ភ្នំពេញ៖ នៅក្រសួងព័ត៌មាន នារសៀលថ្ងៃចន្ទ ទី២៤ ខែមិថុនា ២០២៤ ឯកឧត្ដមបណ្ឌិត សុខ ប្រសិទ្ធ រដ្ឋលេខាធិការ ក្រសួងព័ត៌មាន បានអនុញ្ញាតឱ្យ លោកបណ្ឌិត ហោ គន្ធា ប្រធានសមាគមអភិវឌ្ឍន៍វិជ្ជាជីវៈអ្នកសារព័ត៌មានកម្ពុជា និងលោកបណ្ឌិត ឃីម រដ្ឋា អនុប្រធាន ចូលជួបសួរសុខទុក្ខ និងពិភាក្សាការងារ ជុំវិញករណីបងប្អូន អ្នកសារព័ត៌មានមានបញ្ហា នៅខេត្តមណ្ឌលគីរី។
ឯកឧត្ដមបណ្ឌិត បានធ្វើការណែនាំ និងបង្ហាញពីប្រភពបញ្ហា ក៏ដូចជាដំណោះស្រាយចំពោះបងប្អូនអ្នកសារព័ត៌មាន ដែលបានជួបបញ្ហា និងបងប្អូនអ្នកសារព័ត៌មានទូទៅ ក្នុងន័យអប់រំ និងដេីម្បីការពារសុវត្ថិភាពចំពោះបងប្អូនអ្នកសារព័ត៌មានពេលចុះអនុវត្ដការងារ ព្រមទាំងកេីនរំលឹកផងដែរថា សូមឱ្យបងប្អូនគោរពឱ្យបាននូវក្រមសីលធម៌ វិជ្ជាជីវៈ។
ឯកឧត្ដមបណ្ឌិត បានបន្ដទៀតថា ឯកឧត្ដម នេត្រ ភក្ត្រា រដ្ឋមន្ត្រី ក្រសួងព័ត៌មាន តែងតែយកចិត្ដទុកដាក់ជាមួយបងប្អូនអ្នកសារព័ត៌មានគ្រប់ៗគ្នា និងធ្វើយ៉ាងណាលេីកកម្ពស់វិស័យសារព័ត៌មាននៅកម្ពុជា ឱ្យមានភាពរីកចំរេីន ក្នុងសម័យបច្ចេកវិទ្យាទំនើប និងចីរភាព។
ក្រោយពីទទួលបានការចង្អុលបង្ហាញ លោកបណ្ឌិត ហោ គន្ធា ប្រធានសមាគមអភិវឌ្ឍន៍វិជ្ជាជីវៈអ្នកសារព័ត៌មានកម្ពុជា សូមកោតសរសើរ និងគោរពអរគុណជាអណែក ចំពោះ ឯកឧត្តមបណ្ឌិត សុខ ប្រសិទ្ធ រដ្ឋលេខាធិការ និងជាពិសេស ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ក្នុងគិតគូរ និងយកចិត្ដទុកដាក់បំផុត មកលេីបងប្អូនអ្នកព័ត៌មាន ទាំងជាតិ និងអន្ដរជាតិ។
មុននឹងបញ្ចប់ ឯកឧត្ដមបណ្ឌិត បានអនុញ្ញាតថតរូបអនុស្សាវរីយ៍ផងដែរ។
