ខេត្តកំពង់ស្ពឺ៖ កាលពីកន្លងទៅឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានចេញសេចក្តីជូនដំណឹង និងបញ្ជាឱ្យសមត្ថកិច្ចពាក់ព័ន្ធគ្រប់គ្រងតំបន់ការពារធម្មជាតិ ត្រូវបន្តអនុវត្តច្បាប់១០០% ដោយគ្មានការលើក លែងជាដាច់ខាត និងបញ្ចប់នូវវប្បធម៌ ធ្វើកិច្ចសន្យាហើយដោះលែងជនប្រព្រឹត្តបទល្មើស។
បើតាមប្រភពបែកធ្លាយមកថា កាលពីយប់ថ្ងៃទី៦ ឈានចូលថ្ងៃទី៧ ខែសីហា ឆ្នាំ២០២៤ មន្ត្រីបរិស្ថានប្រចាំការនៅចំណុច ស្នាក់ការ តេទឹកពុះ ស្ថិតនៅក្នុងឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ បានបង្ក្រាប គោយន្តកន្ត្រៃដឹកឈើដុល ចំនួន៣គ្រឿង យកមករក្សាទុក នូវស្នាក់ការ ដើម្បីអនុវត្តតាមផ្លូវច្បាប់ ក៏ប៉ុន្តែការបង្ក្រាបគោយន្តខាងលើនេះធ្វើឡើងមិនទាន់បានបាត់ស្ងៀមផ្សែងម៉ាស៊ីនគោយន្តផង ក៏ធ្វើការដោះលែងវិញជាថ្នូរនិងលុយរាប់រយដុល្លារអាមេរិក ដែលផ្ទុយទៅនិងបទបញ្ជារបស់ឯកឧត្តមបណ្ឌិត អ៊ាង សុផល្លែត ប៉ុន្តែអ្វីដែលធ្វើឱ្យមហាជន និងប្រជាពលរដ្ឋ មានការចាប់អារម្មណ៍នោះគឺជារៀងរាល់ថ្ងៃ យប់មានរថយន្តដឹកឈើ រ៉ឺម៉កដឹកធ្យូង និងរថយន្តដឹកធ្យូង រថយន្តដឹកអុសការ៉េ ជាច្រើនគ្រឿងធ្វើចរាចរណ៍ឆ្លងកាត់ស្នាក់ការរងតេទឹកពុះ និងឆ្លងកាត់ដែនជម្រកសត្វព្រៃស្រុកឱរ៉ាល់ នៅខាងលិចរង្វង់មូលផ្សារកន្តួតជាច្រើនគ្រឿង មិនដែលឃើញមន្ត្រីជំនាញចាប់ឬបង្ក្រាបទាល់តែសោះ ឬមួយក៏ក្រុមរថយន្តដឹកឈើ រ៉ឺម៉កដឹកធ្យូង និងរថយន្តដឹកធ្យូង រថយន្តដឹកអុសការ៉េ ទាំងអស់នោះបង់លុយជាប្រចាំ ឬបង់លុយជាខែទើបដំណើរការបានរលូនបែបនេះ?។
បើតាមការបង្ហើបពីប្រជាពលរដ្ឋបានឱ្យដឹងថា÷ការបង្ក្រាបគោយន្តកន្ត្រៃដឹកប្រភេទឈើដុលចំនួន៣គ្រឿង ទាំងយប់នេះធ្វើឲ្យមហាជនកោតសរសើរយ៉ាងខ្លាំងចំពោះមន្ត្រីបរិស្ថានដែលចុះអនុវត្តតាមផ្លូវច្បាប់។ ប៉ុន្តែពួកគាត់ឆ្ងល់ថាការបង្ក្រាបនេះធ្វើបានតែមួយចំអិនកំពឹស(មួយដង្ហើមចង្រិត)តែប៉ុណ្ណោះ ក៏ត្រូវបានដោះលែងគោយន្តកន្ត្រៃដឹកឈើទាំង៣គ្រឿងនោះទៅវិញជាថ្នូរនិងលុយរាប់រយដុល្លារឯណុះ។
