់ឆ្វេងមិនប្រយ័ត្ន ទើបម៉ូតូមួយគ្រឿងទៀតមកពីក្រោយគេចមិនទាន់ក៏បុកគ្នាប្រាវតែម្តង។
យោងតាមប្រភពពីសមត្ថកិច្ចបានឱ្យដឹងថា គ្រោះថ្នាក់នេះបានកើតឡើងកាលពីវេលាម៉ោង៧និង៤៥នាទីព្រឹក ថ្ងៃទី០៤ ខែកុម្ភៈ ឆ្នាំ២០២០ ត្រង់ចំណុចមុខរោងចក្រពូចិន ស្ថិតក្នុងភូមិកណ្តាលទួល ឃុំកំពង់ត្រាចខាងលិច ស្រុកកំពង់ត្រាច ខេត្តកំពត រវាងម៉ូតូហុងដាឌ្រឹម០១៣ និងឌ្រឹម០១៥ ក្នុងទិសដៅស្របគ្នាពីកើតទៅលិច។
ប្រភពពីសមត្ថកិច្ចដដែលបានបញ្ជាក់ទៀតថា មុនពេលកើតហេតុភាគីបើកម៉ូខាងមុខបានបត់ឆ្វេងឆ្លងផ្លូវដោយខ្វះការប្រុងប្រយ័ត្ន ទើបម៉ូតូដែលបើកបរពីក្រោយក្នុងទិសស្របគ្នាគេចមិនទាន់ក៏បុកចំទទឹងម៉ូតូ បណ្តាលឱ្យម្ចាស់ម៉ូតូសេ១២៥ សេរីឆ្នាំ២០១៥រងរបួសធ្ងន់តែម្តង។
សមត្ថកិច្ចបានឱ្យដឹងទៀតថា ជនរងគ្រោះដែលរងរបួសធ្ងន់ឈ្មោះ ផូង អ៊ា ភេទស្រី អាយុ៥១ឆ្នាំរស់នៅភូមិភ្នំសាឡី ឃុំកំពង់ត្រាចខាងលិច ស្រុកកំពង់ត្រាច ខេត្តកំពត បើកបរម៉ូតូសេ១២៥ ពណ៌ខ្មៅ សេរី០១៥ ពាក់ស្លាកលេខ កំពត 1J-4175។ចំណែកភាគីម្ខាងទៀត ជិះម៉ូតូម៉ាក សេ១២៥ សេរី០១៣ ពណ៌ខ្មៅ ពាក់ស្លាកលេខ កំពត 1I-6975 ជិះគ្នា៣នាក់ បើកបរដោយឈ្មោះ ទេព ភ័ក្រ ភេទប្រុស អាយ្៣០ឆ្នាំ និងអ្នករួមដំណើរ២នាក់ទៀត ទី១-ឈ្មោះ ឈាង ចន្នី ភេទស្រី អាយុ២៧ឆ្នាំត្រូវជាប្រពន្ធ ទី២-, ឈ្មោះ លេង ធាន ធាន ភេទប្រុស អាយុ៩ឆ្នាំ (ជាកូន)។ទាំងបីនាក់រស់នៅភូមិភ្នំខ្យង ឃុំប្រាសាទភ្នំខ្យង ស្រុកកំពង់ត្រាច ខេត្តកំពត។
ក្រោយពេលវាស់វែងមធ្យោបាយទាំងពីរគ្រឿងត្រូវបានសមត្ថកិច្ចយកមករក្សាទុកនៅក្នុងអធិការដ្ឋាននគរបាលស្រុករង់ចាំធ្វើការដោះស្រាយនៅពេលក្រោយ។ដោយឡែកអ្នករងរបួសត្រូវសាច់ញាតិដឹកទៅសង្គ្រោះនៅឯមន្ទីរពេទ្យបង្អែកស្រុកកំពង់ត្រាច៕
