(ខេត្តកំពត)៖ ផ្លូវជាតិលេខ៣៣ ចាប់ពីចំណុចផ្សារជុំគ្រៀល រហូតដល់ភូមិសាស្ត្រឃុំត្រពាំងសង្កែ ស្រុកទឹកឈូ ដែលមានប្រវែងប្រមាណជិត៩គីឡូម៉ែត្រ បានប្រែជារលួយវ៉ល់ខណៈមានភ្លៀងធ្លាក់បន្តបន្ទាប់គ្នាបីថ្ងៃកន្លងមក។
ចំពោះស្ថានភាពផ្លូវក្លាយជាបែបនេះ បើតាមការលើកឡើងពីអ្នកដំណើរគ្រប់រូប បាននិយាយថា ផ្លូវលេខ៣៣ចាប់ពីផ្លូវបំបែកតាអេង រហូតដល់ចំណុចភូមិសាស្ត្រឃុំត្រពាំងសង្កែ នៃស្រុកទឹកឈូ ត្រូវបានក្រុមហ៊ុនដែលម៉ៅការជួសជុល ធ្វើការឈូសឆាយកាលពីដើមខែឧសភា ប៉ុន្តែបន្ទាប់ពីឈូសឆាយផ្លូវប្រវែងជិត១០គីឡូម៉ែត្រនេះអ្នកម៉ៅការបែរជាជួសជុលមានសភាពយឺតយ៉ាវ ដោយទុកផ្លូវដែលឈូសរួចចោលឱ្យនៅម៉េម៉ាយរាប់ខែតែម្តង គាប់ជួនមេឃភ្លៀងខ្លាំងរយៈពេលបូថ្ងៃ ស្រាប់តែក្លាយជាបែកវ៉ល់ស្ទើធ្វើដំណើរមិនកើត។
អ្នកដំណើរបានរិះគន់ទៀតថា ខាងក្រុមហ៊ុនពេលឈូសឆាយហាក់គ្មានគិតគូរពីផលប៉ះពាល់ជាច្រើនដែលបង្កឡើងនៅចំពោះមុខ ដូចជាពេលមេឃរាំងហួតហែងគឺពុំបានស្រោចទឹកបណ្តាលឱ្យផ្លូវនេះក្លាយជាទីតាំងបង្ហុយធូលីរំខានដល់ការធ្វើដំណើររបស់ប្រជាពលរដ្ឋគ្រប់ពេល លុះពេលមានភ្លៀងធ្លាក់ខ្លាំង ក៏ប្រែទៅជារលួយវ៉ល់ស្ទើធ្វើដំណើរមិនបាន ហើយរហូតដល់ថ្ងៃទី០៥ ខែកក្កដា ឆ្នាំ២០១៩នេះ ស្ថានភាពផ្លូវក៏កាន់តែពិបាកធ្វើចរាចរទៅទៀត ព្រោះដងផ្លូវនេះក្រៅពីបែកភក់ ថែមទាំងមានជង្ហុកដូចរន្ធបាយខុមផងដែរ។
គេបាnរិះគន់ទៀតថា បើខាងក្រុមហ៊ុនជួសជុលក្នុងសភាពយឺតយ៉ាវបែបនេះ ម្តេចមិនឈូសឆាយតែកន្លែងធ្វើសិនទៅ ចុះហេតុម្តេចបានជាយកគ្រឿងចក្រទៅឈូសឆាយផ្លូវជិត១០គីឡូម៉ែត្រ រួចទុកចោលរាប់ខែបែបនេះទៅវិញ។
គេនៅចាំបានថា កន្លងមកអភិបាលខេត្តកំពត គឺលោក ជាវ តាយ តែងតែធ្លាប់ព្រមានខ្លាំងៗ ព្រមទាំងដាស់តឿនដល់ក្រុមហ៊ុនដែលកំពុងជួសជ្រុលផ្លូវស្ថិតតាមខ្សែក្រវាត់ក្រុង ត្រួវតែធ្វើការជួសជុលផ្លូវឱ្យបានលឿន ឆាប់រហ័ស ដោយអនុវត្តទៅតាមស្តង់ដារ និងតាមបទដ្ឋានបច្ចេកទេស ដោយមិនត្រូវធ្វើឱ្យរួចតែពីដៃនោះឡើយ។
ជាមួយគ្នានេះ ចំណុចផ្លូវជាតិលេខ៣៣ ដែលក្រុមហ៊ុនឈូសឆាយទុកយូរក៏ក្លាយជាជង្ហុកធំៗ យ៉ាប់ជាងមិនទាន់ជួសជុលទៅទៀត។អ្នកដំណើររិះគន់ទៀតថា កាលពីរដូវវស្សាឆ្នាំមុនផ្លូវនេះរលួយវ៉ល់ម្តងហើយ ស្រាប់តែចូលមកដល់ខែវស្សាឆ្នាំនេះក៏រលួយវ៉ល់ដូចឆ្នាំមុនតែដដែល..តើពេលណាទៅទើបធ្វើឱ្យរួចរាល់ បើសកម្មភាពជួសជុលយឺតជាងសត្វអណ្តើកវាទៅទៀតនោះតើអ្នកដំណើរត្រូវជួបបញ្ហាលំបាកដល់ពេលណា?៕
