ខេត្តក្រចេះ៖ ស្បៃមុង និងឧបករណ៍សម្រាប់ប្រព្រឹត្តបទល្មើសនេសាទជាច្រើនពាន់ម៉ែត្រ ត្រូវបានសមត្ថកិច្ច និងជំនាញពាក់ព័ន្ធ បានសហការចុះបង្ក្រាបបាន ដុតកំទេចចោល រួចហើយលែងកូនត្រីចូលក្នុងទន្លេវិញផងដែរ។
ការចុះបង្ក្រាបបទល្មើសនេសាទនេះធ្វើឡើងកាលពីថ្ងៃទី២០ ខែកញ្ញា ឆ្នាំ២០២៣នេះ នៅក្នុងស្រុកឆ្លូង ខេត្តក្រចេះ។
សមត្ថកិច្ចបាននិយាយឱ្យដឹងថានៅមុនចុះបង្ក្រាបបទល្មើសនេសាទនេះ កម្លាំងរបស់អធិការដ្ឋាននគរបាលស្រុកឆ្លូង បានសហការជាមួយខណ្ឌរដ្ឋបាលជលផលក្រចេះ ផ្នែករដ្ឋបាលជលផលព្រែកប្រសព្វ រួមជាមួយគណៈបញ្ជាការឯកភាពរដ្ឋបាលស្រុកឆ្លូងក្រុមប្រឹក្សាឃុំ ប៉ុស្តិ៍នគរបាលរដ្ឋបាល ប្រជាការពារភូមិ និងសហគមន៍សរុបចំនួន១៤នាក់រួមមាន:
១.មន្ត្រីផ្នែកនគរបាលយុត្តិធម៌១នាក់
២.គណៈបញ្ជាការឯកភាពស្រុកឆ្លូង១នាក់
៣.ប៉ុស្ដិ៍នគរបាលរដ្ឋបាលហាន់ជ័យ៣នាក់
៤.មន្ត្រីសាលាស្រុកឆ្លូង១នាក់
៥.កម្លាំងប្រជាការពារហាន់ជ័យ៣នាក់
៦.មន្ត្រីកងរាជអាវុធហត្ថ១នាក់
៧.សមាភាពរបស់ឃុំហាន់ជ័យ៣នាក់ ដោយប្រើទូកម៉ាស៊ីនចំនួន០៣គ្រឿង បានចុះបង្ក្រាបបទល្មើសជលផលនៅតាមកន្លែងនេសាទ ទំនាប
ស្រែលិចទឹក ក្នុងភូមិហាន់ជ័យទី១ និងភូមិ
ហាន់ជ័យទី២ ស្រុកឆ្លូង ខេត្តក្រចេះ។
សមត្ថកិច្ចបានបញ្ជាក់ឱ្យដឹងថា ក្រោយចុះបង្ក្រាបសម្រចបានលទ្ធផលដូចខាងក្រោម៖
១-បានរុះរើនិងបំផ្លាញចោលឧបករណ៍នេសាទល្មើសច្បាប់រួមមានៈ
-របាំងព្រួលស្បៃមុងចំនួន៥៣ខ្សែ ប្រវែង១០៦០ម៉ែត្រ
-លូស្បៃមុងចំនួន៥៣មាត់លូ
-បង្គោលចម្រឹងប្ញស្សីចំនួន៣៥០ដើម
២-បានចាក់លែងត្រីចម្រុះទម្ងន់ប្រមាណ
៣០គីឡូក្រាមចូលទៅក្នុងដែនទឹកធម្មតាវិញ។
បច្ចុប្បន្នឧបករណ៍ ដែលជាវត្ថុតាងខាងលើត្រូវបានសមត្ថកិច្ច និងជំនាញធ្វើការ ដុតបំផ្លាញចោលរួចរាល់ហើយ៕
