ខេត្តស្ទឹងត្រែង÷ នៅថ្ងៃទី២៨ ខែមេសាឆ្នាំ២០២៥ អភិបាលនៃខណៈអភិបាលខេត្តស្ទឹងត្រែង ឯកឧត្តម សរ សុពុត្រា បានចេញដីកាស្តីពីការប្រកាសបដិសេធ និងដកហូតដីព្រៃឈើដែលទទួលរងនូវការកាប់គាស់ រុករាន ទន្ទ្រានយកដីព្រៃ របស់រដ្ឋដើម្បីវាតយកដីធ្វើកម្មសិទ្ធិដោយខុសច្បាប់ លើទីតាំងដីចំនួន ០១កន្លែងដែលមានផ្ទៃដីសរុប ៤៨៧ហិកតា (បួនរយប៉ែតសិបប្រាំពីរហិកតាគត់) និងដំណាំនៅលើដីទាំងអស់ ក្នុងតំបន់ឧទ្យានជាតិវីនសៃ-សៀមប៉ាង ស្ថិតក្នុង ឃុំស្ដៅ និងឃុំសាមមួយ ស្រុកសេសាន ខេត្តស្ទឹងត្រែង ដូចមានចំណុចនិយាមកា និងផែនទីបង្ហាញទីតាំងភ្ជាប់មកជាមួយ។
ឯកឧត្តម សរ សុពុត្រា បានកំណត់រយៈពេល ៣០ថ្ងៃ គិតចាប់ពីថ្ងៃចុះហត្ថលេខានេះតទៅសម្រាប់ទុកសិទ្ធិដើម្បីធ្វើការតវ៉ា និងបញ្ជាឱ្យនាយករដ្ឋបាលសាលាខេត្ត អភិបាលស្រុកសេសាន ប្រធានមន្ទីរបរិស្ថានខេត្តស្ទឹងត្រែង គណៈកម្មាធិការ គ្រប់គ្រងដីរដ្ឋខេត្តស្ទឹងត្រែង និងប្រធានមន្ទីរ-អង្គភាពពាក់ព័ន្ធនានាត្រូវអនុវត្តដីកានេះឱ្យមានប្រសិទ្ធភាពខ្ពស់ ចាប់ពី ថ្ងៃចុះហត្ថលេខានេះតទៅ៕
