(ខេត្តកំពត)៖ នៅព្រឹកថ្ងៃទី៣០ ខែមិថុនា ឆ្នាំ២០១៩ លោក ជាវ តាយ អភិបាល នៃគណៈអភិបាលខេត្តកំពត រួមនិងសមាជិក សមាជិកាក្រុមប្រឹក្សាខេត្ត ថ្នាក់ដឹកនាំខេត្ត និងមន្ទីរអង្គភាពជុំវិញខេត្តបាន អញ្ជើញចូលរួមជាមួយក្រុមសម្ព័ន្ធគ្រូពេទ្យសហភាពសហព័ន្ធយុវជនកម្ពុជា ដែលដឹកនាំដោយ លោក ហេង សុខគង់ រដ្ឋលេខាធិការក្រសួងឧស្សាហកម្មនិងសិប្បកម្ម និងជាប្រធានសម្ព័ន្ធគ្រូពេទ្យ សហភាពសហព័ន្ធយុវជនកម្ពុជា នៅក្នុងកម្មវិធីពិនិត្យនិងព្យាបាលជំងឺដោយឥតគិតថ្លៃជូនប្រជាពលរដ្ឋនិងបងប្អូនកម្មករ កម្មការិនី នៅភូមិត្រពាំងពោន ឃុំបន្ទាយមាសខាងកើត ស្រុកបន្ទាយមាសខេត្តកំពត។
ក្នុងឱកាសនោះ លោក ហេង សុខគង់បានឱ្យដឹងថា៖ កម្មវិធីនៃការពិនិត្យនិងព្យាបាលជំងឺជូនប្រជាពលរដ្ឋដោយឥតគិតថ្លៃពេលនេះគឺជាកម្មវិធីមនុស្សធម៌ មានរយៈពេលមួយថ្ងៃដោយមិនមានការរើសអើង ហើយមានវេជ្ជបណ្ឌិតគ្រូពេទ្យខ្មែរជំនាញៗមានបទពិសោធន៍
ព្រមទាំងសម្ភារៈបរិក្ខារពេទ្យទំនើបៗ និងឱសថល្អៗរួមនិងសហការីសរុបចំនួន៣៣៨នាក់ ដោយត្រូវព្យាបាលជំងឺមានចំនួន១៦ប្រភេទ រួមមានជំងឺទូទៅ,ជំងឺបេះដូងនិងជំងឺសរសៃឈាម,ជំងឺមនុស្សចាស់, ជំងឺត្រចៀក ច្រមុះបំពង់ក, ជំងឺភ្នែក, ជំងឺសើរស្បែកនិងកាមរោគ, ជំងឺផ្លូវចិត្ត,ជំងឺកុមារ, ជំងឺសន្លាក់និងគីស ដោយមានប្រជាពលរដ្ឋមកទទួលការពិនិត្យនិងព្យាលប្រមាណ ៣៥០០នាក់។
មានប្រសាសន៍សំណេះសំណាលនាពេលនេះ លោក ជាវ តាយ អភិបាលខេត្ត បានពាំនាំការផ្ដាំផ្ញើសួរសុខទុក្ខពីសំណាក់សម្ដេច តេជោហ៊ុនសែន និងសម្ដេចកត្តិព្រឹទ្ធបណ្ឌិត ប៊ុន រ៉ានី ហ៊ុន សែនជូនចំពោះប្រជាពលរដ្ឋ ដែលជានិច្ចកាលសម្តេចទាំងទ្វេរតែងតែគិតគូរយកចិត្តទុកដាក់ខ្ពស់នូវសុខទុក្ខរបស់បងប្អូនប្រជាពលរដ្ឋយើងគ្រប់កាលៈទេសៈ។
លោកអភិបាលខេត្តក៏បានកោតសរសើរដល់ក្រុមគ្រូពេទ្យនិងសហការីទាំងអស់ពិសេស ឯកឧត្តម ហ៊ុន ម៉ានី ដែលបានរៀបចំចាត់បញ្ជូនក្រុមគ្រូពេទ្យដែលបានបះបង់កម្លាំងកាយចិត្តពេលវេលាដើម្បីចុះមកពិនិត្យនិងព្យាបាលជំងឺជូនប្រជាពលរដ្ឋទូទៅនិងចាត់ទុកកម្មវិធីចុះពិនិត្យនិងព្យាបាលជម្ងឺជូនប្រជាពលរដ្ឋរបស់ក្រុមគ្រូពេទ្យពេលនេះ គឺផ្ដើមចេញពីកត្តានៃសុខសន្តិភាព ក្រោមការដឹកនាំប្រទេសប្រកបដោយគតិបណ្ឌិតរបស់សម្ដេចតេជោ ហ៊ុន សែន ក្នុងស្មារតីមនុស្សធម៌ដែលស្ដែងចេញពីសេចក្ដីស្រឡាញ់ក្នុងនាមឈាមជ័រខ្មែរដូចគ្នា ខ្មែរស្រឡាញ់ខ្មែរ ខ្មែររួបរួមគ្នាតែមួយ អនាគតតែមួយ ពោលគឺការព្យាបាលមិនប្រកាន់បក្សពួក សាសនា ឬនិន្នាការនយោបាយណាមួយឡើយសំដៅធ្វើយ៉ាងណាដើម្បីរួមចំណែកការកាត់បន្ថយភាពក្រីក្រ ប្រជាពលរដ្ឋបានមួយចំណែកជាមួយរាជរដ្ឋាភិបាលផងដែរ។
ជាមួយនេះដែរ លោក ជាវ តាយ ក៏បានសំណូមពរផ្ដាំផ្ញើដល់ប្រជាពលរដ្ឋយើងទាំងអស់ឱ្យចេះរួបរួមសាមគ្គីគ្នាថែរក្សាអ្វីៗដែលមានពិសេសសុខសន្ដិភាពដូចសព្វថ្ងៃនេះឱ្យបានគង់វង្ស។
ក្នុងឱកាសនោះលោកអភិបាលខេត្តក៏បានផ្ដាំផ្ញើប្រជាពលរដ្ឋអោយថែរក្សាសុខភាពដោយប្រកាន់ខ្ជាប់នូវអនាម័យរស់នៅស្អាត បរិស្ថានល្អ មិនមានសំរាម ថ្លុកទឹកដក់និងសម្ភារៈដែលជាជម្រកមូសខ្លាដែលជាភ្នាក់ងារបង្កជំងឺគ្រុនឈាម ដែលតែងតែបង្កគ្រោះថ្នាក់លើកុមារផងដែរ៕
