ភ្នំពេញ ៖ យុវជនសេដ្ឋកិច្ចកម្ពុជារាប់ម៉ឺននាក់ ដែលជាវិនិយោគិន ពាណិជ្ជករ អាជីវករ ភ្នាក់ងារទីផ្សារ ស្វ័យនិយោជន៍ និងអ្នកជំនាញវិជ្ជាជីវៈ បានបង្ហាញជំហររបស់ខ្លួនបន្តគាំទ្រសម្តេចតេជោហ៊ុន សែន ជាបេក្ខភាពនាយករដ្ឋមន្ត្រី និងគាំទ្រលោកបណ្ឌិត ហ៊ុន ម៉ាណែត បេក្ខភាពនាយករដ្ឋមន្ត្រីនាពេលអនាគត។
ក្នុងនោះយុវជន និងធុរកិច្ចជនទាំងអស់ក៏បានបង្ហាញនូវការពេញចិត្ត និងនាំគ្នាភ្ជាប់ Channel Telegram សម្តេចតេជោ ហ៊ុន សែន នាយករដ្ឋមន្ត្រីកម្ពុជា គ្រប់ៗគ្នាសម្រាប់តាមដានសកម្មភាពការអភិវឌ្ឍរបស់ប្រទេសកម្ពុជា និងព័ត៌មានជាច្រើនទៀត។
ការប្រកាសគាំទ្ររបស់យុវជន និង ធុរកិច្ចជនសេដ្ឋកិច្ចកម្ពុជាខាងលើនេះ ធ្វើឡើងក្នុងវេទិកាសេដ្ឋកិច្ចឆ្នាំ២០២៣ លើកទី១ នាថ្ងៃ១៦ ខែកក្កដា ឆ្នាំ២០២៣ នាមជ្ឍមណ្ឌលកោះពេជ្រ ក្រោមអធិបតីភាពលោកឧកញ៉ាសមូហកបណ្ឌិត ឡី សុភាព ប្រធានសមាគមសម្ពន្ធភាពអង្គការ–សមាគមនិងវិស័យឯកជននៅកម្ពុជា និងជាប្រធានសមាគមសហព័ន្ធវិនិយោគិនកម្ពុជា ។
បើតាមលោកឧកញ៉ាសមូហកបណ្ឌិត ឡី សុភាព បានមានប្រសាសន៍ថា រាជរដ្ឋាភិបាលកម្ពុជាក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា តែងតែយកចិត្តទុកដាក់រយៈពេលវែង ក្នុងនោះកត្តាសុខសន្តិភាព កត្តានយោបាយឈ្នះឈ្នះ មានគោលនយោបាយត្រឹមត្រូវ សមស្រប អាចអភិវឌ្ឍប្រទេសបាន។
លោកឧកញ៉ាសមូហកបណ្ឌិត បានលើកឡើងទៀតថា កត្តាសុខសន្តិភាព និងការរីកចម្រើនទាំងគ្រប់វិស័យនេះហើយ ទើបបានជា សមាជិក សមាជិកានៃអង្គវេទិកាទាំងអស់ ជាពិសេសសមាគមសម្ពន្ធភាពអង្គការ–សមាគម និងវិស័យឯកជននៅកម្ពុជា សមាគមសហព័ន្ធវិនិយោគិនកម្ពុជា និងយុវជនសេដ្ឋកិច្ចរាប់ម៉ឺននាក់ បានបេ្ដជ្ញាគាំទ្រសម្តេចតេជោ ហ៊ុន សែន ជាបេក្ខភាពនាយករដ្ឋមន្ត្រី និងគាំទ្រឯកឧត្តមបណ្ឌិត ហ៊ុន ម៉ាណែត ជាបេក្ខភាពនាយករដ្ឋមន្ត្រីនាពេលអនាគត។
ជាមួយគ្នានោះបន្ទាប់ពីបានស្តាប់នូវការបកស្រាយ និងយល់ជ្រាបពីអត្ថប្រយោជន៍នានាពីសំណាក់លោកឧកញ៉ាសមូហកបណ្ឌិត ឡី សុភាព ប្រធានសមាគមសម្ពន្ធភាពអង្គការ–សមាគមនិងវិស័យឯកជននៅកម្ពុជា និងជាប្រធានសមាគមសហព័ន្ធវិនិយោគិនកម្ពុជា ជុំវិញការទទួលបានព័ត៌មានជាច្រើនពីប្រមុខថ្នាក់ដឹកនាំ តាមរយៈបណ្តាញសង្គមតេឡេក្រាម ដែលតែងតែបង្ហាញរាល់សកម្មភាព ការអភិវឌ្ឍនានាដល់សាធារណជនហើយនោះ សមាជិកសមាជិកានៃអង្គវេទិកាទាំងមូលបាននាំគ្នាភ្ជាប់តេឡេក្រាមសម្តេចតេជោគ្រប់ៗគ្នាផងដែរ ៕
