ខេត្តកណ្តាល ៖ ចំពោះផេកសារព័ត៍មាន(វុទ្ធី ព័ត៌មាន) បានសរសេរនិងឡាយវីដេអូ (live video) បង្ហោះតាមបណ្ដាញសង្គមហ្វេសប៊ុកថា ប្រជាពលរដ្ឋឆ្ងល់ អរគុណសមត្ថកិច្ចព្រហ្មទណ្ឌខេត្តកណ្ដាល ដែលបានអនុវត្ត ខំយ៉ាងខ្នះខ្នែងចាប់បានកូនកន្ទុយលេខមួយដាក់គុកបានសម្រច ប៉ុន្តែប្រជាពលរដ្ឋឆ្ងល់ថា ហេតុអ្វីមាន់ជល់អនឡាញនៅក្បែរនោះ លោកព្រហ្មទណ្ឌមិនចាប់ ។
អធិការនគរបាលស្រុកកៀនស្វាយ សូមធ្វើការបំភ្លឺជូនមហាជនមេត្តាជ្រាបថា៖ កាលពីថ្ងៃទី១០ ខែឧសភា ឆ្នាំ២០២៥ វេលាម៉ោង ១៥:១០នាទី កម្លាំងផ្នែកព្រហ្មនគរបាលយុត្តិធម៌ ដឹកនាំដោយលោកវរសេនីយ៍ទោ ប៉ា ច័ន្ទវិសាល អធិការរងទទួលផែនការងារនគរបាលយុត្តិធម៌ ពិតជាបានចុះ បង្ក្រាបទីតាំងភ្នាក់ងារ ចាត់ចែងលេងល្បែងស៊ីសងខុសច្បាប់ (កត់ឆ្នោតវៀតណាម) ប្រាកដមែន ដែលមានទីតាំងស្ថិតនៅ ភូមិព្រែកតាកែវ២ ឃុំសំរោងធំ ស្រុកកៀនស្វាយ ខេត្តកណ្ដាល ក្នុងនោះបានឃាត់ខ្លួនជនសង្ស័យ ០១នាក់ឈ្មោះ រឿន ស្រីរ័ត្ន ភេទស្រី អាយុ៣៣ឆ្នាំ ជនជាតិខ្មែរ មុខរបរកត់ឆ្នោត មានទីលំនៅភូមិព្រែកតាកែវ២ ឃុំសំរោងធំ ស្រុកកៀនស្វាយ ខេត្តកណ្ដាល ហើយកម្លាំងផ្នែកនគរបាលយុត្តិធម៌បានកសាងសំណុំរឿងបញ្ជូនទៅស្នងការដ្ឋាននគរបាលខេត្តកណ្តាល ។
សកម្មភាព ចុះបង្ក្រាបទីតាំងភ្នាក់ងារ ចាត់ចែងលេងល្បែងស៊ីសងខុសច្បាប់ (កត់ឆ្នោតវៀតណាម) គឺផ្អែកតាមគោលនយោបាយរបស់រាជរដ្ឋាភិបាលកម្ពុជា ស្តីពី ភូមិ-ឃុំ-សង្កាត់មានសុវត្ថិភាព ក៏ដូចជាគោរពតាមបទបញ្ជាពី ឯកឧត្តម គួច ចំរើន អភិបាល នៃគណៈអភិបាលខេត្តកណ្ដាល និង លោកឧត្តសេនីយ៍ទោ ឈឿន សុចិត្ត ស្នងការនគរបាលខេត្តកណ្ដាល ។
ចំពោះចម្ងល់ប្រជាពលរដ្ឋ និងការផ្សាយព័ត៌មានរបស់ វុទ្ធី ព័ត៌មាន ថា មានមាន់ជល់អនឡាញនៅក្បែរនោះ គឺពុំមានទេ ៕
សូមបងប្អូនសាធារណៈជន និងសារព័ត៌មាន វុទ្ធី ព័ត៌មាន ជ្រាបជាព័ត៌មាន ៕
