(ខេត្តកំពត)៖ អភិបាលខេត្តកំពតបានក្រើនរំលឹកដល់មន្ទីរ អង្គភាពជំនាញមួយចំនួនឲ្យបន្តខិតខំយកចិត្តទុកដាក់សហការជាមួយនឹងអាជ្ញាធរក្រុងស្រុក អនុវត្តកាងាររបស់ខ្លួន ឲ្យមានប្រសិទ្ធភាពបន្ថែមទៀត។ ពិសេសពាក់ព័ន្ធលើវិស័យផលិតទឹកស្អាត វិស័យអគ្គីសនី វិស័យដីធ្លី វិស័យអប់រំ វិស័យទេសចរណ៍ និងការងារបម្រើសេវារដ្ឋបាល សេវាសាធារណៈជូនប្រជាពលរដ្ឋតាមបណ្ដាមូលដ្ឋាន។
ថ្លែងនៅក្នុងកិច្ចប្រជុំគណៈអភិបាល ខេត្ត ដើម្បីពិនិត្យលើ វឌ្ឍនភាពការងារប្រចាំខែកញ្ញា និងប្រចាំត្រីមាសទី៣ ឆ្នាំ២០២០ តាមរយៈ Video Conference ពីបណ្ដារដ្ឋបាលក្រុងស្រុក និងមន្ទីរអង្គភាពជុំវិញខេត្ត នៅព្រឹកថ្ងៃពុធ ទី៣០ ខែកញ្ញា ឆ្នាំ២០២០ លោក ជាវ តាយ អភិបាលខេត្តកំពត បានណែនាំឲ្យជំនាញ សហការគ្នាជាមួយនឹងអាជ្ញាធរមូលដ្ឋានបំពេញការងារឲ្យកាន់តែមានប្រសិទ្ធភាពខ្ពស់។
ជាមួយនេះ លោកបានលើកយកចំណុចមួយចំនួន ដូចជា ត្រូវថែរក្សាប្រភពទឹក ដើម្បីផ្គត់ផ្គង់លើបណ្ដាញផលលិតទឹកស្អាតនៅក្នុងខេត្តកំពត ទាំង១៦មូលដ្ឋាន ថែទាំបណ្ដាញអគ្គីសនីតាមបណ្ដាមូលដ្ឋាន។ ដោយឡែកនៅក្នុងខេត្ត សូមឲ្យអាជ្ញាធរសហការជាមួយអង្គភាពអគ្គិសនី ធ្វើអន្តរាគមន៍សម្របសម្រួលជាមួយប្រជាពលរដ្ឋឲ្យបានល្អចៀសវៀងមានការរិះគន់ពីប្រជាពលរដ្ឋ។ មន្ទីរអប់រំត្រូវយកចិត្តទុកដាក់ណែនាំដល់សាលាគ្រប់កម្រិតអំពីបញ្ហាអនាម័យ ដើម្បីបញ្ចៀសនូវជំងឺឆ្លងផ្សេងៗ។ ចំពោះការដោះស្រាយបញ្ហាប្រឈមពាក់ព័ន្ធវិស័យដីធ្លី សូមឲ្យមន្ទីរជំនាញ និងអាជ្ញាធរបន្តយកចិត្តទុកដាក់ដោះស្រាយ ពិសេសត្រូវខិតខំជំរុញការបម្រើសេវារដ្ឋបាល សេវាសាធារណៈជូនប្រជាពលរដ្ឋប្រកបដោយតម្លាភាពប្រសិទ្ធភាព និងឆាប់រហ័ស។
ក្នុងឱកាសនោះដែរ លោកអភិបាលខេត្តក៏បានណែនាំដល់ជំនាញពាក់ព័ន្ធ អាជ្ញាធរក្រុង ស្រុក ត្រូវបង្កើនស្មារតីចូលរួមថែរក្សាអនាម័យបរិស្ថាន រៀបចំសោភ័ណ្ឌភាព តាមបណ្ដាមូលដ្ឋាន របស់ខ្លួនឲ្យបានស្អាតល្អ ដើម្បីបង្កើនភាពទាក់ទាញភ្ញៀវទេសចរ កាន់តែច្រើនបន្ថែមទៀត ព្រោះវាជាប្រភពចំណូលសម្រាប់ជីវភាពប្រជាពលរដ្ឋក្នុងខេត្តកំពត។ ជាមួយឱកាសនោះដែរលោកអភិបាលខេត្តក៏បានធ្វើការកត់សម្គាល់វាយតម្លៃខ្ពស់ចំពោះលទ្ធផលការងារដែលរដ្ឋបាលខេត្តកំពតសម្រេចបាន និងបានសម្ដែងការកោតសរសើរដល់ជំនាញ អាជ្ញាធរមូលដ្ឋានកងកម្លាំងប្រដាប់អាវុធគ្រប់ថ្នាក់គ្រប់ផ្នែកដែលបានរួមសហការគ្នាធ្វើឲ្យលទ្ធផលការងាររបស់រដ្ឋបាលខេត្តក្នុងរយៈពេល៩ខែឆ្នាំ ២០២០នេះទទួលបានលទ្ធផលល្អប្រសើរ។ ពិសេសបើទោះបីកម្ពុជាយើង និងនិយាយដោយឡែកសម្រាប់ខេត្តកំពតទទួលរងឥទ្ធិពលវិបត្តិកូវីដ១៩ក្ដី ខេត្តកំពតក៏អាចសម្រេចលើការងារប្រមូលចំណូលចូលថវិការដ្ឋ ដែលជាប្រភពអភិវឌ្ឍខេត្តបានកាន់តែល្អប្រសើរថែមទៀតផងដែរ៕
