(ខេត្តកែប)៖ នៅព្រឹកថ្ងៃព្រហស្បតិ៍ ២កើត ខែពិសាខ ឆ្នាំជូត ទោស័ក ព.ស២៥៦៣ ត្រូវនឹងថ្ងៃទី២៣ ខែមេសា ឆ្នាំ២០២០ នេះ ព្រះគ្រូមហាបុទុម ផាត់ ធួក ញ្ញាណវុឌ្ឍោ ព្រះមេគណខេត្តកែប និងជាព្រះចៅអធិការ វត្តសត្ថាធម្មវិហារ នៃគណៈធម្មយុត្តិកនិកាយ បានជូននូវសម្ភារៈមួយចំនួន ដើម្បីរួមចំណែកក្នុងយុទ្ធនាការបង្ការ ទប់ស្កាត់នឹងជំងឺកូវីដ ១៩ នៅក្នុងខេត្តកែប។
សម្ភារៈនិងថវិកាដែលព្រះគ្រូមេគណខេត្តចូលរួមចំណែកមាន អង្ករ១០បាវ មី១៣កេះ បាឡុង០២កញ្ចប់ ទឹកត្រី១២យួរ និងបច្ច័យចំនួន ១,០០០,០០០រៀល (មួយលានរៀលគត់)។
ចំពោះថវិកានិងសម្ភារៈដែលផ្តល់ជូននាពេលនេះត្រូវបានប្រគល់ជូនទៅគណៈកម្មការប្រយុទ្ធប្រឆាំងនឹងកូវីដ១៩ ថ្នាក់ខេត្ត ដើម្បីទុកឧបត្ថម្ភដល់គ្រួសារដែលជួបការលំបាក តាមរយៈ លោក កែន សត្ថា អភិបាល នៃគណ:អភិបាលខេត្តកែប ហើយពិធីទទួលអំណោយពីព្រះគ្រូមេគណខេត្តនេះ បានប្រព្រឹត្តទៅនៅវត្តសត្ថាធម្មវិហារ(ហៅភ្នំពោន) ស្ថិតក្នុងភូមិភ្នំលាវ ឃុំពងទឹក ស្រុកដំណាក់ចង្អើរ ខេត្ត កែប ។
ឆ្លៀតក្នុងឱកាសនោះដែរ លោក កែន សត្ថា អភិបាល ខេត្ត លោកស្រី អ៊ុល ភីរុណ អភិបាលរងខេត្ត លោកស្រី អភិបាលស្រុកដំណាក់ចង្អេីរ និងសហការី បានអញ្ចេីញពិនិត្យមេីលសមិទ្ធិផលនានា ដែលបានស្ថាបនារួចរាល់ និងកំពង់សាងសង់ ស្ថិតក្នុងបរិវេណ វត្តសត្ថាធម្មវិហារ ហៅវត្តភ្នំពោន នេះផងដែរ៕
