ខេត្តកំពង់ឆ្នាំង៖ ដីបំរ៉ុងទុក១០ភាគរយ ស្មើនឹង៤៥ហិកតារបស់រដ្ឋ ស្ថិតនៅក្នុងភូមិក្រសាំងដុះឡើង ឃុំក្បាលទឹក ស្រុកទឹកផុស ខេត្តកំពង់ឆ្នាំងដែលគេហៅថាជាដីចាក់សំរាម នៅពេលនេះត្រូវបានក្រុមឈ្មួញឃុបឃិតគ្នាជាមួយអាជ្ញាធរ យកឈ្មោះ ប្រជាពលរដ្ឋ ឈរឈ្មោះដើម្បីធ្វើលិខិតទិញលក់និងរត់ការបង់ពន្ធត្រឹមខេត្តដោយមាន ឈ្មោះលោកឈឹម ធុល ដែលពលរដ្ឋស្គាល់ថា ត្រូវជាប្អូនថ្លៃរបស់ឯកឧត្តម ឈួរ ចាន់ឌឿន អតីតអភិបាលខេត្តកំពង់ឆ្នាំង លក់បន្តទៅឱ្យអ្នកមានលុយនៅឯរាជធានីភ្នំពេញយកលុយដើម្បីចែកគ្នាដាក់ហោប៉ៅ មិនខ្លាចច្បាប់ទម្លាប់ឡើយ ប្រជាពលរដ្ឋ ដាក់ការសង្ស័យថាបើគ្មានការបើកភ្លើងខៀវពីអាជ្ញាធរនិងជំនាញពាក់ព័ន្ធទេ ក៏មិនអាចរលូនបែបនេះដែរ។
ប្រភពព័ត៌មានពីប្រជាពលរដ្ឋ និយាយក្នុងលក្ខ័ណមិនបញ្ចេញឈ្មោះថា ការឃុបឃិតគ្នាលក់ដីបំរ៉ុងទុករបស់រដ្ឋនេះ មានឈ្មោះកែវ មករា ជាអ្នកទិញ ហើយយកទៅលក់បន្តឲ្យអ្នកមានលុយដែលរស់នៅភ្នំពេញក្នុងនោះក៏មានមន្ត្រីផ្នែករដ្ឋបាលព្រៃឈើរមាសបានចូលរួមសម្របសម្រួលផងដែរ។
ប្រជាពលរដ្ឋដែលរស់នៅក្នុងភូមិក្រសាំងដុះឡើងឃុំក្បាលទឹកស្រុកទឹកផុសខេត្តកំពង់ឆ្នាំង សូមអំពាវនាវតាមរយអ្នកសារព័ត៌មានឲ្យបានចុះផ្សព្វផ្សាយឱ្យបានដឹងទៅដល់ប្រមុខថ្នាក់ដឹកនាំជាពិសេស ឯកឧត្តមស៊ុន សុណ្ណារិទ្ធ អភិបាលខេត្តកំពង់ឆ្នាំង មេត្តាជួយពិនិត្យមើលមន្ត្រីក្រោមឱវាទផងទាន។ ហេតុអ្វីក៏ហ៊ានយកដីដែលជាសម្បត្តិរដ្ឋយកទៅលក់ឱ្យក្រុមឈ្មួញទៅវិញ.?។
គួររំលឹកផងដែរថា ដីនេះគឺជាដីគម្របព្រៃឈើឆ្នាំ២០០២ក្រោយពេលនិស្សិតចុះវាស់វែងដី១០ភាគរយ(10% )ដីដែលមានទំហំ៤៥ហិកតាត្រូវបានកាត់ឆ្វៀលពីគម្របព្រៃឈើឆ្នាំ២០០២ ដាក់ជាដីចាក់សម្រាម បម្រើការឲ្យភូមិក្រសាំងដុះឡើង ឃុំក្បាលទឹក ដែលជាដីរបស់រដ្ឋ រហូតមកដល់ពេលបច្ចុប្បន្ននេះដី១០ភាគរយ( 10% )ដែលគេហៅថាជាដីចាក់សំរាមនោះក៏ប៉ុន្តែកន្លទៅមានគ្រឿងចាក់ជាច្រើនគ្រឿងបានធ្វើសកម្មភាពឈូសឆាយដីនិងមានការហ៊ុំព័ទ្ធដោយរបងគ្មានឱ្យនរណាទៅធ្វើការឬមករំខាន ពីមន្ត្រីជំនាញឬអាជ្ញាធរពាក់ព័ន្ធសោះឡើយ ដូចពាក្យប្រជាពលរដ្ឋពោលថា(កន្ទេលធំ បន្លំដេក) អ្វីដែលប្រជាពលរដ្ឋព្រួយបារម្ភនោះខ្លាចសម្បត្តិរបស់រដ្ឋត្រូវបាត់បង់ដោយសារក្រុមឈ្មួញទុច្ចរិតនិងមន្ត្រីខិលខូចមួយចំនួនតូចដែលគិតតែពីប្រយោជន៍ខ្លួន។
