(ខេត្តកំពត)៖ មានសក្ដានុពលវិស័យទេសចរណ៍ជាច្រើន ដោយមានកន្លែងកម្សាន្ត ដ៏ទាក់ទាញថ្មីៗ សម្បូរបែប ហើយបច្ចុប្បន្ន ត្រូវបានបង្កើតឡើងជាហូហែរ និងបានកំពុងអភិវឌ្ឍន៍ ដោយក្នុងនោះខេត្តកំពតក៏បានបង្កើតជាតំបន់ឆ្នេរខ្សាច់កម្សាន្តរបស់ខេត្ត ដើម្បីបង្កើនការទាក់ទាញដល់ភ្ញៀវទេសចរផងដែរ។
ប៉ុន្តែមកដល់ថ្ងៃនេះ ឆ្នេរខ្សាច់សប្បនិមិត្តិដែលត្រូវបានកំណត់ឈ្មោះថា ជា“ឆ្នេរមាសសម្តេច តេជោ”នោះ នៅមិនទាន់ស្ថាបនារួចរាល់នៅឡើយទេ ហើយអភិបាលខេត្តកំពតក៏បាននឹងកំពុងខិតខំជំរុញឲ្យក្រុមហ៊ុនលើបញ្ហានេះផងដែរ។
នៅក្នុងដំណើរចុះពិនិត្យលទ្ធផលគម្រោងអភិវឌ្ឍឆ្នេរខ្សាច់សប្បនិមិត្ត ដែលអនុវត្តដោយក្រុមហ៊ុន IGB របស់លោកឧកញ៉ាជា សុខហេង ប្រធានក្រុមហ៊ុន ទទួលសិទ្ធិវិនិយោគ ពីក្រុមប្រឹក្សាជាតិអភិវឌ្ឍន៍ “CDC”នៃរាជរដ្ឋាភិបាលកម្ពុជា។ ពិសេសជាងនេះ គឺការចុះពិនិត្យ លើលទ្ធផលនៃការស្តារឃ្លងក្នុងតំបន់អភិវឌ្ឍន៍នេះ ដើម្បីឲ្យទូកនេសាទអាចចេញ ចូលបាន តាមសំណើរបស់ប្រជានេសាទ ដែលគម្រោងនេះស្ថិតនៅភូមិកែបថ្មី ឃុំបឹងទូក ស្រុកទឹកឈូ ខេត្តកំពត នៅថ្ងៃទី០៧ ខែធ្នូ ឆ្នាំ២០២០ ដែលមានអាជ្ញាធរនិងជំនាញពាក់ព័ន្ធចូលរួមផងដែរ។
លោក ជាវ តាយ អភិបាល នៃគណៈអភិបាលខេត្តកំពត បានមានប្រសាសន៍ថា ការចុះមកពិនិត្យនាឱកាសនោះ មិនមែនដើម្បីចេតនាឬការបង្អាក់ដំណើររបស់ក្រុមហ៊ុននោះទេ។ ប៉ុន្តែអ្វីដែលសំខាន់ គឺដើម្បីចុះមកពិនិត្យ លើបញ្ហាប្រឈមមួយចំនួន រួមសហការគ្នាដោះស្រាយ និងអំពីលទ្ធផលនៃដំណើរការសាងសង់ ស្ថាបនា ថាតើក្រុមហ៊ុនបានយកចិត្តទុកដាក់ និងអនុវត្តផែនការប្លង់គោលមេតាមលក្ខណៈបច្ចេកទេសត្រឹមត្រូវនិងទទួលបានលទ្ធផលកម្រិតណា។ ហើយពិសេសផងដែរនោះការជំរុញល្បឿន ការសាងសង់ឆ្នេរខ្សាច់កម្សាន្តសម្រាប់ភ្ញៀវទេសចរ និងពលរដ្ឋទូទៅឲ្យបានឆាប់រហ័ស ព្រោះរដ្ឋបាលខេត្តគឺជាសេនាធិការឲ្យរាជរដ្ឋាភិបាល ដោយមិនអាចចេះតែបណ្តែតបណ្តោយ ឲ្យក្រុមហ៊ុនជួបបញ្ហាប្រឈមហើយមិនមានការដោះស្រាយ ហើយក្រុមហ៊ុនផ្អែកលើហេតុផលយ៉ាងនេះ យ៉ាងនោះ ដែលធ្វើឲ្យដំណើរការអភិវឌ្ឍន៍មានការយឺតយ៉ាវនោះឡើយ។
លោក ជាវ តាយ បានបញ្ជាក់ថា អ្វីដែលរាជរដ្ឋាភិបាលបានសម្រេចថាត្រូវអភិវឌ្ឍហើយ យើងត្រូវនាំគ្នា សហការ ជំរុញដល់ដំណើរការអភិវឌ្ឍន៍នោះ ដោយត្រូវធ្វើជាបណ្តើរៗមិនអាចរង់ចាំ ឬប្រើលេសហេតុផលច្រើនបានទេ ព្រោះនៅក្នុងកិច្ចសន្យាសុំធ្វើការអភិវឌ្ឍន៍ ក៏បានកំណត់ពេលច្បាស់លាស់រួចហើយដែរ។ លោក អភិបាលខេត្ត ក៏បានណែនាំជំរុញឲ្យក្រុមហ៊ុនយកចិត្តទុកដាក់បង្កើនល្បឿនការងាររបស់ខ្លួន ហើយត្រូវបង្កើនកម្លាំង គ្រឿងចក្រឲ្យបានច្រើនដើម្បីបញ្ចប់ការងារតាមផែនការដែលបានកំណត់ទុក។
ដោយឡែកចំពោះការស្តារឃ្លងក្នុងតំបន់អភិវឌ្ឍគម្រោងនេះដែរ គឺធ្វើឡើងដើម្បីឆ្លើយតប បន្ទាប់ពីមានសំណើប្រជានេសាទ ដែលមិនអាចបើកទូកចេញ ចូលបាន ព្រោះឃ្លងចាស់មានសភាពគោករាក់ ហើយបច្ចុប្បន្នទូកប្រជានេសាទត្រូវចតនៅឆ្ងាយពីឆ្នេរ។ ជាមួយនេះ លោកអភិបាលខេត្តក៏បានណែនាំឲ្យក្រុមហ៊ុនអភិវឌ្ឍន៍តំបន់ឆ្នេរ ធ្វើការស្តារ ប៉ុន្តែត្រូវគោរព តាមគំនូសប្លង់បច្ចេកទេស ដែលមានការចូលរួមសហការពីជំនាញពាក់ព័ន្ធ ដើម្បីកាត់បន្ថយផលប៉ះពាល់ឲ្យនៅតិចបំផុតសម្រាប់ជាប្រយោជន៍ប្រើប្រាស់សាធារណៈផងដែរ៕
