កំពង់ចាម ៖ លោកជំទាវ មាស ច័ន្ទធីតា អនុរដ្ឋលេខាធិការ ក្រសួងបរិស្ថាន តំណាងដ៏ខ្ពង់ខ្ពស់ ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានអញ្ជើញជាអធិបតីក្នុងពិធីបើកសិក្ខាសាលាពិគ្រោះយោបល់ ស្តីពីគោលការណ៍ការទទួលស្គាល់ និងការលើកទឹកចិត្តដល់បុគ្គលដែលបានចូលរួមប្រតិបត្តិសកម្មភាពមេត្រីបរិស្ថាន និងប្រើប្រាស់បច្ចេកវិទ្យាទ្រទ្រង់បរិស្ថាន និងផ្តល់លិខិតថ្លែងអំណរគុណដល់រូបវន្តបុគ្គល និងនីតិបុគ្គលដែលបានចូលរួមអនុវត្តយុទ្ធនាការសម្អាតផ្លូវជាតិ «ផ្លូវជាតិគ្មានសំរាម និងសំណល់ប្លាស្ទិក» ព្រមទាំងមានការអញ្ជើញចូលរួមពីសំណាក់ ឯកឧត្តម គន់ សុភា អភិបាលរង នៃគណៈអភិបាលខេត្តកំពង់ចាម តំណាងរដ្ឋបាលខេត្ត ក្រុង ស្រុក នៃខេត្តកំពង់ចាម មន្ទីរពាក់ព័ន្ធ និងមន្ត្រី នៃមន្ទីរបរិស្ថានរាជធានី ខេត្ត សរុបចំនួន ២០០នាក់ ស្ថិតនៅសាលាខេត្តកំពង់ចាម នាព្រឹកថ្ងៃទី២៩ ខែមេសា ឆ្នាំ២០២៥ ។
អង្គសិក្ខាសាលានេះ រៀបចំឡើងក្នុងគោលបំណងពិនិត្យពិភាក្សា និងទទួលយកធាតុចូលពីអ្នកពាក់ព័ន្ធលើគោលការណ៍ការទទួលស្គាល់ និងការលើកទឹកចិត្តដល់បុគ្គលដែលបានចូលរួមប្រតិបត្តិសកម្មភាពមេត្រីបរិស្ថាន និងប្រើប្រាស់បចេ្ចកវិទ្យាទ្រទ្រង់បរិស្ថាន ដែលបានរៀបចំដោយនាយកដ្ឋានរង្វាន់និងលើកទឹកចិត្ត នៃអគ្គនាយកដ្ឋានចំណេះនិងព័ត៌មានបរិស្ថាន និងមានការចូលរួមពីលោក លោកស្រីនាយកដ្ឋានជំនាញ នៃក្រសួងបរិស្ថាន។
ថ្លែងក្នុងឱកាសនេះផងដែរលោកជំទាវ ក៏សូមថ្លែងអំណរគុណដល់អជ្ញាធរមូលដ្ឋាន រដ្ឋបាលក្រុង ស្រុក និងអ្នកពាក់ព័ន្ធទាំងអស់ដែលបានចូលរួមយ៉ាងសកម្មក្នុងយុទ្ធនាការ «ផ្លូវជាតិគ្មានសំរាម និងសំណល់ប្លាស្ទិក» ក្នុងបុព្វហេតុកម្ពុជាផ្ទះយើងស្អាត នឹងបានផ្តល់លិខិតថ្លែងអំណរគុណដល់រូបវន្តបុគ្គល និងនីតិបុគ្គលដែលបានចូលរួមអនុវត្តយុទ្ធនាការសម្អាតផ្លូវជាតិ «ផ្លូវជាតិគ្មានសំរាម និងសំណល់ប្លាស្ទិក» ជូនដល់អាជ្ញាធរ ក្រុង ស្រុក ឃុំ និងមន្ទីរពេទ្យបង្អែក ដែលអញ្ជើញមកពីខេត្តកំពង់ចាម និងខេត្តត្បូងឃ្មុំ សរុបចំនួន ២០ប័ណ្ណ។
