ខេត្តបាត់ដំបង.. ព្រឹកថ្ងៃពុធ ២រោច ខែជេស្ឋ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី១៩ ខែមិថុនា ឆ្នាំ២០១៩ ឯកឧត្តម ងួន រតនៈ អភិបាល នៃគណៈអភិបាលខេត្តបាត់ដំបង បានអញ្ជើញជាអធិបតីក្នុងពិធីប្រកាសចូលកាន់តំណែងក្រុមប្រឹក្សា ស្រុកថ្មគោល អាណត្តិទី៣ នៅបរវេណសាលា ស្រុកថ្មគោល។
ក្នុងពិធីនេះផងដែរ ក៏មានការអញ្ជើញចូលរួមពីឯកឧត្តម លោកជំទាវ សមាជិកក្រុមប្រឹក្សាខេត្ត មន្ទីរ អង្គភាព កងកម្លាំងប្រដាប់អាវុធ មន្ត្រីរាជការ ក្រុមប្រឹក្សាសង្កាត់ ។
លោក គិម វណ្ណៈ អភិបាល នៃគណៈអភិបាល ស្រុកថ្មគោល បានឡើងអានសុន្ទរកថាស្វាគមន៍ និងរបាយការណ៍សង្ខេបជូន ឯកឧត្តម អភិបាល នៃគណៈអភិបាលខេត្ត និងអង្គពិធីទាំងមូល អំពីលទ្ធផលការងារសំខាន់ៗ ដែលបានសម្រេចបានរយៈពេលកន្លងមកក្នុងអាណត្តិទី២ របស់ក្រុមប្រឹក្សា ស្រុកថ្មគោលទាំងមូល រយៈពេល ៥ឆ្នាំ ។
តាមអនុក្រឹត្យស្តីពីការទទួលស្គាល់ សមាជិកក្រុមប្រឹក្សា ស្រុកថ្មគោល អាណត្តិទី៣ មានចំនួន…21………រូប ក្នុងនោះ លោក អ៊ូច អ៊ាង ត្រូវបានប្រកាសជាប្រធានក្រុមប្រឹក្សា ស្រុកថ្មគោលអាណត្តិទី៣ រួមនឹងលោក លោស្រី ចំនួន ២០រូបទៀត ជាសមាជិក សមាជិកា ក្រុមប្រឹក្សាស្រុកថ្មគោល ។
លោក អ៊ូច អ៊ាងប្រធានក្រុមប្រឹក្សាស្រុកថ្មគោលដែលទើបបានប្រកាសតែងតាំងសម្រាប់អាណត្តិទី៣នេះ បានអញ្ជើញឡើងមានចំណាប់អារម្មណ៍ និងធ្វើការប្តេជ្ញាចិត្ត ជូនអង្គពិធីទាំងមូល ។
ឯកឧត្តម ងួន រតនៈ អភិបាល នៃគណៈអភិបាលខេត្តបាត់ដំបង បានមានប្រសាសន៍ថា ក្នុងនាម ក្រសួងមហាផ្ទៃ ឯកឧត្តម សូមចូលរួមអបអរសាទរ និងកោតសរសើរ ព្រមទាំងវាយតម្លៃខ្ពស់ ចំពោះលោក លោកស្រី ជាសមាជិក សមាជិកា ក្រុមប្រឹក្សាស្រុកថ្មគោល ដែលត្រូវបានតំណាងប្រជាពលរដ្ឋ គឺសមាជិកក្រុមប្រឹក្សាសង្កាត់ ផ្តល់សេចក្តីទុកចិត្ត បោះឆ្នោតជ្រើសរើសជាសមាជិកក្រុមប្រឹក្សាស្រុកថ្មគោល អាណត្តិទី៣ ដើម្បីដឹកនាំស្រុកថ្មគោល ឲ្យមានការអភិវឌ្ឍ និងរីកចម្រើនបន្តទៀត ។
ឯកឧត្តមបានបន្ថែមទៀតថា ចាប់តាំងពីការបោះឆ្នោតជ្រើសតាំងតំណាងរាស្ត្រនីតិកាលទី១ ឆ្នាំ១៩៩៣ រហូតមកទល់ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌឆ្នាំ២០១៩នេះ ព្រះរាជាណាចក្រកម្ពុជាយើងបានធ្វើការបោះឆ្នោតតាមគោលការណ៍នៃលទ្ធិប្រជាធិបតេយ្យ សេរីពហុបក្ស សរុបចំនួន១៥លើករួចមកហើយ។ ពីការបោះឆ្នោតមួយទៅកាន់ការបោះឆ្នោតមួយ មជ្ឈដ្ឋានជាតិ និងអន្តរជាតិបានវាយតម្លៃថា ដំណើរការប្រជាធិបតេយ្យ និងការបោះឆ្នោតនៅកម្ពុជាកាន់តែវិវត្តន៍រីកចម្រើនជាលំដាប់។ ការបោះឆ្នោតទាំងនេះ ត្រូវបានរៀបចំឡើងយ៉ាងទៀងទាត់ និងដំណើរការប្រកបដោយលក្ខណៈបើកចំហរ សេរី ត្រឹមត្រូវ យុត្តិធម៌ ទាំងការបោះឆ្នោតដោយផ្ទាល់ និងមិនផ្ទាល់ ទាំងនៅថ្នាក់ជាតិ និងថ្នាក់ក្រោមជាតិ ស្របតាមរដ្ឋធម្មនុញ្ញ និងច្បាប់បោះឆ្នោត។ អាស្រ័យដោយមានការប្តេជ្ញាចិត្តខាងនយោបាយដ៏មុតមាំនេះ ប្រទេសជាតិយើងរក្សាបានកាន់តែរឹងមាំនូវសុខសន្តិភាព សេ្ថរភាពខាងនយោបាយ សន្តិសុខ សណ្តាប់ធ្នាប់សាធារណៈ សម្រាប់ជាមូលដ្ឋានគ្រឹះក្នុងការអភិវឌ្ឍសេដ្ឋកិច្ច សង្គមឲ្យមានការរីកចម្រើនយ៉ាងឆាប់រហ័ស។
ឯកឧត្តមបន្ថែមថា ចំពោះការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌអាណត្តិទី៣ កាលពី ថ្ងៃទី២៦ ខែឧសភា ឆ្នាំ២០១៩ កន្លងមក ក៏ត្រូវបានវាយតម្លៃថាមានលក្ខណៈសេរី ត្រឹមត្រូវ យុត្តិធម៌ និងគ្មានអំពើហិង្សា ហើយលទ្ធផលនៃការបោះឆ្នោត ក៏ត្រូវបានទទួលស្គាល់ពីគណបក្សនយោបាយនានា ដែលបានចូលរួមក្នុងការបោះឆ្នោតនេះផងដែរ។
