(ខេត្តកែប)៖ ព្រឹកថ្ងៃទី១០ ខែមេសា ឆ្នាំ២០២០ នេះ លោក កែន សត្ថា អភិបាល នៃគណអភិបាលខេត្ត កែប បានអញ្ចើញចុះសំណេះសំណាលសួរសុខទុក្ខមន្ត្រីសុខាភិបាល នៃមន្ទីរពេទ្យខេត្តកែប និងអ្នកជំងឺកូវីដ១៩ ដែលត្រូវបានគ្រូពេទ្យព្យាបាលជាសះស្បើយ ហើយត្រូវអនុញ្ញាតឱ្យវិលទៅលំនៅដ្ឋានវិញ។
ក្នុងឱកាសនោះ លោក កែន សត្ថា អភិបាលខេត្តកែប បានសំដែងក្តីរីករាយ និងសូមកោតសរសើរដល់ក្រុមគ្រូពេទ្យដែលបានយកចិត្តទុកដាក់ ព្យាបាលអ្នកជំងឺ កូវីដ ១៩ ឱ្យបានជាសះស្បើយវិញ។
ជាមួយនេះ លោកអភិបាលខេត្តកែប ក៏បានផ្តាំផ្ញើ នៅពេលវិលត្រឡប់ទៅលំនៅដ្ឋានវិញ សូមឱ្យបន្តអនុវត្តតាមការណែនាំរបស់ក្រុមគ្រូពេទ្យ ឱ្យបានទៀងទាត់ និងហ្មត់ចត់ ពិសេសការថែទាំដោយខ្លួនឯង ដូចជាការហាត់ប្រាណ ការរក្សាអនាម័យឱ្យបានខ្ជាប់ខ្ជួន ដោយត្រូវលាងសម្អាតដៃនឹងសាប៊ូ អាលកុល និងទឹកសម្លាប់មេរោគ ដោយអនុវត្តតាមការណែនាំរបស់គ្រូពេទ្យនិងការផ្សព្វផ្សាយរបស់ក្រសួងសុខាភិបាល។
សូមបញ្ជាក់ថា ខេត្តកែប មានអ្នកជំងឺកូវីដ ១៩ ចំនួន៤នាក់ ដោយពេលនេះ៣នាក់ ត្រូវបានគ្រូពេទ្យព្យាបាលបានជាសះស្បេីយ ហើយក៏អនុញ្ញាតិឱ្យវិលទៅលំនៅដ្ឋានវិញហើយ។ ដោយឡែក អ្នកជម្ងឺ កូវីដ ១៩ ម្នាក់ទៀតដែលកំពុងព្យាបាល ក្រុមគ្រូពេទ្យបានបញ្ជាក់អះអាងថា នឹងអាចវិលត្រឡប់ទៅផ្ទះវិញនាពេលឆាប់ៗខាងមុខ ខណៈអ្នកជម្ងឺរូបនោះ បានធូរស្បើយប្រមាណ៩០ភាគរយទៅហើយ៕
