ខេត្តកំពង់ចាម ៖ បន្ទាប់ពីករណីឧកញ៉ាអ៊ាង ចាក់ដីចង់ទប់បិទទន្លេមេគង្គធ្វើឱ្យល្បីល្បាញស្រុកស្រីសន្ធរនោះមក ស្រាប់តែមានរឿងឧកញ៉ាមួយទៀតដែលកើតនៅក្បែរគ្នានោះ កំពុងចាក់ដីចូលខ្ពបទន្លេមេគង្គ និងកំពុងសាងសង់ផ្ទះយ៉ាងរំភើយ។ នោះគឺបុរសម្នាក់ដែលមានងារជាឧកញ៉ាឈ្មោះនួន រិទ្ធី អគ្គនាយកក្រុមហ៊ុន KFA កំពុងរំលោ.ភច្រាំងទន្លេ ដូចទៅនឹងឧកញ៉ាអ៊ាងនោះដែរ ដោយការចាក់ដីលុបខ្ពបដៃទន្លេមេគង្គនៅចំណុចភូមិតាកយ ឃុំព្រែកដំបូក ស្រុកស្រីសន្ធរ ខេត្តកំពង់ចាម។
ដោយសារល្បីល្បាញរឿងអំពើល្មោភរបស់ឧកញ៉ាអ៊ាង នៅក្នុងស្រុកស្រីសន្ធរនោះ នៅថ្ងៃទី២៣ ខែកុម្ភៈ ឆ្នាំ ២០២៤ គេឃើញមន្ត្រីភូមិបាលស្រុកប្រញាប់ប្រញាល់ជើង៣ ជើង៤, ចុះទៅផ្អាកសកម្មភាពនៃការសាងសង់របស់លោកឧកញ៉ានួន រិទ្ធី ដែលអ្នកផងដឹងថា ជាទង្វើបំពានច្បាប់នៃព្រះរាជាណាចក្រកម្ពុជា។ ប្រភពរាយការណ៍ថា ទង្វើនោះសង្ស័យមានការគប់គិតគ្នារវាងមន្ត្រីថ្នាក់ស្រុក ក្រោមការដឹកនាំរបស់លោកស៊ឹម គង់ ចៅហ្វាយស្រុកស្រីសន្ធរ ជាមួយលោកឧកញ៉ានួន រិទ្ធី ដែលភរិយារបស់ឧកញ៉ាមានស្រុកកំណើតនៅឃុំព្រែកដំបូកនោះ។ និយាយឱ្យខ្លីទៅ ទង្វើបំពានច្បាប់ប្រទេសជាតិដ៏ស្អុយរលួយបែបនេះ គឺកើតឡើងដោយការគប់គិតគ្នារវាងចៅហ្វាយស្រុកស្រីសន្ធរ លោកស៊ឹម គង់ និងឧកញ៉ានួន រិទ្ធី ដែលពិបាកនឹងប្រកែកណាស់ ។
ចៅហ្វាយស្រុកលោកស៊ឹម គង់ អាចនិយាយថា មិនដឹង? ដើម្បីរួចខ្លួនពីការទទួលខុសត្រូវ។ ស្របគ្នានឹង លោកចៅហ្វាយខេត្តកំពង់ចាមក៏អាចនិយាយបានដែរថា មិន ដឹងទេ ព្រោះសកម្មភាពបំពា.នច្បាប់បែបនេះ តែងតែកើតមានដោយសារតែមន្ត្រីនៅថ្នាក់ក្រោមគប់គិតគ្នា។
ប៉ុន្តែសម្រាប់ប្រជាពលរដ្ឋនៅក្នុងមូលដ្ឋានខាងលើនេះនាំគ្នាខ្សិបថា បើគ្មានការគប់គិតគ្នា តើគេអាចធ្វើសំណង់លយចូលខ្ពប ឬដៃទន្លេបានយ៉ាងដូចម្ដេចទៅ? និយាយរួមទៅ បើគ្មានការបិទភ្នែក ពត់ដុំដៃពីចៅហ្វាយស្រុក ស៊ឹម គង់ ដែលដើរអែបៗជាមួយឧកញ៉ាទេនោះ គឺមិនអាចមានអំពើបំពានច្បាប់ប្រទេសបែបនេះ កើតឡើងបានដោយងាយៗនោះឡើយ។ ចាំមើលថា តើរដ្ឋបាលខេត្តកំពង់ចាម របស់លោក អ៊ុន ចាន់ដា មានអ្វីបំភ្លឺបន្ថែមទៀត ចំពោះករណីឧកញ៉ានួន រិទ្ធី នេះ?
រឿងរ៉ាវដែលកំពុងកើតឡើងនៅស្រុកស្រីសន្ធរ ចំពោះករណីបំពា.នច្បាប់ប្រទេសនេះ គឺដោយសារមន្ត្រីអ្នកអនុវត្តច្បាប់ និងអាជ្ញាធរមូលដ្ឋាន សង្ស័យពាក់ព័ន្ធគ្នាទើបធ្វើបាន។ បើគ្មានកាគប់គិតគ្នារវាងពួកឈ្មួញអ្នកមានលុយ ជាមួយអាជ្ញាធរមូលដ្ឋានថ្នាក់ស្រុកទេនោះ គឺពិតជាគ្មានរឿងរ៉ាវដ៏ហួសចិត្តកើតឡើងបែបនេះឡើយ។
រាស្ត្រក្រីក្រនៅស្រុកស្រីសន្ធរ នាំគ្នាដើររិតតែដើមទ្រូងថា មិនគួរអ្នកមានទ្រព្យស្តុកស្ដម្ភ មានងារជាឧកញ៉ាប្រព្រឹត្តអំពើយ៉ាងដូច្នេះឡើយ។ ថា អ្នកមានលុយទៅ ដែលឆ្លៀតរំលោ.ភយ៉ាងឥតអៀនខ្មាស់ ចុះអាជ្ញាធរស្រុកស្រីសន្ធរ យ៉ាងម៉េចដែរ?
ស្រុកស្រីសន្ធរមានឧកញ៉ា២នាក់ហើយ ដែលរំលោ.ភច្រាំងទន្លេ សង្ស័យអភិបាលស្រុកនៅពីក្រោយ ។
ចាំមើលទៀត វាសនាអ្នកមានបាន រំលោ.ភទន្លេយ៉ាងអនាធិបតេយ្យបែបនេះ តើនឹងបានដោះស្រាយដោយវិធីណា?
ជុំវិញករណីខាងលើ អង្គភាពសារព័ត៌មានយើងខ្ញុំរង់ចាំការបកស្រាយ ពីសំណាក់អ្នកពាក់ព័ន្ធ និងបន្តការតាមដានព័ត៌មានបន្ថែមទៀត សូមអរគុណ៕
