(ខេត្តកំពត) ៖ ដើម្បីធ្វើឱ្យមានភាពប្រសើរឡើងធានាបាននូវសណ្ដាប់ធ្នាប់សាធារណៈ និងសោភ័ណភាព តាមដងផ្លូវនិងសួនសាធារណៈ និងលំនៅដ្ឋានរបស់ប្រជាពលរដ្ឋនៅក្នុងក្រុងកំពត ក្នុងគោលដៅឆ្ពោះទៅកាន់ការទាក់ទាញភ្ញៀវទេសចរណ៍ ពិសេស សម្រាប់ត្រៀមរៀបចំព្រឹត្តិការណ៍ពិធីបុណ្យសមុទ្រនៅចុងឆ្នាំ២០១៩ រួមនិងព្រឹត្តិការណ៍ទេសចរណ៍ធំៗប្រចាំឆ្នាំមួយចំនួនទៀតអោយប្រកបដោយភាពជោគជ័យផងនោះ ។
នៅព្រឹកថ្ងៃទី១១ខែវិច្ឆិកាឆ្នាំ២០១៩ លោក ជាវ តាយ អភិបាលនៃគណៈអភិបាលខេត្តកំពត បានដឹកនាំមន្ត្រីនៃមន្ទីរ អង្គភាពជំនាញពាក់ព័ន្ធ អាជ្ញាធរក្រុង និងសង្កាត់ ចុះពិនិត្យលទ្ធផលនៃការដ្ឋានសាងសង់ក្លោងទ្វារពហុកីឡដ្ឋានខេត្ត បម្រើឱ្យដល់ព្រឹត្តិការណ៍បុណ្យសមុទ្រនិងក៏បានបន្តចុះ ធ្វើដំណើរតាមរថយន្តដើម្បីត្រួតពិនិត្យតាមដងផ្លូវក្នុងសង្កាត់នីមួយៗនៃក្រុងកំពត អំពីលទ្ធផលនិងបញ្ហាប្រឈមនៅសេសសល់មួយចំនួនក្រោយពីឯកឧត្តមអភិបាលខេត្តបានណែនាំជំរុញដាក់វិធានការណ៍ឱ្យអនុវត្តជាច្រើនលើកកន្លងមក។
ជាលទ្ធផលនៃការចុះពិនិត្យនៅតាមដងផ្លូវ និងសួនសាធារណៈសំខាន់ៗក្នុងសង្កាត់នីមួយៗនៃក្រុងកំពត សង្កេតឃើញថានៅពុំទាន់មានលក្ខណៈល្អប្រសើរនៅឡើយ ដោយពិនិត្យឃើញស្ថានភាពបែបនេះ ស្ថិតក្នុងជំហរអ្នកដឹកនាំស្មារតីទទួលខុសត្រូវខ្ពស់ លោក ជាវ តាយ អភិបាលខេត្ត បានណែនាំដល់ចៅសង្កាត់ និងអភិបាលក្រុង រួមនឹងមន្ទីរ អង្គភាពជំនាញពាក់ព័ន្ធទាំងអស់ត្រូវតែបង្កើនស្មារតីយកចិត្តទុកដាក់ទទួលខុសត្រូវខ្ពស់ អំពីតួនាទីភារកិច្ចរបស់ខ្លួនតាមមុខសញ្ញាបន្ថែមទៀត។
ពិសេសជាងនេះ អាជ្ញាធរក្រុងសង្កាត់ទាំងប្រាំត្រូវតែបង្កើនការយកចិត្តទុកដាក់សហការគ្នាដោយទទួលខុសត្រូវឱ្យបានសស្រាក់សស្រាំទាំងអស់គ្នាបន្ថែមទៀតលើការងារកែលម្អសោភណ្ឌភាពសណ្ដាប់ធ្នាប់សាធារណៈនិងអនាម័យបរិស្ថានក្រុង ហើយការងារដែលត្រូវយកចិត្តទុកដាក់សំខាន់ថែមទៀតដែរនោះ គឺអាជ្ញាធរក្រុងសង្កាត់ក៏ត្រូវយកចិត្តទុកដាក់ក្នុងចលនាបំផុសផ្សព្វផ្សាយ តាមរយៈមធ្យោបាយផ្សេងៗ ដល់ប្រជាជន ឱ្យបានចូលរួមអនុវត្ត និងលើកកម្ពស់ទាំងអស់គ្នាពីបញ្ហាសោភ័ណភាពសណ្ដាប់ធ្នាប់សាធារណៈនិងអនាម័យបរិស្ថានក្នុងក្រុងកំពតឲ្យបានកាន់តែល្អប្រសើរឡើង៕ សេង ណារិទ្ធ
