ថ្ងៃអាទិត្យទី២៣ ខែមិថុនា ឆ្នាំ២០១៩នេះ លោកជំទាវឧកញ៉ា ម៉ៅ មាល័យ កែ គឹមយ៉ាន ប្រធានកិត្តយសសមាគមនារី ដើម្បីសន្តិភាព និងអភិវឌ្ឍន៍ខេត្តបន្ទាយមានជ័យ និងវត្តមានអញ្ជើញចូលរួមពី ឯកឧត្តម អ៊ុំ រាត្រី អភិបាលខេត្តបន្ទាយមានជ័យ និងលោកជំទាវ ព្រមទាំងក្រុមការងារ អាជ្ញាធរមូលដ្ឋាន និងយុវជន បានអញ្ជើញជាអធិបតី ពិធីបើកការដ្ឋានស្ថាបនាផ្លូវ ១ខ្សែ ទៅកាន់ប្រាសាទមេបុណ្យ និងស្ពានឈើឆ្លងបារាយប្រវែង ៨០០ម៉ែត្រ ប្រាសាទមេបុណ្យ ឋិតភូមិបន្ទាយឆ្មារជើង ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ ។
មានប្រសាសន៍ក្នុងពិធីបើកការដ្ឋាននោះ ឯកឧត្តម អ៊ុំ រាត្រីអភិបាលខេត្ត បានលើកថាដោយមេីលឃេីញពីសក្តានុពលនៃតំបន់ទេសចរណ៍នៅប្រាសាទមេបុណ្យ និងបារាយទឹកដ៍ធំនោះ ។ម្យ៉ាងទៀតដោយសារ គ្មានហេដ្ឋរចនាសម្ព័ន្ធតភ្ជាប់ ទៅកាន់ទីនោះ ទើបលោកជំទាវឧកញ៉ា ម៉ៅ មាល័យ បានផ្តល់អំណោយ ជាផ្លូវ ១ខ្សែ ប្រវែង ១០គីឡូម៉ែត្រ តភ្ជាប់ពីផ្លូវជាតិ៥៦ ចូលទៅកានប្រាសាទផ្នែកខាងជើង រួមទាំងស្ពានឈើឆ្លងប្រវែង ៨០០ម៉ែត្រ ពីខ្នងខាងជើងបារាយទៅកាន់ចំណុចកណ្តាលនៃបារាយទឹកនៃប្រាសាទផងដែរ ។
ឯកឧត្តមអភិបាលខេត្តបន្តថា ការស្ថាបនាជាហេដ្ឋរចនាសម្ព័ន្ធតភ្ជាប់នេះពិតជាមានសារៈប្រយោជន៍ខ្លាំងណាស់ សម្រាប់បម្រើឲ្យវិស័យទេសចរណ៍ និងគមនាគមដឹកជញ្ជូនកសិផលស្រូវ ដំឡូងប្រជាពលរដ្ឋនៅតំបន់នោះទៀតផង ។
ជាមួយគ្នានោះ ឯកឧត្តម អ៊ុំ រាត្រី ក្នុងនាមរដ្ឋបាលខេត្ត សូមថ្លែងការគោរពអរគុណយ៉ាងជ្រាលជ្រៅ ចំពោះ លោកជំទាវឧកញ៉ា ម៉ៅ មាល័យ ដែលជានិច្ចកាលតែងតែយកចិត្តទុកដាក់ចូលរួមចំណែកក្នុងការកសាង ស្ថាបនាហេដ្ឋរចនាសម្ព័ន្ធរូបវ័ន្តមានផ្លូវ ថ្នល់ សាលារៀន អាងទឹកប្រឡាយ និងជួយឧបត្ថម្ភ ការរៀបចំកែលម្អប្រាង្គប្រាសាទបុរាណនានាជាដើម ជាអាទ៍ ប្រាសាទបន្ទាយឆ្មារ បានប្រែក្លាយមុខមាត់ឡើងជាលំដាប់ និងបន្តមកជួយកសាង រៀបចំប្រាសាទមេបុណ្យនេះ ៕
