នៅថ្ងៃទី៩ ខែកក្កដា ឆ្នាំ២០២៣ វេលាម៉ោង ២០ និង ១០នាទី កម្លាំងជំនាញព្រហ្មទណ្ឌស្រុកសំរោងទង សហការជាមួយប៉ុស្ដិត្រពាំងគង បានស្រាវជ្រាវ បានឃាត់ខ្លួនឈ្មោះ ព្រំ គឿន ហៅពន្លក ភេទប្រុស អាយុ ២៩ឆ្នាំ រស់នៅភូមិស្លា ឃុំវល្លិ៍ស ស្រុកសំរោងទង ខេត្តកំពង់ស្ពឺ ឃាត់នៅចំណុចផ្ទះទំនេរភូមិអូរក្រាំងអំបិល ឃុំត្រពាំងគង ស្រុកសំរោងទង មកធ្វើការសាកសួរ និងបានឆ្លើយសារភាពថា ខ្លួនពិតជាបានធ្វើសកម្មភាពយកជំពាមកៅស៊ូបាញ់កញ្ចក់រថយន្ត នៅចំណុចខាងលិចស្ពានផ្លូវល្បឿនលឿន ខាងលើពិតប្រាកដមែន ។
គួរបញ្ជាក់ថា ៖ នៅថ្ងៃចន្ទ័ ៩កើត ខែបឋមាសាឍ ឆ្នាំថោះ ព.ស ២៥៦៧ ត្រូវនឹងថ្ងៃទី២៦ ខែមិថុនា ឆ្នាំ២០២៣ វេលាម៉ោង ១១និង ៣០ នាទី កម្លាំងជំនាញព្រហ្មទណ្ឌស្រុកសំរោងទង សហការជាមួយកម្លាំងនាយកដ្ឋានចរាចរណ៍ ក្រសួងមហាផ្ទៃ គ្រប់គ្រងផ្លូវល្បឿនលឿន បានចុះស្រាវជ្រាវករណី (បាញ់កញ្ចក់រថយន្ត) មានជនសង្ស័យមិនស្គាល់អត្តសញ្ញាណ បានធ្វើសកម្មភាពយកជំពាមកៅស៊ូបាញ់កញ្ចក់រថយន្ត ១គ្រឿង ម៉ាកវីហ្គូ ពណ៌ស ពាក់ផ្លាកលេខ ខេមរភូមិន្ទ02 2-1125ម្ចាស់ឈ្មោះ ឡុង សាវឿន ភេទប្រុស បណ្តាលអោយបែកកញ្ចក់ផ្នែកខាងមុខ ខណៈពេលជនរងគ្រោះកំពុងបើករថយន្តតាមផ្លូវល្បឿនលឿន ទិសដៅពីលិចទៅកើត នៅចំណុចស្ពានលើផ្លូវល្បឿនលឿនគីឡូម៉ែត្រ ២៣-២៤ ស្ថិតនៅភូមិបាក់ចិញ្ចៀន ឃុំត្រពាំងគង ស្រុកសំរោងទង ខេត្តកំពង់ស្ពឺ កាលពីថ្ងៃទី២៥ ខែមិថុនា ឆ្នាំ២០២៣ វេលាម៉ោង២០និង១៥ ។
ករណីនេះ សមត្ថកិច្ចបាននិងកំពុងកសាងសំណុំរឿងចាត់ការតាមនិតិវិធី ៕
