ខេត្តកណ្តាល៖ ឯកឧត្តម គង់ សោភ័ណ្ឌ អភិបាល នៃគណៈអភិបាលខេត្តកណ្តាល នៅរសៀលថ្ងៃទី១១ ខែសីហា ឆ្នាំ២០២០ បានអញ្ជើញជាអធិបតីក្នុងពិធីបិទកិច្ចប្រជុំផ្សព្វផ្សាយបទបញ្ជាលេខ ០១ បប របស់រាជដ្ឋាភិបាលកម្ពុជា ស្ដីពីការអនុវត្តផែនការដោះស្រាយបញ្ហាកូដកម្ម បាតុកម្មនៅតាមមុខសញ្ញាសម្រាប់ឆ្នាំ២០២០-២០២៤ ដោយមានការចូលរួមពី ឯកឧត្តម ឡុង ដារ៉ា មេធាវីរាជរដ្ឋាភិបាល ឯកឧត្តម ទេស រុក្ខសផល អគ្គលេខាធិការ នៃអគ្គលេខាធិការដ្ឋាន គ.ក.ប (គណៈកម្មាការសម្រាប់ដោះស្រាយបញ្ហាបាតុកម្ម កូដកម្ម នៅតាមគ្រប់មុខសញ្ញា) ព្រមទាំងឯកឧត្តម លោកជំទាវ អភិបាលរងខេត្ត កងកម្លាំងទាំង៣ និងមន្ត្រីពាក់ព័ន្ធជាង ៤០០នាក់។
ថ្លែងក្នុងកិច្ចប្រជុំនេះ ឯកឧត្តមអភិបាល បានផ្តល់ជាអនុសាសន៍បន្ថែមទៀតដល់គណៈកម្មការសម្រាប់ដោះស្រាយបញ្ហាកូដកម្ម-បាតុកម្មនៅតាមគ្រប់មុខសញ្ញាថ្នាក់ក្នុងខេត្ត គណបញ្ជាការឯកភាពខេត្ត ស្ថាប័នពាក់ព័ន្ធ និងអាជ្ញាធរនៅមូលដ្ឋានត្រូវតែបន្តខិតខំទប់ស្កាត់ និងដោះស្រាយរាល់ករណីកូដកម្ម-បាតុកម្មឲ្យបាន ដាច់ខាតមិនត្រូវទុកឱ្យរាលដាលពីតូចទៅធំ ឈានដល់ការបំផ្លាញសន្តិសុខសណ្ដាប់ធ្នាប់សង្គម បំផ្លាញស្ថិរភាពជាតិបានជាដាច់ខាត។
ទន្ទឹមនឹងនេះ ឯកឧត្តម ក៏បានស្នើអោយអជ្ញាធរត្រូវបន្តការផ្សព្វផ្សាយដល់ប្រជាពលរដ្ឋ និងបងប្អូនកម្មករនិយោជិតនៅតាមកន្លែងធ្វើការ អំពីវិធានការទប់ស្កាត់ ប្រឆាំងនឹងជំងឺកូវីត១៩ តាមការណែនាំរបស់ក្រសួងសុខាភិបាល និងវិធាការនានារបស់រាជរដ្ឋាភិបាលដែលបានដាក់ចេញ ដើម្បីរួមគ្នាប្រឆាំងនឹងជំងឺកូវីត១៩ ជាពិសេស យើងទាំងអស់គ្នាត្រូវបន្តយកចិត្តទុកដាក់ក្នុងការធ្វើអនាម័យឱ្យបានជាប្រចាំ ត្រូវពាក់ម៉ាក់ទាំងអស់គ្នា លាងដៃជាមួយសាប៊ូ អាកុល ឬជែល ឱ្យបានញឹកញាប់ ត្រូវរាយការណ៍ឲ្យអាជ្ញាធរក្នុងករណីមានអ្នកសង្ស័យថា មានអ្នកផ្ទុកជំងឺកូវីត១៩ ឲ្យបានទាន់ពេលវេលា ដើម្បីមានវិធានការធ្វើចត្តាឡីស័ក និងព្យាបាលឱ្យជាសះស្បើយឡើងវិញ ជៀសវាងមានការឆ្លងរីករាលដាលក្នុងសហគមន៍ ៕
