(ខេត្តកំពត)៖ រដ្ឋបាលខេត្តកំពត និងក្រុមការងារនៃវេទិកាសម្ព័ន្ធភាពសង្គមស៊ីវិល(វ.ស.ស.) និងចូលរួមសហការពីក្រុមអ្នកជំនាញអង្គការសង្គ្រោះមេឃពណ៌ខៀវ (BSR) មកពីប្រទេសចិន និងក្រុមការងារកងសង្គ្រោះបន្ទាន់៧១១ នៃកងពលតូចលេខ៧០ និងមន្ត្រីនៃមន្ទីរសុខាភិបាលខេត្តកំពតនិងរដ្ឋបាលក្រុងកំពត កាលពីថ្ងៃទី២៩ ខែឧសភា ឆ្នាំ២០២០ បានចុះធ្វើយុទ្ធនាការបាញ់ថ្នាំសម្លាប់មេរោគ នៅទីតាំងគោលដៅសំខាន់ៗ តាមផ្សារ សាលារៀន វិហារឥស្លាម និងទីសួនសាធារណៈមួយចំនួនក្នុងក្រុងកំពត ដើម្បីបង្កើនការ ការពារទប់ស្កាត់ ការរីករាលដាលជំងឺឆ្លងកូវីដ ១៩។
ក្នុងឱកាសនោះលោក ភូ លិ អភិបាលរងខេត្តកំពត បានអំពាវនាវដល់ប្រជាពលរដ្ឋទូទៅ សូមកុំមានការភ្ញាក់ផ្អើល ក្នុងយុទ្ធនាការបាញ់ថ្នាំសម្លាប់មេរោគនេះ និងសូមបងប្អូនប្រជាពលរដ្ឋបន្តចូលរួមបង្កើនការ ការពារ ទប់ស្កាត់ជំងឺកូវីដ១៩នេះទាំងអស់គ្នា ដែលបច្ចុប្បន្នជំងឺដ៏កាចសាហាវនេះ នៅមិនទាន់បានធូរស្បើយនៅ ឡើយក្នុងទូទាំងពិភពលោកយើងនេះ ហើយប្រមុខរាជរដ្ឋាភិបាលកម្ពុជា ក៏នៅតែអំពាវនាវ សូមឱ្យបងប្អូនប្រជាពលរដ្ឋយទូទៅ ត្រូវប្រុងប្រយ័ត្ននិងបន្តបង្កើនការ ចូលរួមទប់ស្កាត់ការឆ្លងរីករាលដាលនៃជំងឺកូវីដ១៩នេះ មកលើកម្ពុជាយើងជាលើកទី២បន្តទៀតផងដែរ។
លទ្ធផលដែលក្រុមការងារបានចុះធ្វើយុទ្ធនាការបាញ់ថ្នាំ នាឱកាសនោះរួមមាន ផ្សាររាត្រីរង្វង់មូលទុរេន ផ្សាររាត្រីបូកគោ សាលាវិទ្យាល័យព្រះរាជសម្ភារ ព្រះវិហារឥស្លាមនិងទីសួនសាធារណៈមួយចំនួនទៀតក្នុងក្រុងកំពត។
ដោយឡែកនៅសៀលថ្ងៃដដែល ក្រុមការងារ
(វ.ស.ស.)នឹងក្រុម (BSR) និងកងសង្គ្រោះបន្ទាន់៧១១ក៏បានបន្ត ជួបធ្វើបទបង្ហាញ បង្កើនចំណេះដឹងជូនដល់មន្ត្រីសុខាភិបាល តំណាងមន្ទីរអង្គភាព អាជ្ញាធរក្រុង ស្រុក អង្គការដៃគូមួយចំនួនក្នុងខេត្ត អំពីរបៀបបង្កា ទប់ស្កាត់ជំងឺឆ្លងកូវិដ១៩ សម្រាប់ជួយដល់សហគមន៍មូលដ្ឋាន។
នៅឱកាសនោះដែរ លោក សាខុន ប៉ូរិន អគ្គរងនៃ(វ.ស.ស.) ក៏បានឲ្យដឹងដែរថារាល់សកម្មភាពក្នុងតួនាទីជាអ្នកសម្របសម្រួលរវាងសង្គមស៊ីវិល វ.ស.ស. តែងយកចិត្តទុកដាក់ខ្ពស់ក្នុងការកៀរគរជំនួយពីអង្គការសង្គមស៊ីវិលជាតិនិងអន្តរជាតិ ដើម្បីរួមចំណែកអភិវឌ្ឍសង្គមជាតិ សំដៅលើកកម្ពស់ជីវភាព និងសុខុមាលភាពប្រជាពលរដ្ឋ ស្របតាមគោលនយោបាយរបស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា គិតមកដល់ពេលនេះក្រុមអ្នកជំនាញការបានបាញ់ថ្នាំ តាមបណ្ដារាជធានី ខេត្តមួយចំនួន ដោយទទួលបានលទ្ធផលជោគជ័យល្អប្រសើរ ពាក់ព័ន្ធនឹងសកម្មភាព ការពារទប់ស្កាត់ជំងឺឆ្លងកូវិដ១៩ដ៏កាចសាហាវនេះ៕
