ភ្នំពេញ ៖ ពិតជាសង្វេគណាស់ នារីម្នាក់បានស្លាប់ភ្លាមៗ នៅនិងកន្លែងកើតហេតុ ក្នុងគ្រោះថ្នាក់ចរាចរបង្កឡើងដោយរថយន្តដឹកឥដ្ឋបើកបុកពីក្រោយម៉ូតូហើយកិនដាច់ខ្លួនជាពីរខ្ទេចវល់ បង្កឲ្យមានការភ្ញាក់ផ្អើល កាលពីវេលាម៉ោង៨និង៣០នាទីព្រឹក ថ្ងៃទី១ ខែមីនា ឆ្នាំ២០២២ ស្ថិតនៅតាមផ្លូវ៣០ម៉ែត្រ ទល់មុខផ្សារឡាក់គី ក្នុងភូមិទ្រង់មាន់ សង្កាត់អូរបែកក្អម ខណ្ឌសែនសុខ ។
ប្រភពពីកន្លែងកើតហេតុបានឲ្យដឹង ថានារីរងគ្រោះមានឈ្មោះ លាង ពេជ្ររស្មី អាយុ២១ឆ្នាំមុខរបរបុគ្គលិកផ្សារឡាក់គី មានទីលំនៅភូមិ ៤ សង្កាត់បឹងសាឡាង ខណ្ឌទួលគោក បានស្លាប់ក្នុងសភាពបែកខ្ទេច ។
ជនរងគ្រោះជិះម៉ូតូម៉ាក Honda ZOOMERX ពណ៌សពាក់ស្លាកលេខ ភ្នំពេញ 1GQ-3065 ជាមធ្យោបាយ ។ ចំណែកភាគីខាងរថយន្តបង្កម៉ាកហ៊ីយ៉ាន់ដាយ ពណ៌ស ពាក់ស្លាកលេខភ្នំពេញ 3C-3531 ដឹកឥដ្ឋ អ្នកបើកបរបានគេចខ្លួនបាត់ស្រមោល សល់តែកម្មករលើកឥដ្ឋចំនួនបីនាក់ ប្រុសមួយនាក់ ស្រីពីរនាក់ ។
តាមប្រភពនៅកន្លែងបានឲ្យដឹងថា មុនកើតហេតុ ជនរងគ្រោះជិះម៉ូតូចេញពីផ្ទះឆ្ពោះទៅកន្លែងធ្វើការ តាមផ្លូវ៣០ម៉ែត្រ ក្នុងទិសដៅពីខាងត្បូង ទៅខាងជើងដល់កន្លែងកើតហេតុ បត់ឆ្លងផ្លូវត្រឡប់ក្រោយវិញ ដើម្បីចូលកន្លែងធ្វើការ ។ គ្រាន់តែឆ្លងផុតចូលចំណែកផ្លូវម្ខាង ហើយពីខាងជើងទៅខាងត្បូង ស្រាប់តែរថយន្តបង្កដឹកឥដ្ឋបើកពីខាងជើងទៅខាងត្បូងក្នុងល្បឿនលឿន បុកពីក្រោយម៉ូតូជនរងគ្រោះដួល ហើយកិនស្លាប់ភ្លាមៗតែម្តង ហើយរថយន្តមិនបានឈប់ទេ ដោយបើកបន្តទៅមុខបានជាង២០០ម៉ែត្រ ទើបឈប់ស្ងៀម ហើយអ្នកបើកបរចុះរត់គេចខ្លួនបាត់ ។
ក្រោយកើតហេតុភ្លាមៗ សមត្ថកិច្ចចុះទៅអន្តរាគមន៍ពិនិត្យជាក់ស្តែង រួចប្រគល់សពជូនក្រុមគ្រួសារចាត់ចែងដឹកយកទៅធ្វើបុណ្យតាមប្រពៃណីចំណែករថយន្តបង្កនិងម៉ូតូ ។
សមត្ថកិច្ចវាស់វែងរួចយកទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញរង់ចាំដោះស្រាយតាមផ្លូវច្បាប់ ៕
