(ខេត្តកែប)៖ ថ្ងៃទី០៥ ខែមករា ឆ្នាំ២០២១ នេះ គឺជាខួបគម្រប់១ឆ្នាំនៃសោកនាដកម្មបាក់រលំអគារ៧ជាន់នៅខេត្តកែប ដែលធ្វើឲ្យកម្មករសំណង់៣៦នាក់បានស្លាប់បាត់បង់ជីវិត និង២៣នាក់រងរបួស។
បើយើងក្រលេកមើលទិដ្ឋភាពនៅជំុវិញនៃបំណែកបាក់បែកនៃអគារ យើងពិតជាមានភាពសោកសង្រេង ថែមទាំងសង្វេគក្នុងចិត្ត នៅពេលឃើញបរិកាសនៅទីនេះមានភាពស្ងាត់ជ្រងំ។ ចំពោះខួបគម្រប់១ឆ្នាំ នៃការបាក់រលំអគារ៧ជាន់នេះ គេឃើញប្រធានក្រុមការងារចុះជួយខេត្តកែប ថ្នាក់ដឹកនាំខេត្តកែប បានធ្វើពិធីឧទ្ទិសកុសលជូនជនរងគ្រោះនៅទីតាំងនៃបំណែកអគារ កាលពីថ្ងៃអាទិត្យ ទី០៣ ខែមករា ឆ្នាំ២០២១ ប៉ុន្តែពុំមានភាពអធិកអធមនោះទេ។
សូមរម្លឹកថា កាលរសៀលថ្ងៃទី០៣ ខែមករា ឆ្នាំ២០២០ សំណង់អគារ៧ជាន់នៅខេត្តកែប ដែលសាងសង់បានប្រមាណ៧០ភាគរយ បានបាក់រលំរាបដល់ដី ដែលធ្វើឲ្យកម្មករសំណង់ចាស់-ក្មេង មានប្រុស មានស្រីចំនួន៥៩នាក់ ត្រូវបំណែកអគារសង្កត់ជាប់ក្នុងគំនរថ្ម។លុះពេលបញ្ចប់ការកាយរុករកនៅថ្ងៃទី០៥ ខែមករា ឆ្នាំ២០២០ ក្រុមជំនាញបានរកឃើញមនុស្សស្លាប់ចំនួន៣៦នាក់ និងរកឃើញអ្នករងរបួសចំនួន២៣នាក់៕
