ត្បូងឃ្មុំ៖ បន្ទាប់ពីក្រសួងបរិស្ថាន បានចេញសេចក្តីប្រកាសព័ត៌មាន ចែកកូនឈើចម្រុះគ្រប់ប្រភេទ ជូនប្រជាពលរដ្ឋយកទៅធ្វេីការដាំដុះដោយឥតគិតថ្លៃ នៅតាមមន្ទីរបរិស្ថានគ្រប់ រាជធានី ខេត្ត នាដេីមខែកក្ដាដា ឆ្នាំ២០២៥ កន្លងទៅថ្មីៗនេះ មន្ទីរបរិស្ថានខេត្តត្បូងឃ្មុំ បានសង្កេតឃើញថា មានប្រជាពលរដ្ឋ សិស្សានុសិស្ស ព្រះសង្ឃ និងមន្ដ្រីរាជការ មកពីគ្រប់ទិសទីក្នុងខេត្តត្បូងឃ្មុំ បានមកទទួលយកកូនឈើយ៉ាងច្រើនកុះករ រួមទាំងនៅមន្ទីរបរិស្ថាន និងនៅថ្នាលបណ្ដុះកូនឈើខ្នាតតំបន់ ស្ថិតក្នុងស្រុកអូររាំងឪផងដែរ។
ក្នុងយុទ្ធនាការ”ពន្លកបៃតង” ដែលដាក់ចេញដោយក្រសួងបរិស្ថាន ក្រោមការដឹកនាំដ៏ខ្ពង់ខ្ពស់ ឯកឧត្ដមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន គឺបានធ្វើឱ្យប្រជាពលរដ្ឋស្ទើរទូទាំងប្រទេស រីករាយនឹងការទទួលយកកូនឈេីគ្រប់ប្រភេទ យកទៅធ្វើការដាំដុះ ស្របទៅតាមវត្ថុបំណង ដើម្បីបង្កើតបានជាគុណប្រយោជន៍ និងផលប្រយោជន៍ សម្រាប់សាធារណ: និងដើម្បីផ្ទាល់ខ្លួន។
សូមរំលឹកផងដែរថា យុទ្ធនាការ”ពន្លកបៃតង” គឺសំដៅលេីការពង្រីកភាពបៃតង និងដេីម្បីអព្យាក្រឹតកាបូន ដែលជាដាំស្ដារឡៀងវិញនៅតំបន់ដីសឹករិចរិល និងនៅតាមទីសាធារណៈផ្សេងៗ។
សូមបញ្ជាក់ផងដែរថា ក្នុងឆ្នាំ២០២៥ នេះ ក្រសួងបរិស្ថាន និងមន្ទីរបរិស្ថានទូទាំងប្រទេសបានបណ្ដុះកូនឈើចម្រុះសម្រាប់ចែកជូនប្រជាពលរដ្ឋប្រមាណជាង ៣លានដើម និងកូនត្នោតជាង ១លានដើមផងដែរ។
រហូតមកដល់ពេលនេះ នៅតាមមន្ទីរបរិស្ថានទូទាំងប្រទេស នៅតែបន្ដចែកកូនឈើជូនប្រជាពលរដ្ឋដោយឥតគិតថ្លៃ។ ជាមួយគ្នានេះដែរ មន្ទីរបរិស្ថានគ្រប់រាជធានី ខេត្ត សូមអំពាវនាវដល់បងប្អូនប្រជាពលរដ្ឋ អាចអញ្ជើញមកទទួលយកកូនឈើយកទៅដាំដុះបាន ដោយធ្វើការទំនាក់ទំនងទៅមន្ទីរបរិស្ថានក្នុងខេត្តដែលបងប្អូនប្រជាពលរដ្ឋរស់នៅ ៕
