ខេត្តកំពង់ស្ពឺ៖ ថ្ងៃទី០២ ខែវិច្ឆិកា ឆ្នាំ២០២៥ លោក បណ្ឌិត ឃឹម រដ្ឋា និងជាប្រធានអង្គភាពសារព័ត៌មាន រស្មី ស្ទឹងត្រង់ បានអញ្ជើញដង្ហែរអង្គកឋិនទានសាមគ្គី យកទៅវេប្រគេនព្រះសង្ឃដែលគង់ចាំព្រះវស្សានៅក្នុង វត្តអង្គក្តី ស្ថិតនៅភូមិព្រៃស្មាច ឃុំព្រៃវិហារ ស្រុកគងពិសី ខេត្តកំពង់ស្ពឺ ព្រមទាំងមានការអញ្ជើញចូលរួម ពីសំណាក់ ឯកឧត្តម ព្រំសំអឿន លោកជំទាវ ឆាយសុខន លោកជំទាវលឹមវណ្ណា លោកលីគឹមស៊ិន ព្រះសង្ឃគ្រប់ព្រះអង្គ លោក លោកស្រី និងសមាជិកសមាជិកា ព្រមទាំងពុទ្ធបរិស័ទចំណុះជើងវត្តយ៉ាងច្រើនកុះករ ឯកឧត្តម លោកជំទាវ និងសមាជិកសមាជិកាអង្គភាពគេហទំព័ររស្មីស្ទឹងត្រង់ ព្រមទាំងពុទ្ធបរិស័ទបានដង្ហែកឋិនទាន និងវេរប្រគេននូវកឋិនចីវរជូនចំពោះព្រះសង្ឃដែលបានគង់ចាំព្រះវស្សាអស់ត្រីមាស ដើម្បីទទួលបាននូវអានិសង្សដ៏ឧត្តុង្គឧត្តមក្នុងព្រះពុទ្ធសាសនា។ ក្រៅពីការបំពេញបុណ្យកុសល ពិធីនេះក៏មានគោលបំណងប្រមូលបច្ច័យ (ថវិកា) សម្រាប់កសាងសមិទ្ធផលនានាក្នុងវត្តអារាម និងបំពេញតាមតម្រូវការចាំបាច់ផងដែរ។
ពិធីបុណ្យកឋិនទាន គឺជាពិធីបុណ្យដ៏ធំមួយក្នុងព្រះពុទ្ធសាសនា ដែលប្រជាពលរដ្ឋខ្មែរ ក៏ដូចជាថ្នាក់ដឹកនាំរដ្ឋាភិបាលតែងតែចូលរួមធ្វើជាប្រធាន ឬជាសប្បុរសជន ដើម្បីប្រមូលបច្ច័យកសាងសមិទ្ធផលក្នុងវត្តអារាម និងវប្បធម៌។ ការចូលរួមក្នុងពិធីបុណ្យកឋិនទាន មិនត្រឹមតែជាការបំពេញបុណ្យកុសលតាមប្រពៃណីព្រះពុទ្ធសាសនាប៉ុណ្ណោះទេ ប៉ុន្តែក៏ជាការបង្ហាញនូវការយកចិត្តទុកដាក់របស់រាជរដ្ឋាភិបាលចំពោះវិស័យសាសនា ដែលជាមូលដ្ឋានគ្រឹះនៃសីលធម៌សង្គម។
កឋិនទាន ជាបុណ្យប្រពៃណីព្រះពុទ្ធសាសនា ដែលមានសម្តែងទុកក្នុង ព្រះវិន័យបិដក មហាវគ្គ កឋិនក្ខន្ធកៈ ដែលទាយក ទាយិកាមានសទ្ធាជ្រះថ្លា នាំយកចីវរទៅវេរប្រគេនព្រះភិក្ខុសង្ឃ ដែលបានគង់ចាំវស្សាអស់ត្រីមាស ក្នុងអាវាសវត្តណាមួយ និងជាទានវិសេស មានលក្ខណៈប្លែកជាងទានដទៃ ៥ យ៉ាង ភិក្ខុសង្ឃបានក្រាលគ្រងកឋិនទទួលបានសង្ឃលាភ និងអានិសង្ស ៥ ហើយអ្នកប្រគេនកឋិនចីវរ ក៏ទទួលបានអានិស្ស៥ផងដែរ ៕