បើយោងតាមម្ចាស់គោយន្តបានឱ្យអង្គភាពសារព័ត៌មានយើងដឹងថា កាលពីយប់ថ្ងៃទី៦ ឈានចូលថ្ងៃទី៧ ខែសីហា ឆ្នាំ២០២៤ ពូកគាត់ដឹកឈើប្រភេទឈើដុល (ហៅឈើគ្រាក់)បន្តិចបន្តួច ត្រូវបានកម្លាំងមន្ត្រីបរិស្ថានចាប់បង្ក្រាបគោយន្ត យកមកទុកនៅស្នាក់ការរង តេទឹកពុះ និងទាលុយពូកគាត់ក្នុងមួយគោយន្តចំនួន១លានរៀល ជាថ្នូរនិងការដោះលែងគោយន្តដឹកឈើនោះវិញ។
ម្ចាស់គោយន្តបានបន្តទៀតថា ពួកគាត់គ្មានលុយនោះទេ ហើយពួកគាត់បានសុំអង្វរ ក ស្ទើរ តែទន់ខ្លួនអស់ជាច្រើនម៉ោងដើម្បីសុំគោយន្តវិញ ប៉ុន្តែមន្ត្រីបរិស្ថាន បានទារលុយពួកគាត់ក្នុងគោយន្តមួយ ៨០ម៉ឺនរៀល រហូតមកដល់រសៀលថ្ងៃទី៧ ខែសីហា ឆ្នាំ២០២៤ គោយន្តដែលមន្ត្រីបរិស្ថាន ចាប់បង្ក្រាបនោះត្រូវបានដោះលែងវិញហើយ ដោយម្ចាស់បានចំណាយលុយក្នុងមួយនាក់ៗ ៨០ម៉ឺនរៀលតាមការទាមទាររបស់មន្ត្រីបរិស្ថាន។
ពាក់ព័ន្ធនិងការលើកឡើងខាងលើនេះអ្នកយកព័ត៌មានយើងបានផ្ញើសារតាមប្រព័ន្ធ តេឡេក្រាមទៅលោក ស៊ុន សុលាង ប្រធានការិយាល័យស្ដីទីនៃការិយាល័យដែនជម្រកសត្វព្រៃភ្នំឱរ៉ាល់ ដើម្បីសុំការបកស្រាយបំភ្លឺបន្ថែមឃើញលោកចូលមើលហើយមិនមានការឆ្លើយតប។
ដោយឡែកលោក ច័ន្ទថេត ថានរៈ ប្រធានមន្ទីរបរិស្ថានខេត្តកំពង់ស្ពឺ អ្នកយកព័ត៌មានយើងបានធ្វើសេចក្តីរាយការណ៍ជូនលោកតាមប្រព័ន្ធតេឡេក្រាម និងស្នើសុំលោកជួយបញ្ជាក់បន្ថែមជុំវិញការលើកឡើងខាងលើនេះ ឃើញលោកចូលមើលហើយ តែលោកមិនបានបកស្រាយអ្វីទេ។
ដូច្នេះប្រជាពលរដ្ឋរស់នៅក្នុងស្រុកឱរ៉ាល់ ខេត្តកំពង់ស្ពឺបានគោរពស្នើសុំទៅដល់ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន ដាក់កម្លាំងអធិការកិច្ច បើកការស៊ើបអង្កេតឱ្យបានស៊ីជម្រៅលើមន្ត្រីបរិស្ថានប្រចាំការនៅស្រុកឱរ៉ាល់ ដែលបានទាលុយពីម្ចាស់គោយន្តដឹកជញ្ជូនប្រភេទឈើដុលជាថ្នូរនិងការដោះលែង ដោយមិនបានអនុវត្តតាមផ្លូវច្បាប់ឲ្យបានតឹងរឹងនោះផង។
អ្នកសារព័ត៌មានគ្រាន់តែជាកញ្ចក់ឆ្លុះបញ្ជាំង ពីបញ្ហាសង្គម និងជាអ្នកនាំដំណឹង ឬនាំសារពីប្រជាពលរដ្ឋជួនដល់ប្រមុខថ្នាក់ដឹកនាំ អោយលោកបានជ្រាប! និងនាំសារ ឬដំណឹងពីប្រមុខថ្នាក់ដឹកនាំឱ្យប្រជាពលរដ្ឋបានដឹង និងរិះគន់ក្នុងន័យស្ថាបនា ពុំមានចេតនាណាមួយ មួលបង្កាច់ ឬជាន់ពន្លិច ស្ថាប័នណាមួយឡើយ។ អង្គភាពសារព័ត៌មានយើងខ្ញុំរងចាំទទួលការបកស្រាយ ពីស្ថាប័នពាក់ព័ន្ធ គ្រប់លំដាប់ថ្នាក់ ដោយយោងតាមច្បាប់ស្ដីពីរបបសារព័ត៌មាន នៃព្រះរាជាណាចក្រកម្ពុជា៕(នៅមានត)
