ខេត្តកំពង់ស្ពឺ៖ ដោយក្តីអាណិតអាសូរជាពន់ពេកនោះ នៅថ្ងៃទី២១ ខែមិថុនា ឆ្នាំ២០២៣នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ឱ្យមន្ត្រីក្រោមឱវាទ ចុះសួរសុខទុក្ខ និងនាំយកអំណោយមនុស្សធម៌ជាគ្រឿងឧបភោគបរិភោគ សម្ភារប្រើប្រាស់ និងថវិកា ជូនដល់ប្តីប្រពន្ធវ័យក្មេងទីទ័លក្រីក្រ១គ្រួសាររស់នៅក្នុងភូមិត្រពាំងថ្ម ឃុំស្រង់ ស្រុកគងពិសី ខេត្តកំពង់ស្ពឺ។ ប្តីមានឈ្មោះ ប៉ុន ពិសី អាយុ៣៣ឆ្នាំ មុខរបរជាជាងផ្សារដែក ដែលរងគ្រោះដោយខ្សែភ្លើងឆក់ធ្ងន់ធ្ងរពេលកំពុងផ្សារដែក បណ្តាលឱ្យដាច់ដៃទាំងសងខាង និងពឹងផ្អែកលើភរិយាឈ្មោះ សួន ចាន់រី អាយុ ២៦ឆ្នាំ មុខរបរជាកម្មការិនីរោងចក្រ ជាអ្នកមើលថែទាំ ហើយកំពុងមានផ្ទៃពោះ៧ខែ រស់នៅក្នុងខ្ទមកម្សត់ ដែលសង់លើដីឪពុកចែកឱ្យ ស្ថិតក្នុងភូមិត្រពាំងថ្ម ឃុំស្រង់ ស្រុកគងពិសី ខេត្តកំពង់ស្ពឺ។
ក្នុងឱកាសនោះ លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា បានពាំនាំនូវប្រសាសន៍របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញើសួរសុខទុក្ខ ក្តីអាណិតអាសូរ និងការគិតគូរពីជីវភាពរស់នៅរបស់គ្រួសារក្មួយៗ។
លោកជំទាវ បានបញ្ជាក់ថា ៖ «សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បន្ទាប់ពីបានឃេីញព័ត៌មានអំពីករណីដ៏លំបាកមួយនេះ សម្តេចកិត្តិព្រឹទ្ធបណ្ឌិត មានក្តីអាណិតអាសូរជាពន់ពេក ហើយបានចាត់ឱ្យក្រុមការងារចុះភ្លាមៗដើម្បីជួយសម្រាលការលំបាកក្នុងជីវភាព និងជាការលើកទឹកចិត្តឱ្យខិតខំតស៊ូប្រឹងប្រែងតទៅមុខទៀតដេីម្បីជីវភាពគ្រួសារ និងអនាគតរបស់កូនៗ»។
ជាមួយគ្នានេះ លោកជំទាវ ក៏បានផ្តាំផ្ញើឱ្យថែទាំសុខភាពឱ្យបានល្អ រស់នៅមានអនាម័យស្អាត និងបន្តព្យាបាលមុខរបួសឱ្យឆាប់ជាសះស្បើយ។ ចំណែកឯក្មួយស្រី ត្រូវថែទាំសុខភាពផ្ទាល់ខ្លួន ត្រូវទៅពិនិត្យផ្ទៃពោះឱ្យបានទៀងទាត់ និងត្រូវទៅសម្រាលកូននៅមណ្ឌលសុខភាពដែលនៅជិត ដេីម្បីសុវត្ថិភាពទាំងម្តាយនិងកូន។
ជាកិច្ចឆ្លើយតប ក្រុមគ្រួសារខាងលើបានសម្តែងនូវក្តីរំភើបក្តុកក្តួលដល់ស្រក់ទឹកភ្នែក និងថ្លែងអំណរគុណយ៉ាងជ្រាលជ្រៅបំផុតចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលជាមាតាមនុស្សធម៌ បានគិតគូរ និងលើកទឹកចិត្តឱ្យមានក្តីសង្ឃឹមតទៅមុខទៀត។
អំណោយមនុស្សធម៌ជួយសម្រាលការលំបាកក្នុងជីវភាពដែលកំពុងជួបប្រទះចំពោះមុខមានដូចជា អង្ករ១០០គីឡូ មី៤កេស ត្រីខ៤យួរ ទឹកត្រីទឹកស៊ីអ៊ីវ៤យួរ ឃីត២ សម្ភារៈចានផ្ទះបាយ១ឈុត និងថវិកាចំនួន៥លានរៀលទៀតផង៕
