(ខេត្តកំពត)៖ ថ្វីត្បិតការផលិតអំបិលតាមសហគមន៍និមួយៗធ្វើមិនបានគ្រប់ផ្ទៃដីនៃផែនការ ប៉ុន្តែទិន្នផលដែលទទួលបានប្រចាំឆ្នាំមិនបានថយចុះនោះទេ ហើយអបិលដែលផលិតបានក៏អាចផ្គត់ផ្គង់ដល់ពលរដ្ឋនៅទូទាំងប្រទេសបានគ្រប់គ្រាន់ផងដែរ។
នេះជាការលើកឡើងរបស់ លោក សុខ គឹមជឿន ប្រធានមន្ទីរឧស្សាហកម្ម និងសិប្បកម្មខេត្តកំពត នៅព្រឹកថ្ងៃទី០៨ ខែមករា ឆ្នាំ២០២១។លោកបានបញ្ជាក់ផងដែរថា ផ្ទៃដីសម្រាប់ផលិតអំបិលមានសរុប ៣,៧២១.០២ហិកតា មានក្រុមផលិត១៧៩ក្រុម ប៉ុន្តែក្នុងឆ្នាំ២០២០ យើងផលិតបានត្រឹម ២,៨៥៧.២៣ ហិកតា និងមានក្រុមផលិតតែ១៣៩ក្រុម ដោយទទួលបានទិន្នផលសរុប ៨៣,៩៦៩.០៦៣ តោន ដោយយើងបានលក់ចែកចាយជាបន្តបន្ទាប់ ហើយក៏បានស្តុកទុកអំបិលនៅក្នុងឃ្លាំងចំនួន ១២,៦០១.៥៧៣ តោនផងដែរ។
លោកប្រធានបានឲ្យដឹងទៀតថា ក្នុងចំណោមផ្ទៃដីផលិតអំបិលសរុបខាងលើ យើងបានបែងចែកជា ៦មណ្ឌល រួមមាន៖ ទី១-មណ្ឌលបឹងរូង១ ,ទី២-មណ្ឌលបឹងរូង២ ,ទី៣-មណ្ឌលសេះស , ទី៤-មណ្ឌលបឹងទូក ,ទី៥-មណ្ឌលត្រើយកោះ ,និង ទី៦-មណ្ឌលកំពង់ត្រាច។
លោកបានបន្ថែមថា ក្នុងឆ្នាំ២០២០ បើទោះជាការផលិតអំបិលមិនបានគ្រប់ទំហំផ្ទៃដីសរុបក៏ពិតមែន តែទិន្នផលអំបិលមានការកើនឡើងលើសពីឆ្នាំ២០១៩ ហើយការផលិតអំបិលនេះគឺសម្រាប់យកទៅផ្គត់ផ្គង់ទីផ្សារទូទាំងប្រទេស ដោយពុំមានការខ្វះខាត ថែមទាំងបានស្តុកទុកក្នុងឃ្លាំងដើម្បីត្រៀមបង្ការផ្គត់ផ្គង់បន្ត ដោយមិនបានទិញពីប្រទេសជិតខាងមកស្តុកទុកនោះឡើយ៕