ដោយឡែក លោកស្រី សឹម រ៉ុន មេឃក្បាច់ទឹក បានឲ្យសារព័ត៌មានយើងដឹងតាមទូរសព្ទ ទីតាំងដីខាងលើនោះគឺដីប្រជាពលរដ្ឋមានលិខិតកាន់កាប់ តាំងពីមេឃុំចាស់មួយម្ល៉េះលោកស្រីមិនបានដឹងទេ. ហើយលោកស្រីថាមិនមានទីតាំងដីបម្រុងទុក្ខរបស់រដ្ឋសម្រាប់ចាក់សំរាមនោះដែរ ប្រហែលអ្នកសារព័ត៌មានច្រឡំទីតាំងទេដឹង។
បើយោងតាមប្រភពពីប្រជាពលរដ្ឋរស់នៅក្នុងភូមិក្រសាំងដុះឡើង ឃុំក្បាលទឹក ស្រុកទឹកផុស ខេត្តកំពង់ឆ្នាំង សូមលក្ខខណ្ឌមិនបញ្ចេញឈ្មោះបានឱ្យអង្គភាពសារព័ត៌មានយើងដឹងថា ដីបម្រុងទុក១០ភាគរយ(10% )ដែលមានទំហំ៤៥ហិកតាត្រូវបានកាត់ឆ្វៀលពីដីគម្របព្រៃឈើឆ្នាំ២០០២ ដាក់ជាដីចាក់សម្រាម បម្រើការឲ្យភូមិក្រសាំងដុះឡើង ឃុំក្បាលទឹក ដែលជាដីរបស់រដ្ឋ រហូតមកដល់ពេលបច្ចុប្បន្ននេះដី១០ភាករយ( 10% )ដែលគេហៅថាជាដីចាក់សំរាមនោះ ត្រូវបានក្រុមឈ្មួញនិងមន្ត្រីខិលខូចមួយចំនួនតូចឃុបឃិតចែកគ្នាម្នាក់បន្តិចម្នាក់ៗតាមសេនានយោ លក់យកលុយដាក់ហោប៉ាវរៀងៗខ្លួន នេះមិនខុសពីបទចម្រៀងមួយបទគេតែងច្រៀងថា(ទន្សោងគោព្រៃ)។
តែទោះជាយ៉ាងនេះប្រជាពលរដ្ឋទទូចស្នើសុំ ដល់ឯកឧត្តមស៊ុន សុវណ្ណារិទ្ធ អភិបាលខេត្តកំពង់ឆ្នាំង សូមឯកឧត្តម មេត្តាដាក់កម្លាំងមន្ត្រីដែលមានសមត្ថកិច្ច មានសុភ័ក្តវិនិច្ឆ័យលើករណីដីទំហំ៤៥ហិកតាដែលស្ថិតនៅចំណុចផ្លូវកៀនស្ពានក្នុងភូមិក្រសាំងដុះឡើង ឃុំក្បាលទឹក ស្រុកទឹកផុស ខេត្តកំពង់ឆ្នាំងផងទានពុំដូច្នេះទេដី ដែលជាសម្បត្តិរបស់រដ្ឋត្រូវបាត់បង់ដោយសារក្រុមឈ្មួញទុច្ចរិតនិងមន្ត្រីខិលខូចមួយចំនួនតូចនេះហើយជាអ្នកដើមចមបំផ្លិចបំផ្លាញសម្បត្តិធនធានធម្មជាតិរបស់ រដ្ឋដែលមានតម្លៃមហាសាលមិនអាចកាត់ថ្លៃបាន។
ខាងអង្គភាពយើងខ្ញុំ ចុះផ្សព្វផ្សាយនេះគ្មានចេតនាណាមួយមូលបង្កាច់លើបុក្គលណាមួយឡើយ បើខាងសាមីខ្លួនបានលឺកើតទុក្ខមិនសុខចិត្តអាចតេមកកាន់អង្គភាពយើងខ្ញុំបាន រងចាំការណ៌បកស្រាយរាល់បញ្ហការចុះផ្សព្វផ្សាយខាងលើនេះ សូមអរគុណសូមគោរពលា៕
