ខេត្តកំពង់ស្ពឺ÷ ប្រជាពលរដ្ឋនៅក្នុងខេត្តកំពង់ស្ពឺ ពិសេសប្រជាពលរដ្ឋដែលរស់នៅក្នុងភូមិតាម៉ុល សង្កាត់ច្បារមន ក្ក្រុងច្បារមន ពួកគាត់គ្មានជំនឿទុកចិត្តទៅលើអាជ្ញាធរពាក់ព័ន្ធ នៅក្នុងខេត្តកំពង់ស្ពឺនោះឡើយ ខណៈល្បែងស៊ីសងកំពុងតែបើកលេងយ៉ាងគគ្រឹកគគ្រេង ដោយអាជ្ញាធរនិងសមត្ថកិច្ច មិនបានអនុវត្តតាមបទបញ្ជារបស់ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ និងមិនគោរពតាមចរាចរណ៍ណែនាំរបស់ក្រសួងមហាផ្ទៃ ស្តីពី ការបញ្ឈប់សកម្មភាពផ្សព្វផ្សាយល្បែងស៊ីសងខុសច្បាប់ នោះឡើយ។
ជាក់ស្ដែងនៅរសៀលថ្ងៃទី២០ ខែឧសភា ឆ្នាំ២០២៥ ក្រុមអ្នកសារព័ត៌មានយើងបានធ្វើដំណើរឆ្លងកាត់តាមផ្លូវជាតិលេខ៤៤ មកដល់ចំណុចភូមិតាម៉ុល សង្កាត់ច្បារមន ក្រុមច្បារមន បានសង្កេតឃើញក្រុមអ្នកញៀនល្បែងចូលទៅលេងយ៉ាងច្រើន ភ្លាល់ដាក់លុយចាញ់ឈ្នះរាប់រយដុល្លារ ចំណែកអាជ្ញាធរនិងសមត្ថកិច្ចមិនបង្ក្រាប (សង្ស័យអាជ្ញាធរនិងសមត្ថកិច្ចត្រូវថ្នាំសណ្តំរអស់ហើយ ទើបមិនមានវិធានការបង្ក្រាបទាល់តែសោះ)។
គួរបញ្ជាក់ផងដែរថាកាលពីកន្លងទៅឯកឧត្តម ជាម ច័ន្ទសោភ័ណ អភិបាលខេត្តកំពង់ស្ពឺ បានណែនាំទៅដល់សមត្ថកិច្ចពាក់ព័ន្ធ និងអាជ្ញាធរក្រុង-ស្រុកទាំង៩ ត្រូវបង្កើនប្រសិទ្ធិភាព នៃការផ្សព្វផ្សាយ ឱ្យបានទូលំទូលាយពីផលប៉ះពាល់ នៃការលេងល្បែងស៊ីសងគ្រប់ប្រភេទ ហើយត្រូវបន្តពិនិត្យតាមដាននូវរាល់សកម្មភាព ទីតាំងបើកល្បែងស៊ីសងគ្រប់ប្រភេទ ទាំងល្បែងអនឡាញ ល្បែងនៅតាមផ្ទះ និងចាត់វិធានការឱ្យបានតឹងរឹងលើការទប់ស្កាត់បង្ក្រាបឱ្យបាន មិនតែប៉ុណ្ណោះឯកឧត្តម បានសង្កត់ធ្ងន់ថា មន្ត្រីតុលាការត្រូវដាក់ទោសទណ្ឌឱ្យបានធ្ងន់ធ្ងរ ដល់អ្នកលេងល្បែងទាំងអស់នោះ ដើម្បីឱ្យមានការរាងចាល ក៏ប៉ុន្តែទីតាំងល្បែងស៊ីសងខុសច្បាប់ខាងលើនេះកំពុងតែបើកទទួលក្រុមអ្នកញៀនល្បែងឲ្យចូលមកលេងដោយមិនខ្លាចញញើតច្បាប់បន្តិចសោះ ឬមួយមានការបើកភ្លើងខៀវពីអាជ្ញាធរនិងសមត្ថកិច្ចទេដឹង.? ។
ហេតុដូច្នេះហើយ ប្រជាពលរដ្ឋ ក៏ដូចជាមហាជន ទូទៅ សំណូមពរទៅដល់លោកឧត្តមសេនីយ៍ទោ ឃឹម សុខៃ ស្នងការនគរបាលខេត្តកំពង់ស្ពឺ ជាពិសេសឯកឧត្តមបណ្ឌិត ជាម ច័ន្ទសោភ័ណ្ឌ អភិបាលខេត្តកំពង់ស្ពឺ សូមជួយចាត់វិធានការតាមផ្លូវច្បាប់ ចំពោះ ទីតាំងល្បែងស៊ីសងខុសច្បាប់ស្ថិតនៅក្នុងភូមិសាស្ត្រខាងលើនេះ ឲ្យស្របតាមគោនយោបាយភូមិ.ឃុំ.មានសុវត្ថិភាព ទាំង៧ចំណុច របស់រាជរដ្ឋាភិបាល ដែលបានកំណត់ និងដាក់ចេញអោយមន្ត្រីថ្នាក់ក្រោមជាតិ អនុវត្តទប់ស្កាត់ និងបង្ក្រាបឱ្យមានប្រសិទ្ធភាពផងទាន ៕
