ខេត្តកណ្តាល៖ ថ្លែងនៅក្នុង ពិធីអបអរសាទរខួបលើកទី១៧ ទិវាអតីតយុទ្ធជនកម្ពុជា នៅសាលាខេត្តកណ្តាល នារសៀលថ្ងៃទី២១ ខែមិថុនា ឆ្នាំ២០២៤នេះ ឯកឧត្ដម គង់ សោភ័ណ្ឌ អភិបាល នៃគណៈអភិបាលខេត្តកណ្ដាល បានមានប្រសាសន៍ថា ការប្រារព្ធទិវា នេះឡើង គឺដើម្បីធ្វើឱ្យប្រជាជនកម្ពុជាគ្រប់រូបចងចាំនូវពលីកម្មដ៏ធំធេង និងមិនអាចកាត់ថ្លៃបាន របស់យុទ្ធជន យុទ្ធនារី និងប្រជាជន ដែលបានលះបង់អាយុជីវិត ដើម្បីបុព្វហេតុជាតិនៅគ្រប់ ដំណាក់កាល និងគ្រប់កាលៈទេសៈ។
ឯកឧត្តមអភិបាលខេត្ត បានបញ្ជាក់បន្ថែមថា ការប្រារព្ធទិវានេះក៏ បានបង្ហាញអំពីការយកចិត្តទុកដាក់ចំពោះសុខទុក្ខរបស់អតីតយុទ្ធជន របស់រាជរដ្ឋាភិបាលកម្ពុជាបច្ចុប្បន្ន តាមរយៈការអនុវត្តគោលនយោបាយជាតិ ចំពោះអតីតយុទ្ធជន និងការគិតគូរដោះស្រាយជីវភាព ទាំងសម្ភារៈ ថវិកា ជាបន្តបន្ទាប់ចំពោះអតីតយុទ្ធជន ដែលបានពលិកម្មប្រកបដោយស្មារតីស្នេហាជាតិនៅគ្រប់ដំណាក់កាលនៃប្រវត្តិសាស្ត្រ ។
ឯកឧត្តមអភិបាលខេត្ត បានប្រសាសន៏ថា អនុវត្តតាមសារលិខិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងជាអនុប្រធានទី១ សមាគមអតីតយុទ្ធជនកម្ពុជា ក្នុងឱកាស ខួបលើកទី១៧ ទិវាអតីតយុទ្ធជនកម្ពុជា ២១មិថុនា ឆ្នាំ២០២៤ បានបង្ហាញថា ថ្នាក់ដឹកនាំសមាគមអតីត យុទ្ធជនកម្ពុជាគ្រប់លំដាប់ថ្នាក់ បាននិងកំពុងបន្តខិតខំប្រឹងប្រែងយកចិត្តទុកដាក់ចំពោះ អតីតយុទ្ធជន និងគ្រួសារ សំដៅចូលរួមលើកកម្ពស់ស្មារតីទទួលខុសត្រូវក្នុងការដឹកនាំ និងជម្រុញសកម្មភាពការងារសមាគមអតីតយុទ្ធជនកម្ពុជា ឱ្យទទួលបានជោគជ័យ ជាពិសេស ដើម្បីលើកកម្ពស់កិត្តិយស សេចក្តីថ្លៃថ្នូរ សក្តិសម នឹងគុណបំណាច់ដ៏ធំធេងរបស់អតីត យុទ្ធជន យុទ្ធនារី ដែលបានពលិកម្មយ៉ាងអង់អាចក្លាហាន ជាគំរូវីរភាពស្នេហាជាតិ ដ៏ឧត្តុង្គឧត្តម ក្នុងបុព្វហេតុការពារជាតិ មាតុភូមិ ដែលបានកត់ត្រាទុកក្នុងប្រវត្តិសាស្ត្រជាតិ។
នៅក្នុងឱកាសនេះដែរ ឯកឧត្តមអភិបាលខេត្ត បានអំពាវនាវដល់ ឯកឧត្តម លោកជំទាវ លោក លោកស្រី សប្បុរសជន អង្គការដៃគូអភិវឌ្ឍ សូមមេត្តាជួយផ្តល់ការគាំទ្រដល់សមាគមអតីតយុទ្ធជន កម្ពុជាខេត្តកណ្តាល ដើម្បីចូលរួមដោះស្រាយ ការលំបាករបស់បងប្អូនអតីតយុទ្ធជន ស្របតាមទស្សនៈថា ខ្មែរជាប្រទេសតូច តែមានបេះដូងធំទូលាយ ដែលជាប្រពៃណីរបស់ប្រជា ពលរដ្ឋខ្មែរ តែងតែមានទំនុកចិត្តជួយគ្នា និងគាំទ្រគ្នាទៅវិញទៅមក ក្នុងឆ្លងសាមគ្គីជាតិ ជាពិសេសក្នុងគ្រប់ស្ថានភាពលំបាក។
លោក លី សុធី ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តកណ្ដាល បានឱ្យដឹងថា គិតត្រឹមខែឧសភាឆ្នាំ២០២៤នេះ សមាគមន៍អតីតយុទ្ធជនកម្ពុជាទូទាំងខេត្តកណ្ដាលសរុបមានចំនួន ២៧៣០នាក់ លើស្ថិតិសរុប ៥៥៦១នាក់ ក្នុងនោះនិវត្តន៍ជន ១០១៤នាក់ ជនបាត់បង់សមត្ថភាពការងារ ៣៤នាក់ ជនពិការ ៩២៤នាក់ គ្រួសារពលី ៦៩៩នាក់ គ្រួសារមរណៈ ៥៩នាក់។
