កំពង់ចាម ៖ ថ្ងៃទី២៦ ខែតុលា ឆ្នាំ២០២៥ ខណ្ឌរដ្ឋបាល ជលផលកំពង់ចាម សហការជាមួយអធិការដ្ឋានរដ្ឋបាលជលផលមេគង្គ ចុះទៅពិនិត្យទីតាំង និងស្រាវជ្រាវរកព័ត៌មានដល់កន្លែងកើតហេតុ នៅចំណុចកំពង់ទូកបឹងជ្រោយ ភូមិបឹងជ្រោយ ឃុំសូទិព្វ ស្រុកជើងព្រៃ ខេត្តកំពង់ចាម ករណីមានការចុះផ្សាយរបស់សារព័ត៌មាន សុផាត ញ៉ូ (SP News) ដែលបានផ្សាយកាលពី ថ្ងៃទី២៤ ខែតុលា ឆ្នាំ២០២៥ តាមប្រព័ន្ធព័ត៌មានអនឡាញហ្វេសប៊ុក (Fece book) ថាមានបទល្មើស នេសាទកាន់តែគគ្រឹកគគ្រេងនៅក្នុងបឹងជ្រោយ ព្រោះមានមេឈ្មួញដ៏ធំចាំប្រមូលទិញកូនត្រីយកធ្វើត្រី នុយឲ្យត្រីចិញ្ចឹមស៊ីក្នុងមួយថ្ងៃៗរាប់តោនចឹងសោះ។
ក្រោយពីការចុះស្រាវជ្រាវទទួលបានលទ្ធផលដូចខាងក្រោម៖
១. តំបន់បឹងជ្រោយសម្បូរការនេសាទជាលក្ខណៈទ្រង់ទ្រាយតូចៗ ហើយក៏គ្មានឈ្មួញធំៗចុះចាំទិញកូន ត្រីយកធ្វើត្រីនុយដែរ គឺមានតែអាជីវករក្នុងស្រុក មករង់ចាំទិញយកទៅលក់នៅតាមទីផ្សារ ឬយកទៅធ្វើប្រហុក ផ្អក ម៊ាំ ទឹកត្រី សម្រាប់ដោះស្រាយជីវភាពនៅក្នុងរដូវប្រាំង។
២. ប្រភេទឧបករណ៍នេសាទដែលប្រជានេសាទធ្វើអាជីវកម្មតាមទម្លាប់របស់ពួកគាត់រួមមាន៖ មង សន្ទូច ថ្នង លប រ៉ាវ សំណាញ់ និងឧបករណ៍ស្របច្បាប់ផ្សេងៗទៀត។ ចំណែកឧបករណ៍ល្មើសច្បាប់ដូចជា ស្បៃមុង របាំង ផ្ចិតព្រែក ឧបករណ៍ឆក់ត្រីជាដើម ត្រូវបានសមត្ថកិច្ចរួមសហការជាមួយអាជ្ញាធរមូលដ្ឋាន ចុះទប់ស្កាត់ និងបង្ក្រាប ជាប្រចាំ ប៉ុន្តែទោះជាយ៉ាងណាក៏នៅតែមានជនខិលខូចលបលួចប្រព្រឹត្ត ជាពិសេសនៅតំបន់ឆ្ងាយៗដែលសមត្ថកិច្ច ពិបាកទៅដល់ ៕
