ភ្នំពេញ៖ ខ្មែរជួយខ្មែរ ខ្មែរស្រឡាញ់ខ្មែរ នៅព្រឹកថ្ងៃពុធទី២០ ខែសីហា ឆ្នាំ២០២៥ លោកបណ្ឌិត ឃីម រដ្ឋា ចាងហ្វាងគេហទំព័រ រស្មីស្ទឹងត្រង់ បានដឹកនាំក្រុមការងារនិងសហការី ព្រមទាំងព្រះសង្ឃ ជាច្រើនអង្គនាក់ នាំយកអំណោយជាសម្ភារៈ និងគ្រឿងឧបភោគ បរិភោគ ដែលអំណោយទាំងអស់នេះ គឺជាទឹកចិត្តរបស់ក្រុមការងារក្នុងអង្គភាព និងសម្បុរសជននានា ដើម្បីយកទៅ ផ្តល់ជូន ដល់វិរៈកងទ័ពជួរមុខ ដែលកំពុងការពារទឹកដីដែលសៀមបានឈ្លានពានកន្លងមកនោះ និងបន្តយកទៅផ្តល់ជួយដល់បងប្អូនប្រជាពលរដ្ឋ ដែលកំពុងភៀសសឹកចេញពីផ្ទះនៅតាមបន្ទាត់ព្រំដែនកម្ពុជា-ថៃ.មករកកន្លែងទីទួលមានសុវត្ថិភាពនៅក្នុងវត្តពោធិ៍ ៥ពាន់ដើម ស្ថិតនៅភូមិគូលែនខាងត្បូង ឃុំគូលែនខាងត្បូង ស្រុកគូលែន ខេត្តព្រះវិហារ ក្នុងនោះមាន សម្លៀកបំពាក់មនុស្សចាស់ និងក្មេង ប្រុសស្រី មួយចំនួនផងដែរ។
លោក សុខ សាន្តតារា អភិបាលរងខេត្តព្រះវិហារ តំណាងដ៏ខ្ពង់ខ្ពស់ឯកឧត្តម គីម រិទ្ធី អភិបាល នៃគណៈអភិបាលខេត្តព្រះវិហារ បានធ្វើការថ្លែងអំណរគុណយ៉ាងជ្រាលជ្រៅបំផុតចំពោះលោកបណ្ឌិត ឃីម រដ្ឋា ចាងហ្វាងសារព័ត៌មានរស្មីស្ទឹងត្រង់ និងលោកចាងហ្វាងសារព័ត៌មានមួយចំនួនទៀត ព្រមទាំងសប្បុរសជនទាំងអស់ ដែលបាននាំអំណោយគ្រឿងឧបភោគបរិភោគយ៉ាងច្រើនសន្ធឹកសន្ធាប់ ដើម្បីយកមកចែកជូនដល់វីរៈយុទ្ធជនជួរមុខក្នុងខេត្តប្រាសាទព្រះវិហារ លោកក៏បានសួរសុខទុក្ខទៅដល់ប្រជាពលរដ្ឋដែលជាជនភាសិកចំនួន 250 គ្រួសារ ដែលបានមកទទួលអំណោយនៅថ្ងៃនេះដែរ។
ឆ្លៀតក្នុងឱកាសនោះដែរ លោកបណ្ឌិត ឃីម រដ្ឋា ប្រធានអង្គភាព បានសំណេះសំណាល និងសួរសុខទុក្ខបងប្អូនដែលជាកងកម្លាំងការពារទឹកដីសមរភូមិជូរមុខ ដែលកំពុងឈរជើងការពារទឹកដីដែលសៀម បានឈ្លានពានកន្លងមកនោះ ព្រមទាំងជួយលើកទឹកចិត្តដល់កងកម្លំាងទាំងអស់ដែលខិតខំការពារទឹកដីកម្ពុជា មិនអោយជនណាមកឈ្លានពានទឹកដីកម្ពុជាសូម្បីតែ ១មីលីម៉ែត្រ និងបានជូនពរ ដល់បងៗ កងកម្លាំងទាំងអស់សូមឲ្យជួបតែសេចក្តីសុខសប្បាយទាំងអស់គ្នា។
ក្នុងឱកាសនេះដែរលោកបណ្ឌិត ឃីម រដ្ឋា បានស្វះស្វែងរកជំនួយមនុស្សធម៌ជាច្រើនដើម្បីចូលរួមចំណែក ជាមួយរាជរដ្ឋាភិបាលដែលមានប្រមុខដឹកនាំដ៏ឈ្លាសវៃ ក្លាហាន ដែលមាន សម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រីបច្ចុប្បន្នប្រធានព្រឹទ្ធសភានៃព្រះរាជាណាចក្រកម្ពុជា និងសម្ដេចបវរមហាធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលលោកទាំងទ្វីបានខិតខំពុះពារគ្រប់ឧបសគ្គ ដើម្បីជាតិមាតុភូមិនិងប្រជាពលរដ្ឋកម្ពុជាគ្រប់ៗរូប ! និងមិនអនុញ្ញាតឲ្យបរទេសណាឈ្លានពាន យកទឹកដីកម្ពុជា សូម្បីតែមួយមីលីម៉ែត្រក៏មិនបានដែរ នេះជាវីរភាពនិងជាបុព្វហេតុការពារជាតិមាតុភូមិកម្ពុជា ពីសំណាក់ប្រមុខដឹកនាំរបស់កម្ពុជាដ៏ឆ្លាតវៃនិងវីរភាពដ៏អង់អាចក្លាហានរបស់វីរៈកងទ័ពជួរមុខរបស់យើង ដែលលោកទាំងអស់ខិតខំតស៊ូពុះពារ គ្រប់ឧបសគ្គទាំងអស់យកអាយុជីវិតសាច់ស្រស់ឈាមស្រស់ទៅប្ដូរដើម្បីជាតិមាតុភូមិនិងប្រជាពលរដ្ឋ។
លោក បណ្ឌិត ឃីម រដ្ឋា ក៏បានបញ្ជាក់នៅក្នុងឱកាសនោះដែរថា កម្លាំងសាមគ្គីមនុស្សធម៌ទាំងអស់នេះហើយ គឺស្មើនឹង ចង្កឹះមួយបាច់គឺជាចង្កឹះខ្លឹមដែលធ្វើឲ្យកម្លាំងសត្រូវ បានឈ្លានពានមកលើប្រទេសជាតិ របស់យើងនេះ មានការភ័យខ្លាចនិងមិនហ៊ានឈ្លានពាន ដើម្បីយកទឹកដីយើងបានទៀតឡើយ។
នាឱកាសនោះ លោក ឃីម រដ្ឋា បានថ្លែងអំណរអរគុណដល់ទឹកចិត្តក្រុមការងារអង្គភាពគេហទំព័រ រស្មី ស្ទឹងត្រង់ ព្រមទាំងសម្បុរសជននានា ដែលបានផ្ដល់ជាសម្ភារៈ គ្រឿងឧបភោគ បរិភោគ និងថវិកា សម្រាប់ប្រគល់ជូន តាមរយៈលោក ដែលជាប្រធានអង្គភាព ដើម្បីយកទៅចែកជូនដល់កងទ័ព ដែលកំពុងបំពេញភារកិច្ចការពារទឹកដីរបស់យើងមិនឱ្យជនណាម្នាក់មកឈ្លានពានបានឡើយ និងបងប្អូនភៀសសឹក ដែលកំពុងស្នាក់នៅ ទីទួលមានសុវត្តិភាពនៅក្នុងវត្តពោធិ៍ ៥ពាន់ដើម ជាពិសេសក្រុមហ៊ុនInternational Office Supply Co.,Ltd បានចូលរួមឧត្ថម្ភម្សៅទឹកដោះគោសម្រាប់កូនក្មេង នឹងស្ត្រីពោះធំ និងបបរសម្រាប់កូនក្មេងផងដែរ។
សូមបញ្ជាក់ផងដែរថា សម្ភារៈដែលក្រុមការងាររបស់អង្គភាពគេហទំព័រ រស្មី ស្ទឹងត្រង់ ដឹកនាំដោយលោក ឃីម រដ្ឋា បាននាំយកទៅផ្តល់ជូនរួមមាន ៖ អង្ករ ១ តោន ទឹកសុទ្ធ ៤០០ យួរ មី ៣០ កេស ភេសជ្ជៈ ១០ កេស ទឹកត្រី ២០ យួរ ទឹកស៊ីអ៊ីវ ២០ យួរ ខោអាវ ៣០០ កំប្លេ នំបុ័ង ១០០ ដើម ។
អំណោយដែលសប្បុរសជននានាដែលបានជួយឧបត្ថម្ភដើម្បីចូលរួមចំណែកចលនាមនុស្សធម៌ តាមរយៈអង្គភាពគេហទំព័រ រស្មី ត្រង់ ដើម្បីយកជួយទៅដល់ បងប្អូនប្រជាពលរដ្ឋភៀសសឹក និង បងប្អូនវីរៈកងទ័ពសមរភូមិជួរមុខ ដែលកំពុងប្រឈមមុខជាមួយសត្រូវឈ្លានពានទឹកដីកម្ពុជា ។
ពេលនេះបាននាំយកមកដល់ហើយ និងសូមប្រសិទ្ធពរជ័យ សិរីសួស្តី ជ័យមង្គល វិបុលសុខ ជូនដល់បងប្អូនវីរៈកងទ័ពជួរមុខ និងបងប្អូនភៀសសឹកទាំងអស់ ជាពិសេសសប្បុរសជននានា ដែលបានចូលរួមឧបត្ថម្ភទាំងអស់សូមឲ្យជួបតែសេចក្តីសុខ សេចក្តីចម្រើន ជានិរន្តរ៍ ៕
