ខេត្តក្រចេះ៖ នៅព្រឹកថ្ងៃអង្គារ ១៥កើត ខែទុតិយាសាឍ ឆ្នាំថោះ បញ្ចស័ក ព ស ២៥៦៧ ត្រូវនឹងថ្ងៃទី០១ ខែសីហា ឆ្នាំ២០២៣នេះ ពុទ្ធបរិស័ទបានរួមគ្នាចូលបច្ច័យធ្វើ បុណ្យផ្កាមហាសាមគ្គីដែលផ្ដួចផ្ដើមដោយព្រះគ្រូចៅអធិការ ព្រះភិក្ខុសង្ឃ លោកអាចារ្យ គណៈកម្មការ និងពុទ្ធបរិស័ទជិតឆ្ងាយ។
ក្នុងនោះលោកអនុបណ្ឌិត ឌីម សុខុន និង លោកស្រី ធឿន គន្ធា ព្រមទាំងកូនចៅ បានចំណាយថវិកាធ្វើផ្កាប្រាក់មួយដើម ចូលរួមដង្ហែចូលទៅប្រគេនព្រះសង្ឃដែលគង់នៅក្នុងវត្តមណីរង្សី(ហៅវត្តព្រែកសំរោង) ស្ថិតនៅភូមិព្រែកសំរោង ឃុំខ្សាច់កណ្ដែត ស្រុកឆ្លូង ខេត្តក្រចេះផងដែរ។ ពិធីបុណ្យផ្កាប្រាក់មហាសាមគ្គីនេះត្រូវបានប្រារព្ធធ្វេីឡេីង តាំងពីព្រឹករហូតដល់រសៀលថ្ងៃទី០១ ខែសីហា ឆ្នាំ២០២៣នេះដើម្បីប្រមូលបច្ច័យសម្រាប់កសាងឧបដ្ឋានសាលា (សាលាឆាន់)។
ព្រះគ្រូចៅអធិការវត្ត បានមានថេរពីការថា: បានជាអាត្មាផ្ដួចផ្ដើមធ្វើបុណ្យផ្កាប្រាក់សាមគ្គីនេះ ដើម្បីប្រមូលបច្ច័យសម្រាប់កសាងនៅឧបដ្ឋានសាលា (សាលាឆាន់) មួយខ្នង ដែលមិនទាន់បានកសាងរួចរាល់ជាស្ថាពរនៅឡើយទេ តែត្រូវបានរងគ្រោះ ដោយគ្រោះធម្មជាតិខ្យល់កន្ត្រាក់ កាលពីវេលាម៉ោង១០នឹង៣០នាទី ទៅម៉ោង១១យប់ កាលពីថ្ងៃទី០៧ ខែមេសា ឆ្នាំ២០២៣ កន្លងទៅ បានធ្វើឲ្យខូចខាតជាច្រើនបន្ថែមពីលើថែមទៀត វត្តនេះស្ថិតនៅភូមិព្រែកសំរោង ឃុំខ្សាច់អណ្ដែត ស្រុកឆ្លូង ខេត្តក្រចេះ។
ព្រះគ្រូចៅអធិការ អាត្មាភាពក៏សូមថ្លែងអំណរគុណដល់ពុទ្ធបរិស័ទ ជិតឆ្ងាយដែលបានមកចូលរួមនិងជួយឧបត្ថមគាំទ្រ និងចំណាយថវិកាផ្ទាល់ខ្លួនចូលរួមធ្វើបុណ្យផ្កាប្រាក់មហាសាមគ្គី នៅពេលដែល វត្តរបស់អាត្មាកំពុងមានការខ្វះខាតនិងកំពុងតែមានការសាងសង់ ហើយត្រូវចំណាយបច្ច័យយ៉ាងច្រើន។
ព្រះគ្រូចៅអធិការ មានព្រះថេរដីកាបន្ថែមទៀតថា ប្រជាពុទ្ធបរិស័ទជិតឆ្ងាយដែលមានសទ្ធាជ្រះថ្លា ចំណាយថវិកាផ្ទាល់ខ្លួនចូលរូមផ្ដួចផ្ដើមធ្វើបុណ្យផ្កាប្រាក់នេះនឹងទទួលបានកុសលផលបុណ្យយ៉ាងច្រើន និង រូបសម្បត្តិល្អភោផង់ មានព័ណសំប្បុរ ស្រស់ថ្លាល្អ និងសម្បូរទ្រព្យសម្បត្តិសប្បាយចិត្តគ្រប់ៗគ្នា។
ព្រះគ្រូចៅអធិការ តំណាងឲ្យ ព្រះភិក្ខុសង្ឃ លោកអាចារ្យ គណៈកម្មការ និងពុទ្ធបរិស័ទចំណុះជើងវត្តមណីរង្សី(ហៅវត្តព្រែកសំរោង) បានបង្ហាញអារម្មណ៍ជ្រះថ្លា ដោយប្រជាពុទ្ធបរិស័ទដែលបានអញ្ជើញពីទីជិតឆ្ងាយមកជួបជុំចូលរួមក្នុងកម្មវិធីបុណ្យផ្កាមហាសាមគ្គីនេះ អាត្មាសូមថ្លែងអំណរអរគុណនិងជូនពរប្រជាពុទ្ធបរិស័ទជួបប្រទះតែសេចក្តីសុខ សេចក្តីចំរើន និងជួបតែពុទ្ធពរទាំងបួនប្រការ អាយុ វណ្ណៈ សុខៈ ពលៈ កុំប្បីឃ្លៀងឃ្លាតឡើយ៕
