(ខេត្តកំពត)៖ ដោយយោងតាមអនុសាសន៍ដ៏ខ្ពង់ខ្ពស់របស់ សម្ដេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ហូបអំបុកខ្មែរការពារជាតិ សាសនា ព្រះមហាក្សត្រនៅថ្ងៃទី០៦ ខែវិច្ឆិកា ឆ្នាំ២០១៩ នេះ លោកស្រីលាង ហៃ ជាវ តាយ អនុប្រធានអចិន្ត្រៃយ៍គណៈកម្មាធិការ សាខាកាកបាទក្រហមកម្ពុជាខេត្តកំពត បានដឹកនាំចុះ ច្រូតស្រូវ ដាល់អំបុក ដើម្បីរៀបចំពិធីទទួលទានអំបុកខ្មែរ ការពារជាតិ សាសនា ព្រះមហាក្សត្រ។
ពិធីនេះបានប្រព្រឹត្តទៅនៅវត្តពេជ្រចង្វារ ស្ថិតក្នុងឃុំភ្នំកុង ស្រុកអង្គរជ័យ ខេត្តកំពត ដែលមានការចូលរួមពីសមាជិកកាកបាទក្រហម ភរិយាថ្នាក់ដឹកនាំខេត្ត ថ្នាក់ស្រុកព្រមទាំងយុវជនកាកបាទក្រហម អ្នកស្ម័គ្រចិត្តកាកបាទក្រហម មន្ត្រីនៃអាជ្ញាធរមូលដ្ឋានឃុំ ស្រុក និងប្រជាពលរដ្ឋ ព្រះសង្ឃ សរុបប្រមាណ ១០០នាក់ ប្រកបដោយបរិយាកាសសប្បាយរីករាយ និងហូបបាយសាមគ្គី។
ក្នុងឱកាសដ៏វិសេសវិសាលនេះ លោកស្រី លាងហៃ ជាវ តាយ បានលើកឡើងថា យើងត្រូវរួមគ្នា ការពារថែរក្សាសុខសន្តិភាពឲ្យបានគង់វង្ស ហើយលោកតា លោកយាយ និងបងប្អូនប្រជាពលរដ្ឋទាំងអស់សូមកុំជឿពាក្យញុះញង់ ពាក្យកុហក បោកប្រាស់របស់ក្រុមឧទ្ទាមក្រៅច្បាប់ ដែលមានជនក្បត់ជាតិ សម រង្សុី ជាមេក្លោង ដែលជានិច្ចកាលតែងតែកុហកភូតភរប្រជាពលរដ្ឋគ្រប់ទីកន្លែង។
លោកស្រី លាង ហៃ ជាវ តាយ ក៏បានបញ្ជាក់ផងដែរថា ការច្រូតស្រូវបុកអំបុកនេះ គឺយើងពិសាររួមគ្នា ដើម្បីការពារជាតិ សាសនា ព្រះមហាក្សត្រ៕
