(ខេត្តកែប)៖ នៅរសៀលថ្ងៃទី២៤ ខែកុម្ភៈ ឆ្នាំ២០២០ រដ្ឋបាលខេត្តកែប បានរៀបចំកិច្ចប្រជុំបូកសរុបលទ្ធផលការងារឆ្នាំ២០១៩ និងលើកទិសដៅសម្រាប់អនុវត្តបន្តឆ្នាំ២០២០ របស់គណៈកម្មការសមាគមនារីកម្ពុជា ដើម្បីសន្តិភាព និងអភិវឌ្ឍន៍ក្រុមចលនាស្ត្រីខេត្តកែប ក្រោមអធិបតីភាព លោកស្រី មាន សំអាន ប្រធានគណៈកម្មការទី៨ ព្រឹទ្ធភា ប្រធានក្រុមសមាជិកព្រឹទ្ធសភា ប្រធានគណៈចលនាស្ត្រី និងជាអនុប្រធានគណៈកម្មាធិការសមាគមនារីកម្ពុជា ដើម្បីសន្តិភាព និងអភិវឌ្ឍន៍។
កិច្ចប្រជុំនេះ ក៏ស្ថិតក្រោមវត្តមាន លោក កែន សត្ថា អភិបាល នៃគណៈអភិបាលខេត្តកែប និងលោក សំ សារីន សមាជិកគណៈកម្មាធិការកណ្តាលគណបក្សប្រជាជនកម្ពុជា និងលោក លោកស្រី ជាអភិបាលរងខេត្ត ព្រមទាំងអស់លោក ជាថ្នាក់ដឹកនាំនៃមន្ទីរអង្គភាពទូទាំងខេត្ត កម្លាំងប្រដាប់អាវុធទាំងបីប្រភេទ និងមន្ត្រីរាជការចំណុះសាលាខេត្តកែបទាំងមូល។
យោងតាមរបាយការណ៍របស់លោកស្រី អ៊ុល ភារុណ បានឱ្យដឹងថា សាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្តកែប និងក្រុមចលនាស្ត្រីគ្រប់លំដាប់ថ្នាក់បានប្រមូលផ្តុំកម្លាំងធនធាន ថវិកា និងសម្ភារៈ មធ្យោបាយ ដើម្បីធ្វើការងារបក្ស ការងារសង្គម ការងារអភិវឌ្ឍន៍សហគមន៍នៅមុខសញ្ញាដែលត្រូវទទួលខុសត្រូវ ដោយមិនខ្លាចការលំបាកនឿយហត់ដោយបានរួមចំណែកក្នុងការអភិវឌ្ឍន៍ខេត្ត បានជះឥទ្ធិពលដល់ភ្ញៀវទេសចរណ៍ឱ្យចូលមកសម្រាក លំហែ កំសាន្តកាន់តែច្រើនឡើង ដែលបានបង្កើនមុខរបរ បង្កើនប្រាក់ចំណូល រួមចំណែកកាត់បន្ថយភាពក្រីក្ររបស់ប្រជាជនក្នុងខេត្ត ពី១៤,៣៧%ក្នុងឆ្នាំ២០១៥ មកត្រឹម៤,៤៣% ក្នុងឆ្នាំ២០១៩។
លោក កែន សត្ថា អភិបាលខេត្ត សមាជិកគណៈកសមាជិកគណៈកម្មាធិការកណ្តាល នៃគណបក្សប្រជាជនកម្ពុជា និងជាប្រធានគណៈកម្មាធិការគណបក្សប្រជាជនកម្ពុជាខេត្តកែប បានមានប្រសាសន៍ថា ក្រោមម្លប់នៃសុខសន្តិភាព ផ្តើមចេញពីថ្ងៃជ័យជម្នះ ៧មករា និងគោលនយោបាយ ឈ្នះ!ឈ្នះ! របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា រដ្ឋបាលខេត្តបាននិងកំពុងយកចិត្តទុកដាក់ក្នុងការអភិវឌ្ឍលើគ្រប់វិស័យ ស្របតាមកម្មវិធីនយោបាយនិងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាល ដោយរដ្ឋបាលខេត្តបានបន្តខិតខំកសាង ស្តារ និងជួសជុលឡើងវិញនូវហេដ្ឋារចនាសម្ព័ន្ធរួមមាន៖ ផ្លូវអ៊ុតក្រាលកៅស៊ូ AC,DBST ផ្លូវប្របមាត់សមុទ្រ ការពង្រីកផ្លូវជាតិលេខ៣៣អា ផ្លូវលំដីស ផ្លូវក្រាលក្រួសក្រហម និងចាក់ខ្សាច់បន្ថែមថ្មីនៅឆ្នេរលេងទឹក ការរៀបចំប្រព័ន្ធរំដោះទឹកភ្លៀង ការធ្វើអាងប្រព្រឹត្តិកម្មចម្រោះទឹកកខ្វក់នៅឆ្នេរលេងទឹក និងនៅផ្សារក្តាម ព្រមជាមួយទីលានចាក់សំរាម(គម្រោង(ADB) ការរៀបចំសួនច្បារសាធារណៈ ដាក់បង្គោលភ្លើងបំភ្លឺតាមតាមដងផ្លូវ៣៣អា ដឹកនាំបំផុសអនាម័យ សម្អាតបរិស្ថាន លើកកម្ពស់សោភ័ណភាពសាធារណៈ ដើម្បីធ្វើឱ្យខេត្តមានភាពស្អាត និងស្រស់បំព្រងគ្រប់រដូវកាល។
ក្នុងឱកាសនោះដែរ លោកស្រី មាន សំអាន ប្រធានគណៈកម្មការទី៨ នៃព្រឹទ្ធភា ក៏បានថ្លែងការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែង របស់រដ្ឋបាលខេត្តកែប ពិសេសថ្នាក់ដឹកនាំគ្រប់លំដាប់ថ្នាក់ គ្រប់មន្ទីរអង្គភាព ដែលជានិច្ចកាលបានចូលរួមសហការគ្នាជាធ្លុងមួយ អនុវត្តការងារបានល្អប្រសើរ។ជាមួយគ្នានេះ លោកស្រីក៏បានជំរុញដល់ក្រុមចលនាស្ត្រីនៅខេត្តកែប ត្រូវខិតខំពុះពារដើម្បីបន្តអនុវត្តការងារនៅឆ្នាំខាងមុខជាបន្តបន្ទាប់ទៀតឱ្យកាន់តែមានប្រសិទ្ធភាពខ្ពស់៕ សេង ណារិទ្ធ
