(ខេត្តកំពត)៖ កាលពីថ្ងៃទី២១ ខែធ្នូ ឆ្នាំ២០២០ លោក ជាវ តាយ អភិបាលខេត្តកំពត អញ្ជើញដឹកនាំកិច្ចប្រជុំគណៈកម្មការប្រយុទ្ធប្រឆាំងជំងឺកូវីដ-១៩ខេត្ត ដែលមានការចូលរួមពី លោកលោកស្រី អភិបាលរងខេត្ត លោកអភិបាល អភិបាលរងក្រុង ស្រុក ប្រធានមន្ទីរសុខាភិបាល មន្ទីរអប់រំ យុវជន និងកីឡាខេត្ត លោកឧត្តមសេនីយ៍ស្នងការ មេបញ្ជាការ និងមន្ត្រីពាក់ព័ន្ធនានា។
ដោយអនុវត្តតាមប្រសាសន៍ណែនាំដ៏ខ្ពង់ខ្ពស់របស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសេចក្តីណែនាំបន្ទាន់របស់ក្រសួងសុខាភិបាល នៃព្រះរាជាណាចក្រកម្ពុជា ស្ដីពីការការពារការចម្លងបន្តពីការផ្ទុះនូវការឆ្លងវីរុសកូវីដ-១៩ នៅខេត្តសាមុតសាខននៃប្រទេសថៃ ក្នុងពេលថ្មីៗនេះ លោក ជាវ តាយ អភិបាលខេត្ត អញ្ជើញដឹកនាំកិច្ចប្រជុំគណៈកម្មការប្រយុទ្ធប្រឆាំងជំងឺកូវីដ-១៩ ដើម្បីត្រៀមទីតាំងសម្រាប់ធ្វើចត្តាឡីស័កពលករដែលត្រឡប់មកពីប្រទេសថៃ និងមន្ទីរពេទ្យសម្រាប់សម្រាកព្យាបាលករណីមានវិជ្ជមានកូវីដ-១៩ កើតមានឡើង។
ក្រោយពីស្តាប់របាយការណ៍របស់ លោក លោកស្រី អភិបាលរងខេត្ត លោកប្រធានមន្ទីរពាក់ព័ន្ធរួច លោកអភិបាលខេត្ត បានមានប្រសាសន៍ណែនាំជូនអង្គប្រជុំថា៖
– រដ្ឋបាលក្រុង ស្រុក ឃុំ សង្កាត់ ត្រូវយកចិត្តទុកដាក់អនុវត្តន៍ដោយស្មារតីទទួលខុសត្រូវខ្ពស់ តាមការណែនាំរបស់ប្រមុខរាជរដ្ឋាភិបាល និងក្រសួងសុខាភិបាលក្នុងការប្រយុទ្ធ និងបង្ការជម្ងឺកូវីដ-១៩ ហើយគណៈកម្មការកូវីដ-១៩ ទាំងបីរបស់រដ្ឋបាលខេត្តត្រូវបន្តអនុវត្តតាមភារកិច្ចរៀងៗខ្លួនដោយស្មារតីទទួលខុសត្រូវខ្ពស់។
ក្រោយពីចប់កិច្ចប្រជុំ លោកអភិបាលខេត្ត និងជាប្រធានគណៈកម្មការប្រយុទ្ធប្រឆាំងជំងឺកូវីដ-១៩ខេត្ត បានប្រគល់ម៉ាសចំនួន ១៧.៣០០ម៉ាស ជូនដល់រដ្ឋបាលក្រុង ស្រុក ឃុំ សង្កាត់ ក្នុងនោះ មួយក្រុងស្រុកទទួលបាន ១០០០ម៉ាស និងមួយឃុំសង្កាត់ទទួលបាន ១០០ម៉ាស៕
